នៅព្រឹកថ្ងៃទី១១ ខែមីនា ឆ្នាំ២០២២នេះ នៅសាលប្រជុំសាលាខេត្តសៀមរាប មានរៀបចំពិធីប្រកាសចូលកាន់មុខតំណែងអភិបាលរង នៃគណៈអភិបាលខេត្តសៀមរាប ចំនួន២រូបជាផ្លូវការ ក្រោមអធិបតីភាពឯកឧត្តម សក់ សេដ្ឋា រដ្ឋលេខាធិការប្រចាំការ តំណាងដ៏ខ្ពង់ខ្ពស់សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្ត្រីក្រសួងមហាផ្ទៃ ដោយមានការចូលរួមពីសំណាក់ឯកឧត្ដម អ៊ាន ឃុន ប្រធានក្រុមប្រឹក្សាខេត្ត និង ឯកឧត្ដម ទៀ សីហា អភិបាលខេត្ត ព្រមទាំង ឯកឧត្ដម លោកជំទាវ លោក លោកស្រី ជាប្រតិភូអមដំណើរគណៈអធិបតី សមាជិកក្រុមប្រឹក្សាខេត្ត អភិបាលរងខេត្ត ថ្នាក់ដឹកនាំមន្ទីរ អង្គភាពនានាក្នុងខេត្ត អភិបាលក្រុងស្រុក និង មន្ត្រីអ្នកមុខអ្នកការសំខាន់ៗជាច្រើនរូបទៀត។
សូមបញ្ជាក់ថា អភិបាលរងខេត្តសៀមរាបថ្មីចំនួន២រូប ត្រូវបានប្រកាសតែងតាំងជាផ្លូវការនេះ រួមមាន ៖ ១. លោក ប្រាក់ សោភ័ណ ត្រូវបានតែងតាំងជាអភិបាលរងខេត្តសៀមរាប ជំនួសលោក ង៉ាន់ ភិរុណ ដែលត្រូវបានផ្ទេរភារកិច្ចទៅកាន់មុខតំណែងជាអគ្គាធិការរង នៃអគ្គាធិការដ្ឋានក្រសួងមហាផ្ទៃ និង ២. លោក អ៊ឹង គឹមលាង អតីតអភិបាលរងខេត្តពោធិ៍សាត់ មកជាអភិបាលរងខេត្តសៀមរាប ជំនួសលោក ពៅ ពិសិដ្ឋ ដែលត្រូវបានតែងតាំងជាអភិបាលរងខេត្តពោធិ៍សាត់វិញ។
ឯកឧត្តម ទៀ សីហា អភិបាលខេត្តសៀមរាប បានមានប្រសាសន៍ថា បើទោះជាស្ថិតក្នុងដំណាក់កាល នៃផលប៉ះពាល់ ដោយសារជំងឺកូវីដ-១៩ ធ្ងន់ធ្ងរក៏ដោយ ក៏រដ្ឋបាលខេត្ត ដោយមានការគាំទ្រពីរាជរដ្ឋាភិបាល បានយកចិត្តទុកដាក់លើការកែលម្អសោភ័ណភាពក្រុងឱ្យបានកាន់តែល្អប្រសើរថែមទៀត ដែលជាក់ស្តែងហេដ្ឋារចនាសម្ព័ន្ធផ្លូវថ្នល់ ៣៨ខ្សែ ប្រព័ន្ធលូ ភ្លើងបំភ្លឺសាធារណៈ និងកែលម្អស្ទឹងសៀមរាប ក្នុងក្រុងសៀមរាប គឺជាសមិទ្ធផលប្រវត្តិសាស្រ្តថ្មីមួយមិនអាចកាត់ថ្លៃបានរបស់សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា សម្រាប់ខេត្តសៀមរាប ដែលមកដល់ពេលនេះយើងបានសម្រេច នៃការសាងសង់ផ្លូវបាន១០០ភាគរយហើយ ប៉ុន្តែនៅសេសសល់បន្តិចបន្តួច លើការងារបំពាក់ប្រព័ន្ធភ្លើងបំភ្លឺសាធារណៈ និងការងារផ្សេងៗទៀត ហើយគ្រោងនឹងធ្វើពិធីសម្ពោធដាក់ឱ្យប្រើប្រាស់ជាផ្លូវការ នាថ្ងៃទី០៤ ខែមេសា ឆ្នាំ២០២២ខាងមុខ ក្រោមអធិបតីភាពដ៏ខ្ពង់ខ្ពស់សម្តេចតេជោនាយករដ្ឋមន្រ្តី និងសម្តេចកិត្តិព្រឹទ្ធបណ្ឌិត។
មានប្រសាសន៍ក្នុងឱកាសនោះ ឯកឧត្តម សក់ សេដ្ឋា រដ្ឋលេខាធិការប្រចាំការ នៃក្រសួងមហាផ្ទៃ បានជំរុញឱ្យអភិបាលរងទាំង២រូប ដែលទើបទទួលតំណែងថ្មីនៅពេលនេះ ត្រូវរួមគ្នាជាមួយលោកអភិបាលខេត្ត និងស្ថាប័នពាក់ព័ន្ធទាំងអស់ ធ្វើការអភិឌ្ឍខេត្តឱ្យកាន់តែមានការរីកច្រើន និងបម្រើប្រជាពលរដ្ឋឱ្យមានតម្លាភាព ក្នុងនោះត្រូវរួមគ្នាកសាង ពង្រឹងសមត្ថភាព រដ្ឋបាលថ្នាក់ក្រោមជាតិ ជាពិសេស ភូមិ ឃុំ សង្កាត់ ឱ្យមានភាពធន់ទៅនឹងវិបត្តិ ធន់ទៅនឹងការប្រែប្រួលនៃព្រឹត្តិការណ៍នានា ជាក់ស្តែងដូចជាយើងកំពុងជួបប្រទះនៅពេលនេះ គឺការឆ្លងរាលដាលនៃមេរោគកូវីដ-១៩ ដែលកន្លងមកនេះ យើងបានឆ្លងកាត់វិធានការនានា ពាក់ព័ន្ធនិងជំងឺកូវីដ-១៩ ជាពិសោធន៍ ត្រូវបានគេរកឃើញថា រដ្ឋបាលមូលដ្ឋាន ជារដ្ឋបាលជួរមុខ ជារដ្ឋបាលឆ្លើយតបបានភ្លាមៗទៅនឹងវិបត្តិ ទៅនឹងការប្រែប្រួល ទៅនឹងជំងឺឆ្លងរាតត្បាតផ្សេងៗ។
ឯកឧត្តមបានពន្យល់ថា ពាក់ព័ន្ធបញ្ហាកូវីដ-១៩ ពេលបិទខ្ទប់ ពុំមានមន្រ្តីថ្នាក់ជាតិណាអាចមកជួយយើងបានទេ គឺមានតែរដ្ឋបាលមូលដ្ឋានប៉ុនណ្ណោះជាអ្នកឆ្លើយតប ជាអ្នកអនុវត្តវិធានការនានា ហើយពេលមានគ្រោះធម្មជាតិនានា អ្នកដែលដោះស្រាយ និងជួយសង្គ្រោះមុនគេ គឺរដ្ឋបាលមូលដ្ឋាន ដូច្នេះហើយបានជាយើងត្រូវកសាងរដ្ឋបាលមូលដ្ឋាន ក្នុងស្ថានភាពពិភពលោកថ្មីនេះឱ្យមានភាពធន់ទៅនិងវិបត្តិផ្សេងៗនេះ ដើម្បីកំណត់ពីផលប៉ះពាល់សេដ្ឋកិច្ចមកលើប្រជាពលរដ្ឋរបស់យើង ខណៈបច្ចុប្បន្ននេះ រាជរដ្ឋាភិបាលកម្ពុជា បាននឹងកំពុងតែយកចិត្តទុកដាក់លើការងារកសាងរដ្ឋបាលមូលដ្ឋាននេះណាស់៕
អត្ថបទ និង រូបភាព ៖ លោក ឃុត សៅ លោក ជា ស្រស់
កែសម្រួលអត្ថបទ ៖ លោក លីវ សាន្ត
