លោកជំទាវបណ្ឌិតសភាចារ្យ ភឿង សកុណា រដ្ឋមន្ដ្រីក្រសួងវប្បធម៌និងវិចិត្រសិល្បៈ មានប្រសាសន៍ដូច្នេះបន្ទាប់ពីបញ្ចប់កិច្ចប្រជុំពេញអង្គលើកទី៧ នៃគណៈកម្មាធិការសម្របសម្រួលអន្តរជាតិសម្រាប់ការអភិរក្សនិងការលើកតម្លៃព្រះវិហារ (ICC-Preah Vihear)កាលពីរសៀលថ្ងៃទី២២ខែមីនាឆ្នាំ២០២២នៅខេត្តសៀមរាប។លោកជំទាវ មានប្រសាសន៍បន្ថែមថា៖ លទ្ធផលនៃកិច្ចប្រជុំពេញអង្គលើកទី៧ នៃគណៈកម្មាធិការសម្របសម្រួលអន្តរជាតិសម្រាប់ការអភិរក្សនិងការលើកតម្លៃព្រះវិហារ (ICC-Preah Vihear)បានធ្វើបទបង្ហាញជាច្រើន ពីតំបន់រណីយដ្ឋានប្រាសាទកោះកេរ ដើម្បីឱ្យអង្គការយូណេស្កូវាយតម្លៃលើការអភិរក្សនិងអភិវឌ្ឍន៍ដែលអាជ្ញាធរជាតិព្រះវិហារបានអនុវត្ដកន្លងមក។ប្រាសាទដែលបានធ្វើបទបង្ហាញនោះ ការងារអភិរក្សប្រាសាទដងទង់ ប្រាសាទតាមែន ប្រាសាទធំ ប្រាសាទចិន ប្រាសាទក្រចាប់ និងប្រាសាទអណ្ដូងគុក ក្នុងតំបន់បេតិកភណ្ឌប្រាសាទកោះកេរ។ការងារកំណាយបុរាណនៅប្រាសាទថ្មបាយក្រៀម ប្រាសាទក្រចាប់ និងប្រាសាទចិន ក្នុងតំបន់បេតិកភណ្ឌប្រាសាទកោះកេរ។លោកជំទាវបានបន្ដថា អង្គការយូណេស្កូ គ្រោងនឹងប្រកាសលទ្ធផលសម្រេចនៅក្នុងខែមិថុនាខាងមុខនេះ ឬលើសបន្ដិចបន្ដួច អាស្រ័យលើអង្គការយូណេស្កូ ប៉ុន្ដែស្ថិតនៅឆ្នាំ២០២២នេះ ។ជាមួយគ្នានោះដែរ ក្រសួងវប្បធម៌នឹងធ្វើពិធីខួប១៥ឆ្នាំ នៃការដាក់ប្រាសាទព្រះវិហារចូលក្នុងបញ្ជីបេតិកភណ្ឌពិភពលោក នៅខែធ្នូឆ្នាំ២០២៣ខាងមុខផងដែរ ដើម្បីយ៉ាងណាឱ្យប្រាសាទព្រះវិហារសាកសមជាបេតិកភណ្ឌអន្ដរជាតិ។
សូមរំលឹកថា ក្រសួងវប្បធម៌ និងវិចិត្រសិល្បៈ បានបញ្ជូនឯកសារ ស្នើសុំចុះបញ្ជីតំបន់ប្រាសាទកោះកេរ ទៅអង្គការយូណេស្កូរួចហើយ កាលពីខែមករាឆ្នាំ២០២១។ តំបន់ប្រាសាទកោះកេរ ដែលស្នើទៅអង្គការយូណេស្កូ មានផ្ទៃដីទំហំជាង ៨,៧០០ហិកតា ស្ថិតនៅឃុំស្រយ៉ង់ ក្នុងស្រុកគូលែន ដោយគ្របដណ្ដប់ភូមិ៣ គឺភូមិរំចេក ភូមិកោះកេរ និងភូមិស្រយង់ជើង នៃខេត្តព្រះវិហារ។ដោយឡែកប្រាសាទព្រះវិហារ ត្រូវបានចុះបញ្ជីចូលក្នុងបេតិកភណ្ឌពិភពលោកកាលពីឆ្នាំ២០០៨៕កិច្ចប្រជុំពេញអង្គលើកទី ៧ នៃ ICC-Preah Vihear នៅឆ្នាំនេះ បានផ្តោតជាសំខាន់លើការងារមួយចំនួនដូចខាងក្រោម៖
១-ផែនការការងារអភិរក្សគោបុរៈទី ៥ នៃប្រាសាទព្រះវិហារ ដោយអ្នកជំនាញការឥណ្ឌា
២-ការងារជួសជុលស្ពានហាលនៅចន្លោះគោបុរៈទី៤ និងទី៥ នៃប្រាសាទព្រះវិហារ
៣-ការងារជួសជុលជណ្តើរបុរាណខាងជើងក្រោមជំនួយឧបត្ថម្ភហិរញ្ញវត្ថុពីមូលនិធិទូតសម្រាប់ការអភិរក្សវប្បធម៌របស់សហរដ្ឋអាមេរិក
៤-ការងារអភិរក្សប្រាសាទដងទង់ ប្រាសាទតាមែន ប្រាសាទធំ ប្រាសាទចិន ប្រាសាទក្រចាប់ និងប្រាសាទអណ្ដូងគុក ក្នុងតំបន់បេតិកភណ្ឌប្រាសាទកោះកេរ
៥-ការងារកំណាយបុរាណនៅប្រាសាទថ្មបាយក្រៀម ប្រាសាទក្រចាប់ និងប្រាសាទចិន ក្នុងតំបន់បេតិកភណ្ឌប្រាសាទកោះកេរ
៦-ការងារអភិវឌ្ឍធនធានទឹកនៅតំបន់បេតិកភណ្ឌប្រាសាទព្រះវិហារ និងប្រាសាទកោះកេរ
៧-ផែនការគ្រប់គ្រងទេសចរណ៍ក្នុងតំបន់បេតិកភណ្ឌប្រាសាទព្រះវិហារ និងប្រាសាទកោះកេរ។
កិច្ចប្រជុំពេញអង្គលើកទី ៧ នៃ ICC-Preah Vihear បានប្រព្រឹត្តទៅរយៈពេលពេញមួយថ្ងៃប្រកបដោយជោគជ័យ និងទទួលបានអនុសាសន៍ល្អៗពីអ្នកជំនាញការអន្តរជាតិ សម្រាប់ផ្តល់ជូនអាជ្ញាធរជាតិព្រះវិហារ យកទៅអនុវត្តបន្តរយៈពេល ៦ ខែ ខាងមុខទៀត ហើយបានកំណត់យកកិច្ចប្រជុំ ICC-Preah Vihear លើកក្រោយនៅខែកញ្ញា ឆ្នាំ ២០២២។
អត្ថបទ និង រូបភាព៖ យូ វង្ស
