នាព្រឹកថ្ងៃទី១ ខែមសា ឆ្នាំ២០២២នេះ នៅខេត្តសៀមរាបមានរៀបចំ ទិវាអប់រំកាយថ្នាក់ជាតិលើកទី២ ស្ថិតនៅពហុកីឡដ្ឋានខេត្ដសៀមរាប ភូមិជ្រៃ ឃុំកណ្ដែក ស្រុកប្រាសាទបាគង ខេត្ដសៀមរាប ដែលមានការចូលរួមពីសិស្សានុសិស្សប្រមាណជាង៤រយនាក់ មកពីសាលាបឋមសិក្សាចំនួន៣ ក្នុងក្រុងសៀមរាប រួមមានសាលាបឋមសិក្សាវត្ដរាជបូព៌ សាលាបឋមសិក្សាមុខនាគ និងសាលាបឋមសិក្សាវត្ដចក។
លោក បឹង គឹមតោ ប្រធាននាយកដ្ឋាន អប់រំកាយ និងកីឡាសិស្យ និស្សិត នៃក្រសួង អប់រំ យុវជន និងកីឡា លើកឡើងថា ទិវាអប់រំកាយថ្នាក់ជាតិ មានសារៈសំខាន់ណាស់សម្រាប់សិស្សានុសិស្ស ដែលមានគោលបំណងចំនួន៣ ទី១បង្ហាញពីលទ្ធផលនៃកាសិក្សារបស់កុមារលើមុខវិជ្ជាអប់រំកាយ ទី២ រីករាយ នឹងវប្បធម៌កីឡាទាំងអស់គ្នា និងទី៣ពង្រឹងសម្ព័ន្ធភាពរវាងសហគមន៍ និងសាលារៀន ក៏ដូចជាចង់បង្ហាញដល់សាធារណជនថា ក្រោយពីកុមារបានបញ្ចប់ការសិក្សាពីមួយឆ្នាំទៅមួយឆ្នាំ បានផ្លាស់ប្ដូរ និងផ្ដល់ឱ្យពួកគេនូវបទពិសោធន៍ពីសហគមន៍ ទៅក្នុងសាលារៀន ។
លោក បឹង គឹមតោ បានរំលឹកផងដែរថា ចំពោទិវាអប់រំកាយថ្នាក់ជាតិលើកទី១ ត្រូវបានរៀបចំឡើងនៅខេត្តកំពត ហើយនៅឆ្នាំ២០២២ ជាឱកាសសម្រាប់សិស្សានុសិស្សក្នុងខេត្តសៀមរាបបានចូលរួម និងសម្ដែងសមត្ថភាពរបស់ពួក។ លោកបន្ថែមថា សកម្មភាពនៃការធ្វើទិវាអប់រំកាយនេះ គឺសិស្សានុសសិស្ស នឹងធ្វើសកម្មភាពផ្សេងៗដូចជា ការសម្តែងរួមគ្នា ៦ចលនា និងត្រាប់តាមរុក្ខជាតិ ថ្នាក់ទី៤ ការសម្តែងរួមគ្នា ចលនាកាយសមស្រប៥ចលនា ថ្នាក់ទី៥ ការសម្តែងរួមគ្នា ដើរមួយកន្លែង ឈានតាមចង្វាក់ តម្រង់ជួរ ២ទៅ៤ និង ៤ទៅ៨ជួរ ថ្នាក់ទី៦ ព្រមជាមួយវិញ្ញាសា បោះបាល់ចូលកន្រ្តកថ្នាក់ទី១ វិញ្ញាសារត់ប្រណាំងថ្នាក់ទី ២ វិញ្ញាសា រត់ទៅមកថ្នាក់ទី១ វិញ្ញាសា លោតម៉ឹកថ្នាក់ទី២វិញ្ញាសាលោតបាវថ្នាក់ទី៣ វិញ្ញាសា លោតអន្ទាក់ថ្នាក់ទី ៤ វិញ្ញាសារត់បណ្តាក់ថ្នាក់ទី៣ វិញ្ញាសារត់កាត់ឧបសគ្គថ្នាក់ទី៥ និងវិញ្ញាសាខ្យល់ព្យុះថ្នាក់ទី៦។
លោកបឹង គឹមតោ ក៏បានអំពាវនាវដល់លោកគ្រូអ្នកគ្រូ និងសិស្សានុសិស្សទាំងអស់ សូមបន្តរៀបចំទិវាអប់រំកាយឱ្យបានគ្រប់សាលារៀន ដើម្បីបង្កើតនូវទំនាក់ទំនងគ្នាល្អ រវាងសាលារៀនមួយទៅសាលារៀនមួយទៀត នៅក្នុងតំបន់ និង បង្ហាញពីការខិតខំសិក្សារបស់សិស្សក្នុងរយៈពេល១ឆ្នាំទៅមួយឆ្នាំ។
អត្ថបទ និងរូបភាព៖ លោក បូ សាវី
កែសម្រួលអត្ថបទ ៖ លោក សេង ផល្លី
