នៅព្រឹកថ្ងៃទី១ ខែមេសា ឆ្នាំ២០២២នេះ អាជ្ញាធរខេត្តសៀមរាប សហការជាមួយអាជ្ញាធរក្រុងសៀមរាប និងសហភាពសហពន្ឋ័យុវជនកម្ពុជាខេត្ត រួមជាមួយក្រុមការងារយុវជនសាខាកាកបាទក្រហមកម្ពុជាខេត្ត លោកគ្រូអ្នកគ្រូ និងសិស្សានុសិស្ស បានរួមគ្នាធ្វើយុទ្ឋនាការបោសសម្អាតអនាម័យបរិស្ថានតាមគោលដៅ និងដងផ្លូវសំខាន់ៗក្នុងក្រុងសៀមរាប ដើម្បីលើកកម្ពស់សោភ័ណភាពក្រុងសៀមរាប និងដើម្បីអបអរសាទរនូវសមិទ្ឋផលហេដ្ឋារចនាសម្ព័ន្ឋផ្លូវចំនួន៣៨ខ្សែ ដែលបានសាងសង់រួចរាល់ជាស្ថាពរ ហើយគ្រោងនឹងសម្ពោធដាក់ឱ្យប្រើប្រាស់ជាផ្លូវការ នៅថ្ងៃទី៤ ខែមេសា ឆ្នាំ២០២២ខាងមុខនេះ ក្រោមអធិបតីភាពដ៍ខ្ពង់ខ្ពស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និង សម្តេចកិត្តិព្រឹទ្ឋបណ្ឌិត ប៊ុន រ៉ានី ហ៊ុនសែន ។
លោក នួន ពុទ្ឋារ៉ា អភិបាលក្រុងសៀមរាប មានប្រសាសន៍ថា ក្រោមគំនិតផ្តួចផ្តើមរបស់ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប ថ្ងៃនេះយើងរួមគ្នាបើកយុទ្ឋនាការបោសសម្អាតអនាម័យបរិស្ថានតាមគោលដៅ និងដងផ្លូវសំខាន់ៗក្នុងក្រុង ដើម្បីបង្ហាញពីភាពស្រឡាញ់បរិស្ថានស្អាត សមជាកូនចៅរបស់ដូនតាខ្មែរសម័យអង្គរ និងពង្រីកនូវគំនិតស្រឡាញ់បរិស្ថាន ដែលជាអត្តសញ្ញារបស់សៀមរាបផ្ទះខ្ញុំឱ្យកាន់តែធំទូលាយ ទៅ ពិសេសគឺការអបអរសាទរនូវសមិទ្ឋផលហេដ្ឋារចនាសម្ព័ន្ឋផ្លូវចំនួន៣៨ខ្សែ ដែលបានសាងសង់រួចរាល់ជាស្ថាពរ ហើយគ្រោងនឹងសម្ពោធដាក់ឱ្យប្រើប្រាស់ជាផ្លូវការ នៅថ្ងៃទី៤ ខែមេសា ឆ្នាំ២០២២ខាងមុខនេះ ក្រោមអធិបតីភាពដ៍ខ្ពង់ខ្ពស់សម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជា ។
លោក នួន ពុទ្ឋារ៉ា បន្តថា សមិទ្ធផលទាំងអស់នេះ នឹងប្រែក្លាយក្រុងសៀមរាបនេះ ឱ្យក្លាយទៅជាទីក្រុងដ៏ទំនើប ពោរពេញដោយសោភ័ណភាព បរិស្ថានល្អ សម្រាប់ការរស់នៅ ឱ្យសក្ដិសមជាទីក្រុងទេសចរណ៍ វប្បធម៌ និងប្រវត្តិសាស្ត្រ អាចទាក់ទាញភ្ញៀវទេសចរណ៍បានកាន់តែច្រើន សំដៅលើកស្ទួយសេដ្ឋកិច្ចជាតិឱ្យកាន់តែមានការរីកចម្រើន ព្រមទាំងធ្វើឱ្យប្រសើរឡើងដល់ការតភ្ជាប់ពីទីប្រជុំជនក្រុងសៀមរាបទៅកាន់តំបន់ដាច់ស្រយាលផងដែរ ដូច្នេះក្នុងឱកាសនេះ សូមអំពាវនាវឱ្យបងប្អូនប្រជាពលរដ្ឋទាំងអស់ ត្រូវរួមគ្នាថែរក្សាទ្រព្យសម្បត្តិនេះឱ្យបានគង់វង្ស ដើម្បីទទួលភ្ញៀវទេសចរណ៍ជាតិ និងអន្តរជាតិ ក្នុងឱកាសពិធីបុណ្យចូលឆ្នាំថ្មីប្រពៃណីជាតិ នាពេលខាងមុខនេះ ។
មានប្រសាសន៍ក្នុងឱកាសនោះ ឯកឧត្តម គុជ លីណា សមាជិកក្រុមប្រឹក្សាខេត្ត បានបង្ហាញនូវមោទនភាពដែលក្រុងសៀមរាបទទួលបាននូវហេដ្ឋារចនាសម្ព័ន្ឋផ្លូវ៣៨ខ្សែ ជាកាដូដ៍ពិសេសពីប្រមុខដឹកនាំរាជរដ្ឋាភិបាលកម្ពុជា ដូច្នេះក្នុងនាមក្រុមប្រឹក្សាខេត្ត រដ្ឋបាលខេត្តនិងប្រជាពលរដ្ឋក្នុងខេត្តសៀមរាប សូមថ្លែងអំណរអរគុណយ៉ាងជ្រាលជ្រៅបំផុត នូវគុណូបការៈដ៍ថ្លៃថ្លារបស់សម្តេចតេជោ ហ៊ុន សែន បើទោះបីកម្ពុជារងនូវផលប៉ះពាល់ដោយសារការីករាលដាលនៃជំងឺកូវីដ-១៩ ដែលបានបណ្តាលឱ្យចរន្តសេដ្ឋកិច្ចទូទាំងប្រទេសថយចុះនូវប្រាក់ចំណូលក៏ដោយ តែសម្តេចតេជោ ហ៊ុន សែន នៅតែពុះពារសម្រេចចិត្តផ្តល់នូវកញ្ចប់ថវិកាកសាងនូវហេដ្ឋារចនាសម្ព័ន្ឋផ្លូវចំនួន៣៨ខ្សែ និងប្រព័ន្ឋលូបង្ហូរទឹក កែលម្អដងស្ទឹងសៀមរាប និងកែលម្អស្ថាបនាឱ្យមានផ្លូវសម្រាប់ថ្មើជើង ផ្លូវជិះកង់ និងជំរាលសម្រាប់ជនមានពិការភាពទៀតផង ។
ឯកឧត្តម មានប្រសាសន៍ទៀតថា៖សមិទ្ឋផលដ៍ធំធេងនិងថ្លៃថ្លាដែលសម្តេចតេជោប្រគល់ឱ្យនេះ គឺជាការខិតខំប្រឹងប្រែងរបស់រដ្ឋបាលខេត្ត ក្រុង និងមន្ទីរអង្គភាពពាក់ព័ន្ឋក្នុងខេត្ត ដោយមានការសម្របសម្រួលពីក្រសួងពាក់ព័ន្ឋ និងទទួលបានការផ្តល់ជាមតិយោបល់របស់សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិនិងជាប្រធានក្រុមការងាររាជរដ្ឋាភិបាលចុះជួយមូលដ្ឋានខេត្តសៀមរាប ហេតុនេះសូមអំពាវនាវនិងសំណូមពរដល់ប្រជាពលរដ្ឋ ជាពិសេសអាជីករ និងម្ចាស់អាជីវកម្មដ្ឋាននានាដែលកំពុងប្រកបអាជីវកម្មតាមបណ្តាដងផ្លូវសំខាន់ៗក្នុងក្រុងដូចជា ភោជនីយដ្ឋាន សណ្ឋាគារ ផ្ទះសំណាក់និងលំនៅដ្ឋានឯកជនក្តី សូមចូលរួមសំអាតជាប្រចាំដោយការបោសសំអាតនិងវេចខ្ចប់សំណល់សម្រាមដាក់ទៅតាមធុងតាមគោលដៅនិងរួសរាន់បញ្ចេញសម្រាមទៅតាមម៉ោងកំណត់ដែលអាជ្ញាធរក្រុងនិងមន្ទីរបរិស្ថានបានកំណត់ ពោលគឺក្នុងក្រុងត្រូវប្រមូលសំរាមដាក់ក្នុងធុងនៅពេលយប់ ៕
អត្ថបទ និងរូបភាព៖ លោក យូ វង្ស
កែសម្រួលអត្ថបទ ៖ លោក លីវ សាន្ត
