កាលពីព្រឹកថ្ងៃទី២១ ខែមីនានេះ ហ្វូងមនុស្សជាច្រើនមានទាំងជនជាតិខ្មែរ និងបរទេសបាននាំគ្នាចូលទៅក្នុងបរិវេណនៃប្រាសាទអង្គរវត្ត ចាប់តាំងពីព្រលឹមស្រាងៗ ក្នុងបំណងឈរចាំមើលព្រឹត្តិការណ៍អច្ឆរិយៈដ៏អសា្ចរ្យគឺថ្ងៃរះចំកំពូលកណ្ដាល នៃប្រាសាទអង្គរវត្ត។
ក្រុមមនុស្សដែលក្នុងដៃ មានម៉ាស៊ីនថតរូប និងខ្លះកាន់ទូស័ព្ទដៃរង់ចាំថតជាស្រេចនោះបាននាំគ្នាឈរចាំ ត្រៀបត្រា នៅមុខប្រាសាទអង្គរវត្ត ចាប់តាំងតែពីផ្ទៃមេឃនៅងងឹតមិនទាន់ភ្លឺច្បាស់ម្ល៉េះ។ ក៏ប៉ុន្តែទោះជាយ៉ាងណា ការរង់ចាំរបស់ពួកហាក់ដូចជាអ្វីៗមិនបានសមតាមបំណងដែលខំភ្ញាក់ពីព្រលឹម ហើយរូតរះទៅ កាន់ទីធ្លាមុខប្រាសាទអង្គរវត្តនោះឡើយ ដោយសារតែវេលាម៉ោ ប្រមាណជា ៦និង៣០នាទីព្រឹក នៅចំពេលដែលថ្ងៃរះដល់ចុងកំពូលកណ្ដាលនៃប្រាសាទអង្គរវត្តនោះបែរ ជាផ្ទៃមេឃមានពពកបាំង ធ្វើឱ្យបាត់រាងមូលរបស់ព្រះអាទិត្យព្រមទាំងមិនសូវមានពន្លឺល្អផង។ បើទោះបីយ៉ាងនេះក៏ដោយ ក្រុមនុស្ស នៅតែសប្បាយរីករាយ និងទិដ្ឋភាពថ្ងៃរះ នៅចំកំពូលកណ្ដាលនៃប្រាសាទអង្គរវត្តនេះ ហើយអ្នកខ្លះ បានឱ្យដឹងថាពួកគេនឹងព្យាយាមតាមមើលព្រឹត្តិការណ៍អច្ឆរិយៈនៅអង្គរវត្តនេះ បន្តទៀតនៅថ្ងៃទី២២ ខែមីនា ខាងមុខ។
បុរាណវិទូ និងជាប្រធាននាយកដ្ឋាន អភិរក្សប្រាសាទ ក្នុងឧទ្យានអង្គរនិងបុរាណវិទ្យាបង្ការនៃអាជ្ញាធរជាតិអប្សរា លោក អ៊ឹម សុខរិទ្ធី បាន មានប្រសាសន៍ថា បាតុភូតធម្ម ជាតិនៃប្រព័ន្ធព្រះអាទិត្យ ដែលគេហៅថា «សមរាត្រី » គឺថ្ងៃរះនៅចំកំពូលកណ្ដាលនៃប្រាសាទ អង្គរវត្តនៅ ថ្ងៃទី២១ ខែមីនា គឺជាព្រឹត្តិការណ៍ពិសេសជាពេលវេលា ដែលបែងចែកដំណើរគោចររបស់ព្រះអាទិត្យ រវាងពេលថ្ងៃ និងពេលយប់មានរយៈពេលស្មើគ្នាដោយខុសពីខែធម្ម តាខ្លះរយៈពេលយប់វែងជាងពេលថ្ងៃ ឬក៏រយៈពេលថ្ងៃវែងជាង យប់ហើយ វាគឺជាព្រឹត្តិការណ៍ទូទៅរបស់ផែនដីដែលតែងតែកើតមាននៅក្នុងពិភពលោក។ ក៏ប៉ុន្តែសម្រាប់ប្រាសាទអង្គរវត្ត ដែលមានព្រឹត្តិការណ៍សមរាត្រីនេះ កើតឡើង មិនមែនជារឿងចៃដន្យទេ វាគឺជាលក្ខណៈ ពិសេសរបស់បុព្វបុរសខ្មែរដែលបាន រៀបចំស្ថាបត្យកម្ម ប្លង់របស់ប្រាសាទទុកមុនជាស្រេចដោយបំណងតម្រូវតាមបាតុភូតធម្មជាតិ ឱ្យប្រាសាទអង្គរវត្តបង្កើតចេញជាព្រឹត្តិការណ៍អច្ឆរិយៈ គឺថ្ងៃរះចំកំពូលកណ្ដាលនៃប្រាសាទអង្គរវត្ត នេះឡើងក្នុង១ឆ្នាំពីរដងហើយក៏ប្រហែលជាអច្ឆរិយនេះ កើតមានតែនៅលើ ប្រាសាទអង្គរវត្ត នៃប្រទេសកម្ពុជាតែមួយប៉ុណ្ណោះ ចំណែកឯសំណង់បុរាណជាច្រើន នៅលើប្រទេសដទៃទៀតក្នុងពិភពលោក គឺមិនអាចរៀបចំដូច្នេះបានទេ៕
អត្ថបទ និង រូបភាព៖ លោគ ឈិត សាវី
