ថ្លែងក្នុងកិច្ចប្រជុំបច្ចេកទេសលើកទី ៣៥ របស់ណៈកម្មាធិការអន្តរជាតិសម្របសម្រួលកិច្ចគាំពារ អភិរក្ស និងអភិវឌ្ឍន៍រមណីដ្ឋានប្រវត្តិអង្គរ ហៅកាត់ថា ICC-Angkor នៅសណ្ឋាគារ សូហ្វី តែលអង្គរ ខេត្តសៀមរាប នៅព្រឹក ថ្ងៃទី២៤ ខែមីនា ឆ្នាំ២០២២នេះ ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ បានសម្ដែងនូវអំណរគុណយ៉ាងជ្រាលជ្រៅ ចំពោះ ICC-ANGKOR រួមជាមួយអ្នកជំនាញការអន្តរជាតិផ្សេងទៀត ដែលជានិច្ចកាលបានគាំទ្រ និងចូលរួមសហការយ៉ាងសកម្ម លើវិស័យអភិវឌ្ឍន៍ទេសចរណ៍នៅកម្ពុជា និងបានសំណូមពរឱ្យ ICC-ANGKOR បន្តចូលរួមគាំទ្រជាមួយ នឹងដំណើរការនៃការអភិវឌ្ឍវិស័យទេសចរណ៍កម្ពុជា ក៏ដូចជាខេត្តសៀមរាបទាំងក្នុងនិងក្រោយពេលវិបត្តិ កូវីដ-១៩ ដើម្បី ឆ្ពោះទៅរក គោលដៅទេសចរណ៍ដែលមានភាពទាក់ទាញ ព្រមទាំងធន់នឹងវិបត្តិ កាន់តែប្រសើរជាមួយ និង ភាពប្រកួតប្រជែងខ្ពស់ផង ។
ឯកឧត្តមបណ្ឌិត ថោង ខុន បន្តថា ក្នុងរយៈពេល ៥ឆ្នាំទៅមុខទៀត ដើម្បីចូលរួមលើដំណើរការស្តារវិស័យទេសចរណ៍កម្ពុជាឡើងវិញ ឱ្យបានចំនួនដូចកាលពីមុនពេលវិបត្តិជំងឺកូវីដ-១៩នោះ ក្រសួងទេសចរណ៍ នឹងបន្តរួមគ្នាជាមួយក្រសួង និង ស្ថាប័នពាក់ព័ន្ធនានា ដើម្បីជំរុញការស្តារនៃវិស័យទេសចរណ៍ ខេត្តសៀមរាប ឱ្យបានកំណើនខ្ពស់ឡើងវិញ ។
ឯកឧត្តមរដ្ឋមន្ត្រីក្រសួងទេសចរណ៍ បញ្ជាក់ទៀតថា គោលដៅទេសចរណ៍ប្រកបដោយគុណភាព សុវត្ថិភាព និងបរិយាប័ន្ន គឺត្រូវបន្តខិតខំអភិវឌ្ឍ និងបង្កើតផលិតផលទេសចរណ៍ថ្មីៗឱ្យបានកាន់តែច្រើនថែមទៀត នៅតាមតំបន់អាទិភាពទាំង៦ ដែល បានកំណត់ក្នុងផែនការមេរួចហើយ ដូចជា តំបន់ឧទ្យានជាតិ ព្រះជ័យវរ្ម័ន-នរោត្តម-“ភ្នំគូលែន” តំបន់ជុំវិញតំបន់ការពារប្រាសាទបន្ទាយស្រី តំបន់ក្រុងសៀមរាបបច្ចុប្បន្ន តំបន់បឹងទន្លេសាប និងតំបន់ទេសចរណ៍សៀមរាបថ្មីជាដើម ៕
ព័ត៌មានជាតិ ថ្មីៗ
អត្ថបទ និង រូបភាព៖ លោក ជា ស្រស់
កែសម្រួលអត្ថបទ ៖ លោក លីវ សាន្ត
