បណ្ដាញវិទ្យាស្ថានសន្តិសុខ និងការពារជាតិអាស៊ាន ដែលហៅកាត់ថា NADI បានបង្ហាញពីលទ្ទផលនៃកិច្ចប្រជុំប្រចាំឆ្នាំលើកទី១៥ និងកិច្ចប្រជុំចង្អៀតលើកទី៦ របស់ខ្លួន ក្នុងរយៈពេល០៣ថ្ងៃ ចាប់ពីថ្ងៃទី២១ ដល់ថ្ងៃទី២៣ ខែមីនា ឆ្នាំ២០២២ កន្លងមកនេះ ដែលទទួលបានលទ្ធផលជោគជ័យខ្ពស់តាមការរំពឹងទុក ខណៈកិច្ចប្រជុំនេះ បានពិភាក្សាលើកិច្ចការងារសំខាន់ៗជាច្រើន ពិសេសទាក់ទងនឹងប្រតិបត្តិនៃ NADI ក៏ដូចជាសកម្មភាពការងារ និងបញ្ហាប្រឈម រយៈពេល១៥ឆ្នាំកន្លងមកក្នុងវិស័យសិក្សាស្រាវជ្រាវទាក់ទងនឹងកិច្ចការងារសន្តិសុខតំបន់ ក្នុងគោលដៅជាគំនិតពិចារណាសម្រាប់កិច្ចប្រជុំរដ្ឋមន្ត្រីការពារជាតិអាស៊ាន តាមរយៈក្រុមការងារឧត្តមមន្ត្រីការពារជាតិអាស៊ាន ។
កិច្ចប្រជុំក៏បានពិភាក្សាផងដែរ លើកិច្ចការងារអាស៊ានយោធា ដែលកម្ពុជាជាម្ចាស់ផ្ទះក្នុងឆ្នាំ២០២២នេះ និងបានពិភាក្សាអំពីតួនាទីនៃនៃ NADI ក្នុងការចូលរួមជាក្រុមគោលគំនិតរួមចំណែកក្នុងការជួយដល់ដំណើរការ នៃADMM និង ADMM-Plus ឆ្នាំ២០២២ផងដែរ ហើយប់តាមការប្រមើលមើលសម្រាប់ដំណើរឆ្ពោះទៅមុខសម្រាប់ NADI ក្នុងការគាំទ្រកិច្ចសហប្រតិបត្តិការការពារជាតិអាស៊ាន បានពិភាក្សាលើការពង្រឹងសមត្ថភាពការងាររបស់NADI ក្នុងការស្រាវជ្រាវ និងអាចសម្រេចបាននូវការចេញផ្សាយ នូវឯកសាររួមដែលបានស្រាវជ្រាវឲ្យក្លាយជាគំនិត សម្រាប់ចូលរួមក្នុងការដោះស្រាយបញ្ហាសន្តិសុខតំបន់ ។
ក្នុងកិច្ចប្រជុំនេះដែរ ស្ថាប័នទាំង១៣ នៃ NADI បានលើកឡើងអំពីបញ្ហាដែលកំពុងកើតមានឡើងពិសេសទាក់ទងនឹងបញ្ហាកូវីដ-១៩ ក៏ដូចជាតួនាទីរបស់យោធាក្នុងការចូលរួមទប់ស្កាត់ការរីករាលដាលនៃវីរុសកូវីដ-១៩ , បញ្ហាសន្តិសុខមិនប្រពៃណី ដូចជាការផ្លាស់ប្តូរអាកាសធាតុ ភាវរកម្ម និងសន្តិសុខតាមបញ្តាញពត៍មានវិទ្យា cyber security និង ជំងឺរាតត្បាតថ្មី ដែលនឹងអាចជះបញ្ហាប្រឈមផលប៉ះពាល់ច្រើនជាងនេះ លើសន្តិសុខក្នុងតំបន់អាស៊ានផងដែរ ក្នុងនោះកិច្ចប្រជុំក៍បានកត់សំគាល់ទៅលើបញ្ហាសង្រ្គាមដែលកំពុងកើតមានរវាងរុស្សី និងអ៊ុយក្រែន និងផលប៉ះពាល់មួយចំនួនលើសន្តិសុខក្នុងតំបន់អាស៊ាន ។
ស្ថាប័នទាំង១៣ ដែលបានចូលរួមក្នុងកិច្ចប្រជុំប្រចាំឆ្នាំលើកទី១៥ និងកិច្ចប្រជុំចង្អៀតលើកទី០៦ នៃបណ្ដាញវិទ្យាស្ថានសន្តិសុខ និងការពារជាតិអាស៊ាន បានបង្ហាញនូវការអបអរសាទរចំពោះប្រទេសកម្ពុជា ដែលបានដឹកនាំកិច្ចប្រជុំដោយជោគជ័យ ទទួលបាននូវសមិទ្ធផលជាច្រើនសម្រាប់ស្ថាប័នNADI ដើម្បីអនុវត្តការងារបន្តនាពេលអនាគត និងកំណត់បាននូវចក្ខុវិស័យច្បាស់លាស់សម្រាប់NADIផងដែរ។
មានប្រសាសន៍ក្នុងឱកាសនេះ លោកជំទាវឧត្តមសេនីយ៍ឯក ណឹម សុវត្តី ប្រធានអង្គប្រជុំ បានបង្ហាញអំពីសារៈសំខាន់នៃការសិក្សាអំពីមូលដ្ឋាននៃសន្តិភាព ការបញ្ចប់សង្រាម និងជម្លោះដោយការចរចារដោយសន្តិវិធី ក៏ដូចជាការដោះស្រាយបញ្ហាកូវីដ-១៩ តាមរយៈការស្រោចវ៉ាក់សាំងក្នុងប្រទេសតាមយុទ្ធសាស្ត្រ និងយុទ្ធវិធីដឹកនាំផ្ទាល់របស់សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ស្របតាមអនុសាសន៍ណែនាំដ៏ខ្ពង់ខ្ពស់របស់សម្ដេចតេជោ ហ៊ុន សែន នាយករដ្ឋមន្ត្រីនៃប្រទេសកម្ពុជា ពិសេសអំពីតួនាទីយោធាក្នុងការរួមចំណែកក្នុងការបញ្ចប់សង្គ្រាមស៊ីវិលនៅកម្ពុជា ស្ដែងតាមរយៈបទពិសោធន៍ក្នុងការអនុវត្តនយោបាយឈ្នះ ឈ្នះ ក្រោមការដឹកនាំរបស់សម្ដេចតេជោ ជាស្ថាបនិកនៃនយោបាយនេះដែលបាននាំកម្ពុជាឲ្យទទួលបានសន្តិភាព និងការឯកភាពជាតិពេញលេញ និង ការដោះស្រាយជម្លោះដោយសន្តិវិធី ។
គួររំលឹកថា ក្នុងកិច្ចប្រជុំប្រចាំឆ្នាំលើកទី១៥ និងកិច្ចប្រជុំចង្អៀតលើកទី៦ នៃ NADI នេះ ក៏មានការចូលរួមផ្លាស់ប្ដូរទស្សនៈពីសំណាក់ប្រធានវិទ្យាស្ថានចក្ខុវិស័យអាស៊ី ដែលបានលើកឡើងអំពីស្ថានភាពសន្តិសុខនៅក្នុងតំបន់អាស៊ាន និងការសិក្សាអំពីបញ្ហាក្នុងតំបន់អាស៊ាន ជាការសិក្សាអំពីបញ្ហារួម ដោយបានគូសបញ្ជាក់ជាឧទាហរណ៍ជាក់ស្ដែងអំពីបញ្ហាដែលកំពុងកើតមាននៅក្នុងប្រទេសមីយ៉ាន់ម៉ា ជាបញ្ហារួមរបស់អាស៊ាន ដែលប្រទេសជាសមាជិកបានខិតខំស្វែងរកដំណោះស្រាយសម្រាប់បញ្ហានេះ ដោយបានចេញនូវគោលការណ៍៥ចំណុច និងសម្រេចឲ្យមានបេសកកម្មពិសេសរបស់អាស៊ាន សម្រាប់ដោះស្រាយបញ្ហានេះផងដែរ ៕
អត្ថបទ និង រូបភាព៖ លោក យូ វង្ស
កែសម្រួលអត្ថបទ ៖ លោក លីវ សាន្ត
