នាព្រឹកថ្ងៃទី០២ ខែមេសា ឆ្នាំ២០២២នេះ រដ្ឋបាលខេត្តសៀមរាប សហការជាមួយសហភាពសហព័ន្ឋយុវជនកម្ពុជាខេត្ត បានរៀបចំពិធីសែនក្រុងពាលី នៅព្រះវិហារព្រះអង្គចេក ព្រះអង្គចម ដើម្បីបួងសួងសុំសេចក្តីសុខសប្បាយ ក្នុងឱកាសរៀបចំព្រឹត្តិការណ៍សៀមរាប-សង្ក្រាន្ត អបអរសាទរបុណ្យចូលឆ្នាំប្រពៃណីជាតិខ្មែរ ដែលនឹងឈានមកដល់នាពេលខាងមុខនេះ ក្រោមអធិបតីភាព ឯកឧត្តម ទៀ សីហា អភិបាល នៃគណ:អភិបាលខេត្តនិងលោកជំទាវ ឯកឧត្តម អ៊ាន ឃុន ប្រធានក្រុមប្រឹក្សាខេត្ត ដោយមានការចូលរួមពីសំណាក់ឯកឧត្ដម លោកជំទាវ លោក លោកស្រី ជាអភិបាលរងខេត្ត , ប្រធានសហភាពសហព័ន្ធយុវជនកម្ពុជាខេត្ត , អាជ្ញាធរជាតិអប្សរា ថ្នាក់ដឹកនាំស្ថាប័ន មន្ទីរ អង្គភាពនានាក្នុងខេត្ត និងមន្ត្រីអ្នកមុខអ្នកការសំខាន់ៗ ជាច្រើនរូបទៀត ។
គួររំលឹកថា សៀមរាប-សង្ក្រាន្ត ធ្លាប់បានរៀបចំឡើងជាលើកដំបូងនៅឆ្នាំ២០១៩ បន្តពីមហាព្រឹត្តិការណ៍អង្គរ-សង្ក្រាន្ត ដែលបានរៀបចំអស់រយ:ពេល៦ឆ្នាំជាប់ៗគ្នាកន្លងមក ដោយសហភាពសហព័ន្ឋយុវជនកម្ពុជា ក្រោមដឹកនាំរបស់ឯកឧត្តម ហ៊ុន ម៉ានី គឺដើមី្បរឹតចំណងមិត្តភាព សាមគ្គីភាពរវាងប្រជាជាតិខ្មែរ និង ប្រជាជាតិលើសកលលោក និងទាក់ទាញឱ្យមានការចូលរួមពីសំណាក់ភ្ញៀវទេសចរជាតិ និងអន្តរជាតិផងដែរ ដើម្បីបន្តពង្រីកកិត្យានុភាពជាតិខ្មែរ លើឆាកអន្តរជាតិ។ ប៉ុន្តែសៀមរាប-សង្ក្រាន្ត នេះត្រូវបានអាក់ខានវិញអស់រយ:ពេលពីរឆ្នាំ ដោយសារការឆ្លងរីករាលដាលជាសកលនៃជំងឺកូវីដ-១៩ បានឆ្លងចូលដល់សហគមន៍យ៉ាងច្រើនរហូតដល់មានការបិទខ្ទប់ក្រុង ស្រុក និងខេត្តទាំងមូលក៏មាន ។
ការរៀបចំនូវព្រឹត្តិការណ៍សៀមរាប-សង្ក្រាន្តឡើងវិញនេះ អនុលោមទៅលើស្ថានភាពល្អប្រសើរដោយសាររាជរដ្ឋាភិបាល បានផ្តល់ការចាក់វ៉ាក់សាំងការពារប្រឆាំងនឹងកូវីដ-១៩ ជូនពលរដ្ឋបានស្ទើរតែ១០០% ទាំងដូសមូលដ្ឋាន និងដូសជំរុញ។ ជាមួយនោះ ស្របពេលដែលស្ថានភាព នៃការរីករាលដាលនៃជំងឺកូវីដ-១៩ មានសភាពស្ងប់ស្ងាត់ រាជរដ្ឋាភិបាលកម្ពុជា ក៏បានបើកប្រទេសឡើងវិញ នៅចុងឆ្នាំ២០២១កន្លងទៅ ដើម្បីបើកផ្លូប និងធ្វើឱ្យកំណើនសេដ្ឋកិច្ចជាតិ វិលទៅរកប្រក្រតីភាពឡើងវិញ។
កម្មវិធីសៀមរាប-សង្ក្រាន្តនេះ នឹងប្រព្រឹត្តទៅ ចាប់ពីថ្ងៃទី១២-១៦ ខែមេសា ឆ្នាំ២០២២ខាងមុខនេះ ដោយមានរៀបចំចំនួន២គោលដៅ គឺ ៖ គោលដៅទី១ នៅដងស្ទឹងក្នុងក្រុងសៀមរាប ដោយមានកម្មវិធីជិះទូកកម្សាន្ត ពិព័រណ៍ម្ហូបអាហារ ផ្សារបណ្តែតទឹក តន្រ្តីស្គរដៃ ការសម្តែងសិល្ប: និងការប្រគុំតន្រ្តីខ្នាតយក្សពីរកន្លែង និងទី២ ដែលអ្នករៀបចំប្រសិទ្ធនាមថា ភូមិសង្ក្រាន្ត នឹងត្រូវធ្វើនៅប្រាសាទចៅសាយទេវតា និងប្រាសាទធម្មនន្ន ជិតក្រុងអង្គរធំ ដែលមានពិធីបួងសួងសុំ សេចក្តីសុខ ពិធីទទួលទេវតាឆ្នាំថ្មី ពិធីពួនភ្នំខ្សាច់ និងរួមមានការរៀបចំជាភូមិខ្ញុំ មានលេងល្បែងប្រជាប្រីយ៍ និងការសម្តែងល្ខោនបាសាក់ ដែលតម្រូវឱ្យអ្នកចូលរួមកម្សាន្ត ស្លៀកសម្លៀកបំពាក់ប្រពៃណីខ្មែរ ដូចជាហូល ផាមួង អាវប៉ាក់ ខោចែវ ជាដើម ដើម្បីនាំគ្នាលើកតម្លៃវប្បធម៌ប្រពៃណីជាតិខ្មែរ ព្រោះថា ការស្លៀកពាក់បុរាណនេះ កូនខ្មែរយើង នឹងនឹកឃើញដល់ប្រវត្ដិសាស្ដ្រវប្បធម៌ខ្មែរនាសម័យអង្គរ ៕
អត្ថបទ និងរូបភាព៖ លោក យូ វង្ស កែសម្រួលដោយ លោកលីវ សុខុន!!!
