លោក ហាក់ សុធារ៉ា ប្រធានមន្ទីរផែនការខេត្ដសៀមរាប បានបញ្ជាក់ថា ការធ្វើជំរឿនសេដ្ឋកិច្ចឆ្នាំ២០២២ នៅក្នុងខេត្ដសៀមរាប បានដំណើរយ៉ាងរលួន ដោយគិតចាប់ពីថ្ងៃទី០១ ដល់ថ្ងៃទី០៩ ខែមីនា ឆ្នាំ២០២២នេះ អនុវត្ដបានប្រមាណ៦០ភាគរយហើយ ក្នុងចំណោមសហគ្រាសអាជីវកម្មសេដ្ឋកិច្ចជិត ៥ម៉ឺន សហគ្រាសដែលបានចុះបញ្ជីសេដ្ឋកិច្ចនៅក្នុងខេត្ដសៀមរាប។
លោក ហាក់ សុធារ៉ា បានឲ្យដឹងដែរថា ការធ្វើសម្ភាសន៍សម្រាប់ជំរឿនសេដ្ឋកិច្ចនេះ ធ្វើឡើងទៅលើអង្គភាពអាជីវកម្មសហគ្រាសទាំងរបស់រដ្ឋ របស់ឯកជនដែលបានដំណើរការចុះបញ្ជីសេដ្ឋកិច្ច និងការគូរផែនទីកាលពីឆ្នាំ២០២១កន្លងមក ដែលក្នុងនោះ មន្ដ្រីជំរឿនបានធ្វើសម្ភាសន៍ ប្រជាពលរដ្ឋលក់ដូរឥវ៉ាន់ចាប់ពីមួយកញ្ច្រែងនៅខាងមុខផ្ទះ ឬនៅតាមផ្លូវ រហូតដល់ផ្ទះសំណាក់សណ្ឋាគារ ក្រុមហ៊ុនតូចធំទាំងអស់ លើកលែងតែជាប្រភេទអាជីវកម្មរបស់ស្ថានទូតនានា និងផ្នែកកិសកម្ម។ ការធ្វើជំរឿនសេដ្ឋកិច្ចឆ្នាំ២០២២នេះ បានដំណើរការយ៉ាងរលូន ដោយក្នុងរយៈពេល ៩ថ្ងៃកន្លងមកនេះ បានប្រមាណ ៦០ភាគរយហើយ ក្នុងចំណោមអាជីវកម្មសហគ្រាសចំនួនប្រមាណ ៤៨,៦០០សហគ្រាស ខណៈដែលមានន្ដ្រីជំរឿន នៃមន្ទីរផែនការជាង ២០០នាក់ បានចុះប្រតបត្ដិការនៃការធ្វើជំរឿនសេដ្ឋកិច្ច ដោយគ្រោងនឹងបញ្ចប់តាមផែនការកំណត់នូវដំណាច់ខែមីនាខាងមុខនេះ ក្នុងចុះអនុវត្ដសម្ភាសន៍ចំនួន ២០ថ្ងៃ និងចំនួន១០ថ្ងៃ សម្រាប់បូកសរុបលទ្ធផល។
ប្រធានមន្ទីរ បានឱ្យដឹងទៀតថា ការធ្វើជំរឿនសេដ្ឋកិច្ចឆ្នាំ២០២២នេះ មានការលំបាកបន្ដិច ដោយសារមានប្រជាពលរដ្ឋមួយចំនួន មិនសូវសហការផ្ដល់កិច្ចសម្ភាសន៍ជាមួយមន្ដ្រីជំរឿន ជាពិសេសនៅប្រជាពលរដ្ឋក្នុងក្រុងសៀមរាប ដោយពួកគាត់មានការភាន់ច្រឡំថា ការធ្វើជំរឿនសេដ្ឋកិច្ចនេះ ដើម្បីឱ្យពួកគាត់បង់ពន្ធលើអាជីវកម្មរបស់គាត់ ប៉ុន្ដែក្រោយពេលមានការណែនាំពីមន្ដ្រីជំរឿន និងអន្ដរាគមន៍ពីអាជ្ញាធរមូលដ្ឋាន ស្ថាប័នពាក់ព័ន្ធ ប្រជាពលរដ្ឋបានឱ្យធ្វើសម្ភាសន៍ធម្មតា ដោយឡែកនៅតាមបណ្ដាស្រុកចំនួន ១១ទៀត ក្នុងខេត្ដសៀមរាប បានដំណើរការសម្ភាសន៍ធម្មតា។
លោកក៏សុំស្នើប្រជាពលរដ្ឋ ឱ្យមានចូលរួមផ្ដល់បទសម្ភាសន៍ជាមួយក្រុមមន្ដ្រីជំរឿនឱ្យបានទាន់ពេល ព្រោះការធ្វើជំរឿនសេដ្ឋកិច្ចនេះ ធ្វើឡើងត្រូវបានរក្សាសំង៉ាត់នូវអាជីកម្មសហគ្រាសរបស់ប្រជាពលរដ្ឋ។
សូមជំរាបថា រដ្ឋាភិបាលកម្ពុជាបានអនុវត្តការធ្វើជំរឿនសេដ្ឋកិច្ចលើកទី២នេះ ដើម្បីអភិវឌ្ឍន៍ប្រទេសជាតិឱ្យរីកចំរើន ដែលបានអនុវត្ដចាប់ពីថ្ងៃទី០១ ដល់ថ្ងៃទី៣១ ខែមីនា ឆ្នាំ២០២២។ រាល់ទិន្ន័យជំរឿនទាំងអស់ នឹងប្រមូលមកពីគ្រប់បណ្តាអង្គភាពសេដ្ឋកិច្ច សហគ្រាស សិប្បកម្ម អាជីវកម្ម លក់ដុំ លក់រាយ និងសេវាកម្មផ្សេងៗទៀត។ ការធ្វើជំរឿននេះ គឺជាកត្តាចំបាច់បំផុតសម្រាប់ប្រទេសជាតិ ដើម្បីរៀបចំគោលនយោបាយអាទិភាពសំខាន់ៗ ក្នុងការអភិវឌ្ឍប្រទេសជាតិឱ្យរីកចម្រើន និងជឿនលឿន៕
អត្ថបទ និង រូបភាព៖ លោគ ឈិត សាវី
កែសម្រួល៖ លោក អ៊ុន ណារាជ្យ
