នៅព្រឹក ថ្ងៃទី១៧ខែមីនាឆ្នាំ២០២២ មានករណីគ្រោះថ្នាក់ចរាចរណ៍ដ៏គួរឱ្យរន្ធត់មួយ រវាងរថយន្តនិងម៉ូតូ បានបណ្ដាលឱ្យក្មេងស្រី ២នាក់ស្លាប់ នៅចំណុចខាងកើតមន្ទីរពេទ្យគន្ធបុប្ផា ស្ថិតក្នុងភូមិទ្រាំង សង្កាត់ស្លក្រាម ក្រុងសៀមរាប ។
តាមរបាយការណ៍របស់សមត្ថកិច្ចបានឲ្យដឹងថា ករណីគ្រោះថ្នាក់ចរាចរណ៍បង្កឡេីងរវាងរថយន្តម៉ាក Prius ពណ៌ប្រផេះ ពាក់ស្លាកលេខភ្នំពេញ2BD-7208 បានបេីកបុក ម៉ូតូម៉ាកScoopy ពណ៌ស សេរីឆ្នាំ២០២២ ពាក់ស្លាកលេខសៀមរាប1AK-3416 បណ្តាលឲ្យស្លាប់អ្នកបេីកបរម៉ូតូចំនួន២នាក់ភេទស្រី ទី១ ឈ្មោះ ឡេង ស៊ីវហង្ស ភេទស្រីអាយុ១២ឆ្នាំ មុខរបរ សិស្ស មានទីលំនៅភូមិវាល សង្កាត់គោកចក ក្រុងសៀមរាប ស្លាប់នៅកន្លែងកើតហេតុ ទី២ ឈ្មោះ សុភ័ក្រ អម្រឹត អាយុ១៣ឆ្នាំ មុខរបរ សិស្ស មានទីលំនៅភូមិបុស្សក្រឡាញ់ សង្កាត់ជ្រាវ ក្រុងសៀមរាប បានស្លាប់ក្រោយពេលបញ្ជូនទៅសង្គ្រោះបន្ទាន់នៅមន្ទីរបង្អែកខេត្តសៀមរាប ។ ចំណែកអ្នកបើកបររថយន្តឈ្មោះ សេង សុវុត្រា ភេទប្រុស អាយុ ២៤ ឆ្នាំ មុខរបរជាងឡាន បច្ចុប្បន្នស្នាក់នៅភូមិធ្លកអណ្ដូង សង្កាត់ស្លក្រាមក្រុងសៀមរាប ។
តាមសាកី្សនៅកន្លែងកើតហេតុបានឲ្យដឹងថា នៅមុនពេលកើតហេតុនោះ រថយន្តម៉ាក Prius បានបើកបរក្នុងល្បឿនលឿន មកពីទិសខាងកើតចុះពីស្ពាននាគ និងខ្វះការប្រុងប្រយ័ត្ន នៅចំណុចផ្លូវមានចរាចរណ៍ឆ្លងកាត់ខ និងស្របពេលម៉ូតូម៉ាកScoopy ឆ្លងកាត់មិនប្រុងប្រយ័ត្នផងដែរនោះ ទើបរថយន្តបានបុកយ៉ាងពេញទំហឹង។ ចំពោះរថយន្តបង្កក្រោយពេលគ្រោះថ្នាក់ទៅមុខមិនរួច ត្រូវបានសមត្ថកិច្ចនិងប្រជាពលរដ្ឋឃាត់ខ្លួនបានផងដែរ។
បច្ចុប្បន្នជនបង្កនិងវត្ថុតាងត្រូវបានសមត្ថកិច្ចបញ្ជូនទៅការិយាល័យជំនាញ ដើម្បីអនុវត្តន៍តាមនីតិវិធីច្បាប់ ចំពោះសព ជនរងគ្រោះបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី៕
អត្ថបទ និងរូបភាព : ម៉ី សុខារិទ្ធ
កែសម្រួល : លោក សេង ផល្លី
