ប្រជាពលរដ្ឋប្រមាណជាង២៧០នាក់ នៅឃុំពាក់ស្នែង ស្រុកអង្គរធំ ខេត្ដសៀមរាប ត្រូវបានទទួលការពិនិត្យ ពិគ្រោះ និងព្យាលជំងឺ ដោយមិនគិតថ្លៃ ពីក្រុមគ្រូពេទ្យស្ម័គ្រចិត្ដសម្ដេចពិជ័យសេនា ទៀ បាញ់ ឧបនាយករដ្ឋមន្ដ្រី រដ្ឋមន្ដ្រីក្រសួងការពារជាតិ ។ការពិនិត្យពិគ្រោះ និងព្យាបាលជំងឺនេះ ធ្វើឡើងនៅមណ្ឌលសុខភាពឃុំពាក់ស្នែង ស្រុកអង្គរធំ ខេត្ដសៀមរាប ថ្ងៃទី២៣ ខែមីនា ឆ្នាំ២០២២នេះ។
ឯកឧត្ដម ស ថាវី អនុរដ្ឋលេខាធិការក្រសួងការពារជាតិ មានប្រសាសន៍ថា ប្រជាពលរដ្ឋដែលទៅរកសេវាដោយមិនគិតថ្លៃ ធ្វើឡើងមិនប្រកាន់បក្សពួក និន្នាការនយោបាយ ពណ៌សម្បុរ សាសានាឡើង គឺជាឆន្ទះរបស់ថ្នាក់ដឹកនាំដែលតែងឃើញការលំបាកខ្វះខាតថវិកាទៅរកសេវាសុខភាពឯកជន ក៍ដូចជានៅមណ្ឌលសុខភាព មន្ទីរពេទ្យជាដើម។
ឯកឧត្ដមបានបន្ដថា ការបង្កើតក្រុមគ្រូពេទ្យស្ម័គ្រចិត្ដសម្ដេចពិជ័យសេនានេះ ដើម្បីចុះជួយព្យាបាលប្រជាពលរដ្ឋចំនួន២ខេត្ដរួមមាននៅសៀមរាប និងខេត្ដកោះកុង តាមការណែនាំពីសម្ដេចតេជោនាយករដ្ឋមន្ដ្រីនៃព្រះរាជាណាចក្រកម្ពុជា ក្នុងលើកកំពស់ការព្យាបាលជំងឺពលរដ្ឋដោយមិនគិតថ្លៃ ខណៈដែលជំងឺកូវីដ១៩បាននឹងកំពុងរាតត្បាត។
ឯកឧត្ដម បានបន្ថែមថា ក្រុមគ្រូពេទ្យសម្ដេចពិជ័យសេនានេះ មិនត្រឹមតែជួយពិនិត្យ ព្យាបាល ពិគ្រោះជំងឺ ថែមទាំង និងបានជួយចុះចាក់វ៉ាក់សាំងបង្ការជំងឺកូវីដ១៩ ដល់ប្រជាពលរដ្ឋផងដែរ។
ការអនុវត្ដលើវិស័យសុខភាពនេះ បានបង្ហាញថា ថ្នាក់ដឹកនាំបានយល់ពីការលំបាក ការខ្វះខាតរបស់ប្រជាពលរដ្ឋ ព្រោះថា ពេលខ្លះអ្នកជំងឺជាប់រវល់មិនបានទៅពិនិត្យសុខភាពនៅមន្ទីរពេទ្យជាដើម។ក្រុមគ្រូពេទ្យ ស្ម័គ្រចិត្តសម្ដេច ពិជ័យសេនា ទៀ បាញ់ មានចំនួន២៥នាក់ បានចុះប្រឹក្សា ពិនិត្យ និង ព្យាបាល ជំងឺជូនប្រជាពលរដ្ឋនៅឃុំពាក់ស្នែងបានចំនួនជាង២៧០នាក់ ក្នុងនោះស្រី ១២៨ នាក់ និងកុមារ៩៤ នាក់។ ប្រភេទជម្ងឺព្យាបាលមាន ជម្ងឺទូទៅ ជំងឺ ក្រពះ ពោះ វៀន ជំងឺលើសឈាម ជំងឺទឹកនោមផ្អែម និងជំងឺសន្លាក់។
ឯកឧត្តម ស ថាវី បានពាំនាំនូវប្រសាសន៍ផ្តាំផ្ញើសាកសួរសុខទុក្ខពីសំណាក់ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា, សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ព្រមទាំងថ្នាក់ដឹកនាំទាំងអស់ ឱ្យប្រជាពលរដ្ឋត្រូវអនុវត្តតាមការណែនាំរបស់អាជ្ញាធរ សង្កាត់-ខណ្ឌ និងក្រុមគ្រូពេទ្យ។បន្ថែមពីនេះឯកឧត្តម ក៏បានអំពាវនាវដល់ប្រជាពលរដ្ឋសូមឱ្យយកចិត្តទុកដាក់ថែរក្សាសុខភាពឱ្យបានល្អ និងជាពិសេសអនុវត្តវិធានការការពារពីការឆ្លងជំងឺកូវីដ១៩។ ឯកឧត្តម ក៏បានណែនាំដល់អាជ្ញាធរមូលដ្ឋាន ត្រូវបន្តខិតខំយកចិត្តទុកដាក់ក្នុងការ ចុះអប់រំផ្សព្វផ្សាយ ណែនាំ អំពីវិធានការការពារនៃជំងឺកូវីដ១៩ នៅក្នុងសហគមន៍របស់ខ្លួន ធ្វើយ៉ាងណាដើម្បីទប់ស្កាត់ឱ្យបាននូវការឆ្លងរាលដាលជំងឺកូវីដ១៩ ៕
អត្ថបទ និង រូបភាព៖ បូ សារី
