អាជ្ញាធរជាតិអប្សរា នៅថ្ងៃទី១១ ខែមីនា ឆ្នាំ២០២២ បានរៀបចំសិក្ខាសាលាស្ដីពី ការគ្រប់គ្រងដីធ្លីតំបន់១ និងតំបន់២ នៃរមណីយដ្ឋានអង្គរ ដើម្បីធ្វើការផ្សព្វផ្សាយច្បាប់ និងលិខិតបទដ្ឋានគតិយុត្តនានាពាក់ព័ន្ធនឹងការគ្រប់គ្រង និងប្រើប្រាស់ដីធ្លីនៅតំបន់១ និងតំបន់២ ដោយមានការចូលរួមពីមន្ត្រី និងបុគ្គលិក នៃអាជ្ញាធរជាតិអប្សរា អាជ្ញាធរមកពីសង្កាត់ឃុំ រួមនិងតំណាងរដ្ឋបាលក្រុង ស្រុកប្រាសាទបាគង ស្រុកពួក ស្រុកបន្ទាយស្រី និងស្រុកអង្គរធំ សរុបប្រមាណ ៦០នាក់។
អង្គសិក្ខាសាលាក៏មានការអញ្ជើញចូលរួមពីឯកឧត្តម ស៊ន់ សុជាតិ លោកជំទាវ ជា សុកនួន លោក សួង សុភា មេធាវីប្រចាំអាជ្ញាធរជាតិអប្សរា និងបានធ្វើបទបង្ហាញ អំពីឯកសារគតិយុត្តសំខាន់ៗ ជូនអង្គសិក្ខាសាលា និងពិភាក្សាអំពីតួនាទី កាតព្វកិច្ចរបស់ផ្នែកពាក់ព័ន្ធ ដើម្បីធានានូវប្រសិទ្ធិភាពការងារដោយប្រកាន់នូវគោលការណ៍ច្បាប់។
ឯកឧត្ដម ឡុង កុសល អគ្គនាយករង នៃអាជ្ញាធរជាតិអប្សរា មានប្រសាសន៍ក្នុងពេលបើកសិក្ខាសាលាថា តំបន់១ និងតំបន់២ របស់រមណីយដ្ឋានអង្គរ គឺជាតំបន់សំខាន់ជាងគេដែលត្រូវការពារខ្ពស់បំផុត ព្រោះនៅរៀងរាល់ពេលបោះឆ្នោតម្តងៗ គឺពលរដ្ឋមួយចំនួន តែងតែឆ្លៀតឱកាស លួចសាងសង់សំណង់ខុសច្បាប់នៅក្នុងតំបន់ការពារទាំងឡាយនៃរមណីយដ្ឋានអង្គរ។ ហើយបញ្ហាបំពានទៅលើតំបន់ការពារនៃរមណីយដ្ឋានអង្គរទាំងឡាយ គឺទាំងអាជ្ញាធរជាតិអប្សរា និងទាំងអាជ្ញាធរមូលដ្ឋាន ភូមិ ឃុំ សង្កាត់ ក្រុងស្រុក និងខេត្តសៀមរាប ត្រូវតែស្វែងរកដំណោះស្រាយទាំងអស់គ្នា ដើម្បីបញ្ជៀសនូវបញ្ហាទាំងឡាយដែលជាផលប៉ះពាល់ដល់តម្លៃលេចធ្លោជាសកលនៃរមណីយដ្ឋានអង្គរ៕
អត្ថបទ និង រូបភាព៖ លោក ឈិត សាវី
កែសម្រួល៖ លោក អ៊ុន ណារាជ្យ
