ក្បាលដីចំនួន ២ ៩៧៨ក្បាលដី ស្ថិតនៅក្នុងភូមិព្រះត្រពាំង ភូមិអូររលុះ និង ភូមិត្របែក ក្នុងឃុំដំដែក ស្រុកសូទ្រនិគម ខេត្តសៀមរាប ត្រូវបានបិទផ្សព្វផ្សាយជាសាធារណៈ នូវឯកសារការវិនិច្ឆ័យក្បាលដី ស្ថិតនៅក្នុងបរិវេណវត្តត្របែកឯករង្សី ដែលមានរយៈពេល ១៥ថ្ងៃ គឺចាប់ពីថ្ងៃទី២៥ ខែមីនា ដល់ថ្ងៃទី០៨ ខែមេសា ឆ្នាំ២០២២ ដោយគិតរួមទាំងថ្ងៃបុណ្យនឹងថ្ងៃឈប់សំរាក។
លោក ម៉ក ប្រុស អភិបាលស្រុកសូទ្រនិគម តំណាងដ៏ខ្ពង់ខ្ពស់ ឯកឧត្តម ទៀ សីហា អភិបាលខេត្តសៀមរាប លើកឡើងថា ការចុះបញ្ជីដីធ្លីមានលក្ខណៈជាប្រព័ន្ធនេះ ធ្វើឱ្យអាជ្ញាធរ មានភាពងាយស្រួលក្នុងការគ្រប់គ្រងដីទាំងដីរដ្ឋ និងដីឯកជន ធានាសុវត្តិភាពក្នុងការកាន់កាប់ដីរបស់ប្រជាពលរដ្ឋ។ ការរៀបចំធ្វើពិធីបិទផ្សាយជាសាធារណៈ នូវឯកសារនៃការវិនិច្ឆ័យក្បាលដីនាពេលនេះ គឺតម្រូវឱ្យបងប្អូនប្រជាពលរដ្ឋ ជាម្ចាស់ដី ព្រមទាំងស្ថាប័ន និងអង្គភាពពាក់ព័ន្ធទាំងអស់ មកចូលរួមពិនិត្យផ្ទៀងផ្ទាត់មើលទិន្នន័យនេះឱ្យបានគ្រប់ៗគ្នា ដើម្បីធានាបាននូវភាពសុក្រឹត្យត្រឹមត្រូវ ក្នុងការចេញវិញ្ញាបនប័ត្រសម្គាល់ម្ចាស់អចលនវត្ថុ។
លោក ហ៊ី សាយ ប្រធានមន្ទីររៀបចំដែនដី នគរូបនីយកម្ម និងសំណង់ខេត្តសៀមរាប បញ្ជាក់ថា ចំពោះការចុះបញ្ជីដីធ្លីមានលក្ខណៈជាប្រព័ន្ធ គឺយោងតាមអនុក្រឹត្យលេខ៤៦ អនក្រ, បក ចុះថ្ងៃទី៣១ ខែឧសភា ឆ្នាំ២០០២ ស្តីពីនីតិវិធីនៃការកសាងប្លង់សុរិយោដី និងសៀវភៅគោលបញ្ជីដីធ្លី និងសារាចរណែនាំលេខ ០១ ដនស សដ ចុះថ្ងៃទី ១៩ ខែសីហា ឆ្នាំ ២០០២ អនុវត្តនីតិវិធីនៃការកសាងប្លង់សុរិយោដី និងសៀវភៅគោលបញ្ជីដីធ្លី។ លោកបន្ថែមថា ការចុះបញ្ជីដីធ្លីមានលក្ខណៈជាប្រព័ន្ធសម្រាប់ខេត្តសៀមរាប នារយៈកាលកន្លងមក មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាបបានធ្វើការបិទផ្សាយ និងចេញប័ណ្ណរួចចំនួន ៨៦ភូមិ រួមមាន៖
១.ក្រុងសៀមរាបបានចំនួន ០៩សង្កាត់ សរុប ៥៣ភូមិ ,
២.ស្រុកប្រាសាទបាឝងបានចំនួន ០៣ឃុំសរុប ០៦ភូមិ,
៣.ស្រុកក្រឡាញ់បានចំនួន ០១ឃុំ សរុប ០៨ភូមិ ក្នុងនោះ ០៦ភូមិចេញប័ណ្ណរួចរាល់ និង០២ភូមិកំពុងបិទផ្សាយ។
៤.ស្រុកពួកបានចំនួន ០១ឃុំ សរុប ០៦ភូមិ
និង៥. ស្រុកសូទ្រនិគមបានចំនួន ០១ឃុំសរុប ១៣ភូមិ ដែរ១០ភូមិចេញប័ណ្ណរួចហើយ និង០៣ភូមិកំពុងបិទផ្សាយ។ សំរាប់ក្បាលដីដែលត្រូវយកមកធ្វើការបិទផ្សាយនាពេលនេះ គឺមានចំនួន ២.៩៧៨ក្បាលដី គឺស្ថិតក្នុងភូមិព្រះត្រពាំងមានចំនួន ៩១០ក្បាលដី ភូមិត្របែក មានចំនួន ១.១៨៨ក្បាលដី និងភូមិអូររលុះមានចំនួន ៨៨០ក្បាលដី៕
លោកប្រធានមន្ទីរ ក៏បានអំពាវនាវដល់បងប្អូនប្រជាពលរដ្ឋក្នុងភូមិទាំង៣ នៃឃុំដំដែក សូមបន្តផ្សព្វផ្សាយដល់ម្ចាស់ក្បាលដីទាំងអស់ មកពិនិត្យឱ្យបានទាន់ពេលវេលា ដើម្បីចៀសវាងកំហុសនៅពេលចេញវិញ្ញាបនប័ត្រសម្គាល់ម្ចាស់អចលនវត្ថុ បន្ទាប់ពីការបិទបញ្ចប់ការផ្សព្វផ្សាយជាសាធារណៈ នូវឯកសារការវិនិច្ឆ័យក្បាលដី រយៈពេល១៥ថ្ងៃនេះ។
អត្ថបទ និង រូបភាព ៖ លោក ធន់ ពូថេ
កែសម្រួលអត្ថបទ ៖ លោក សេង ផល្លី
