ថ្លែងក្នុងពិធីបើកការផ្សព្វផ្សាយខ្លឹមសារអនុសំវច្ឆរមហាសន្និបាតមន្ត្រីសង្ឃស្រុកជីក្រែង លោក តាន់ ប៊ុនឆន អភិបាលរងស្រុកជីក្រែង ខេត្តសៀមរាប បានស្នើដល់អង្គសន្និបាតពិភាក្សា និងចាប់អារម្មណ៍ផ្តោតទៅលើការពង្រឹងរចនាសម្ព័ន្ឋគ្រប់គ្រងការគោរពប្រតិបត្តិធម៌វិន័យរបស់ព្រះសង្ឃ ពិសេសចូលរួមអប់រំសីលធម៌សង្គមដល់យុវជនឱ្យបានខ្លាំងក្លា ដើម្បីទប់ស្កាត់នូវអំពើអសកម្មទាំងឡាយរបស់យុវវ័យដូចជាការប្រើប្រាស់គ្រឿងញៀន អំពើអបាយមុខ និងក្មេងទំនើងក្នុងមូលដ្ឋានជាដើម។ល។ លើសពីនេះត្រូវពិភាក្សាការពង្រឹងការងារអភិបាលកិច្ចគ្រប់លំដាប់ថ្នាក់ ដោយផ្សារភ្ជាច់ទៅនឹងបច្ចេកវិទ្យាទំនើប ដើម្បីឱ្យកិច្ចការព្រះពុទ្ឋសាសនាមានសណ្តាប់ធ្នាប់ល្អ ធានានូវសាមគ្គីភាពផ្ទៃក្នុងជួរពុទ្ឋសាសនិក លុបបំបាត់នូវការបែងចែកនិន្នាការសាសនា ទៅតាមជំនឿដោយគ្មានហេតុផល។
លោកអភិបាលរងស្រុក ក៏បានសំណូមពរដល់សាសនិកទាំងអស់ មេត្តាចូលរួមបំពេញបុណ្យកុសលទាំងឡាយ ដើម្បីជាគុណប្រយោជន៍ដល់ការថែរក្សាការពារសេចក្តីសុខ សន្តិភាព ស្ថេរភាព សាមគ្គីភាព និងចូលរួមលើកស្ទួយការកសាងជាតិ ឆ្ពោះទៅរកសេចក្តីថ្កុំថ្កើងរីកចម្រើនតទៅជានិរន្តរ៍។ លោក មានប្រសាសន៍ថា៖ រដ្ឋធម្មនុញ្ញនៃព្រះរាជាណាចក្រកម្ពុជា មាត្រា៤៣ បានចែងថា ព្រះពុទ្ឋសាសនាជាសាសនារបស់រដ្ឋ ប្រជាពលរដ្ឋទាំងពីរភេទមានសិទ្ឋិនិងសេរីភាពពេញទីខាងជំនឿ និងការប្រតិបត្តិខាងសាសនាត្រូវបានធានាក្នុងលក្ខ័ណ្ឌដែលមិនប៉ហពាល់ដល់ជំនឿឬសាសនាដ៍ទៃទៀត ដល់សណ្តាប់ធ្នាប់និងសន្តិសុខសាធារណៈ ទន្ទឹមនឹងនោះរាជរដ្ឋាភិបាលកម្ពុជាបានផ្តល់សិទ្ឋិសេរីភាពខាងជំនឿ និងផ្តល់លក្ខណៈងាយស្រួលដល់សកម្មភាពនៃជំនឿសាសនាផ្សេងៗផងដែរ ព្រមទាំងរក្សាបាននូវសាមគ្គីភាពរវាងប្រជាជនគ្រប់និន្នាការសាសនានានា ដើម្បីស្ថេរភាពនយោបាយ សន្តិសុខនិងសណ្តាប់ធ្នាប់សង្គម ដោយគ្មានការរើសអើងបណ្តាលមកពីភាពខុសគ្នាខាងជំនឿសាសនានោះឡើយ។ក្នុ
ងរបាយការណ៍របស់ព្រះគ្រូសារធម្មបាល ទេព ភឿន ព្រះអនុគណស្រុកជីក្រែងថា៖ស្រុកនេះមានវត្តចំនួន៣៨វត្ត ក្នុងនោះវត្តគណៈធម្មយុត្តិ១វត្ត មានព្រះសង្ឃចំនួន៥៣៣អង្គក្នុងនោះគណៈធម្មយុត្តិ២អង្គ មានមណ្ឌលវិបស្សនាធុរៈ១កន្លែង និងមានសាលាពុទ្ឋិកបឋមសិក្សាទាំងបីថ្នាក់ចំនួន៩សាលា ដែលមានសមណសិស្សសរុបចំនួន១៨៧អង្គ។ ក្នុងនាមសាលាអនុគណស្រុកព្រះតេជគុណ មានសង្ឃដិកាថា៖ ពិធីផ្សព្វផ្សាយខ្លឹមសារអនុសំវច្ឆរមហាសន្និបាតមន្ត្រីសង្ឃ លើកទី២៩នេះ នឹងនឹងរួមចំណេកពង្រឹងការបដិបត្តិធម៌វិន័យ ពង្រឹងប្រសិទ្ឋភាពនៃការគ្រប់គ្រងដឹកនាំវត្តអារាម ពង្រឹងការងារពុទ្ឋិកសិក្សា និងកិច្ចការមួយចំនួនទៀតដែលមានចែងក្នុងខ្លឹមសារសង្ឃប្រកាសអនុសំវច្ឆរមហាសន្និបាតមន្ត្រីសង្ឃមន្ត្រីសង្ឃលើកទី២៩ ដើម្បីចូលរួមចំនែកបន្តការអនុវត្តកម្មវិធីគោលនយោបាយយុទ្ឋសាស្ត្រចតុកោណរបស់រាជរដ្ឋាភិបាលកម្ពុជា ដើម្បីកំណើនការងារ សមធម៌និងប្រសិទ្ឋភាពនៅកម្ពុជាសំដៅ ធ្វើឱ្យសង្គមជាតិទាំងមូលរក្សាបាននូវសន្តិសុខ ស្ថេរភាពនិងការអភិវឌ្ឍ។
សូមជំរាបថា នៅវត្តបុព្វទិសារាមហៅវត្តកំពង់ក្តី ថ្ងៃទី២១ ខែមីនា ឆ្នាំ២០២២ សាលាអនុគណស្រុកជីក្រែង បានរៀបចំពិធីផ្សព្វផ្សាយខ្លឹមសារអនុសំវច្ឆរមហាសន្និបាតមន្ត្រីសង្ឃ សម្រាប់ស្រុកនេះពេញមួយថ្ងៃ ក្រោមការនិមន្តនិងអញ្ជើញចូលរួមពីព្រះមន្ត្រីសង្ឃខេត្ត ព្រះមន្ត្រីសង្ឃស្រុក អាជ្ញាធរស្រុក អាជ្ញាធរឃុំទាំង១២ មេបញ្ជាការ មេបញ្ជាការរង អធិការនគរបាលស្រុក កងរាជអាវុធហត្ថស្រុក តំបន់ប្រតិបត្តិការសឹករងស្រុក សប្បុរសជន គណៈកម្មការវត្ត សរុបចំនួនជិត២០០អង្គ/នាក់។ ពិធីនេះរៀបចំឡើងដើម្បីលើកយកខ្លឹមសារទាំងស្រុង តាមរយៈសង្ឃប្រកាសដែលសាលាអនុគណស្រុកទទួលបាន ហើយអង្គសន្និបាតបានលើកយករបៀបវារៈយកមកពិភាក្សាដើម្បីឆ្លើយតបទៅនឹងតម្រូវការនៃភាពចាំបាច់ដែលត្រូវអនុវត្តឱ្យខាងតែបាន គឺការរៀបចំរចនាសម្ព័ន្ឋថ្នាក់ដឹកនាំវត្តនៅក្នុងស្រុកជាផ្លូវការឬពេញសិទ្ឋិដើម្បីប្រសិទ្ឋភាពការងារនិងដើម្បីអភិវឌ្ឍធនធានបុព្វជិតឱ្យកាន់តែមានភាពសុក្រិត្យនិងគុណភាពខ្ពស់សំដៅធ្វើឱ្យវិស័យព្រះពុទ្ឋសាសនាមានការរីកចម្រើន៕
អត្ថបទ និង រូបភាព ៖ លោក យូ វង្ស
