មានវត្តមានដ៏ខ្ពង់ខ្ពស់នៅការដ្ឋានសាងសង់អាកាសយានដ្ឋានអន្តរជាតិសៀមរាប-អង្គរកម្រិត4E ក្នុងឃុំតាយ៉ែក ស្រុកសូទ្រនិគម ខេត្តសៀមរាប ព្រឹកថ្ងៃទី៣ ខែមេសា ឆ្នាំ២០២២នេះ សម្ដេចតេជោ ហ៊ុន សែន បានប្រកាសជាឱឡារិកនៅថ្ងៃនេះថា ខេត្តសៀមរាប ជាតារារះនៅទិសឧត្តរ ដែលកន្លងមកកម្ពុជាមានរួចមកហើយនូវតារារះទិសនិរតី។
ថ្លែងក្នុងពិធីជួបសំណេះសំណាលជាមួយ ថ្នាក់ដឹកនាំ បុគ្គលិក កម្មករ នៃក្រុមហ៊ុនអង្គរអ៊ិនធើណេសិនណល អ៊ែរផត អ៊ិនវេសម៉ិន ( ខេមបូឌា ) (ឯ.ក) ដែលទទួលសាងសង់អាកាសយានដ្ឋានអន្តរជាតិសៀមរាប-អង្គរ សម្ដេចតេជោ ហ៊ុន សែន លើកឡើងថា ដោយសារតែការអភិវឌ្ឍសំខាន់ និងជាប៉ូលសេដ្ឋកិច្ចទី៣ របស់ប្រទេសកម្ពុជា ញ៉ាំងឱ្យខេត្តសៀមរាបជាទីតាំងសំខាន់តភ្ជាប់រវាងរាជធានីភ្នំពេញ ទៅកាន់ខេត្តបន្ទាយមានជ័យ និងខេត្តបាត់ដំបង ខណៈហេដ្ឋារចនាសម្ព័ន្ធកាន់តែមានភាពល្អប្រសើរ និងសមិទ្ធផលដ៏សំបើមគឺ អាកាសយានដ្ឋានអន្តរជាតិខ្នាតយក្សក្នុងខេត្តសៀមរាប ដែលអាចគ្របដណ្ដប់តំបន់ឧត្តរ រួមមាន ខេត្តសៀមរាប ឧត្តរមានជ័យ កំពង់ធំ និងមួយផ្នែកទៀតគឺខេត្តព្រះវិហារ ដែលអាកាសយានដ្ឋានអន្តរជាតិនេះ អាចទទួលអ្នកដំណើរនៅទូទាំងពិភពលោក ហោះហើរត្រង់មកាន់ប្រទេសកម្ពុជា ប្រមាណ ៧លាននាក់ក្នុងឆ្នាំនៅដំណាក់ទី១។ សម្ដេចរំលឹកថា កន្លងមកមុនវិបត្តិជំងឺកូវិដ កម្ពុជាបានទទួលអ្នកទេសចរចំនួនជិត ៧លាននាក់ បើពុំមានវិបត្តិជាសកលនេះទេ មកដល់ពេលនេះកម្ពុជាអាចទទួលបានជិត១០លាននាក់ទៅហើយ។
សម្ដេចតេជោ បញ្ជាក់ថា ការសម្រេចបានសមិទ្ធផលធំៗជាបន្តបន្ទាប់នេះ គឺមិនមែនជាការចៃដន្យទេ គឺមកពីយើងរក្សាបាននូវសន្តិភាព។
ព័ត៌មានជាតិ ថ្មីៗ
ទន្ទឹមនោះ តាមការប៉ាន់ស្មាន សម្ដេចតេជោ មើលឃើញថា នៅជុំវិញបរិវេណអាកាសយានដ្ឋានអន្តរជាតិសៀមរាបថ្មីនេះ អាចនឹងមានការបង្កើតក្រុងរណបថ្មីមួយទៀត ដែលជាទីតាំងអភិវឌ្ឍតំបន់លំនៅឋាន និងពាណិជ្ជកម្មនាពេលអនាគត។ ជាមួយនេះ សម្ដេចបានណែនាំដល់ អង្គភាពពាក់ព័ន្ធត្រូវបន្តធ្វើការដោះស្រាយ បញ្ហាផ្គត់ផ្គង់ទឹកស្អាត ចរន្តអគ្គិសនី និងហេដ្ឋារចនាសម្ព័ន្ធបន្ថែមទៀត។
គួរជម្រាបថា គម្រោងអាកាសយានដ្ឋានអន្តរជាតិសៀមរាប-អង្គរ គ្រោងនឹងបញ្ចប់ការសាងសង់នៅថ្ងៃទី៣០ ខែមីនា ឆ្នាំ២០២៣ និងដំណើរការសាកល្បង ជាលើកដំបូងនៅខែតុលា ឆ្នាំ២០២៣។ អាកាសយានដ្ឋានអន្តរជាតិសៀមរាប-អង្គរនេះដែរ មានចម្ងាយប្រហែល ៤០គ.ម ពីរមណីយដ្ឋានអង្គរ និង៥០គ.ម ពីទីប្រជុំជនក្នុងក្រុងសៀមរាប។
អត្ថបទ : សេង ផល្លី
