រដ្ឋមន្ត្រីក្រសួងសុខាភិបាលកម្ពុជា អះអាងថា នៅឆ្នាំបន្តបន្ទាប់ខាងមុខនេះ ក្រសួងសុខាភិបាលនៅតែដាក់ចេញផែនការយុទ្ធសាស្ដ្រ អនុវត្ដយ៉ាងសកម្មនូវការកាត់បន្ថយថែមទៀតនូវអត្រាមរណភាពរបស់មាតា ទារក និងកុមារ និងកង្វះអាហារូបត្ថម្ភ ពង្រីកកម្មវិធីបង្ការ និងព្យាបាលជំងឺឆ្លង ជម្ងឺមិនឆ្លងរ៉ាំរ៉ៃ ក្នុងការពង្រឹង និងពង្រីកការកែលម្អរគុណភាពសេវាសុខាភិបាល។
មានប្រសាសន៍នៅក្នុងពិធីបើកសន្និបាតបូកសរុបការងារប្រចាំ២០២១ និងទិសដៅបន្តឆ្នាំ២០២២ របស់មន្ទីរសុខាភិបាល នៃរដ្ឋបាលខេត្តសៀមរាប នៅថ្ងៃទី០៥ ខែមេសា ឆ្នាំ២០២២ ឯកឧត្តម សាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានលើកឡើងថា វិស័យសុខាភិបាលបានចូលរួមចំណែកយ៉ាងសំខាន់ក្នុងការអភិវឌ្ឍន៍សង្គមកិច្ច សេដ្ឋកិច្ច និងការកាត់បន្ថយភាពក្រីក្រនៅប្រទេសកម្ពុជា ដូចជាការលើកកម្ពស់ស្ថានភាពសុខភាព របស់ប្រជាពលរដ្ឋកម្ពុជាឲ្យប្រសើរឡើង ការថយចុះជាបន្តបន្ទាប់នូវអត្រាស្លាប់របស់មាតា ទារក និងកុមារ និងអត្រាឈឺ អត្រាស្លាប់ដោយជំងឺឆ្លងផ្សេងៗ។
ទន្ទឹមនឹងវឌ្ឍនភាពវិស័យសុខាភិបាលសម្រេចបាន ក៏អាស្រ័យដោយរាជរដ្ឋាភិបាលកម្ពុជា ក្រោមការដឹកនាំដ៏ប៉ិនប្រសប់ ឈ្លាសវៃ និងម៉ឺងម៉ាត់ ប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា រក្សាបាននូវស្ថេរភាពនយោបាយ ដែលជាមូលដ្ឋានគ្រឹះ នៃការអភិវឌ្ឍ ការរស់នៅសុខដុមរម្យនារបស់ប្រជាពលរដ្ឋ។ ការដោះស្រាយប្រឈម នៃការរាតត្បាតជំងឺកូវីដ-១៩ និងការបង្កើនចំណាយលើប្រព័ន្ធគាំពារសុខភាពសង្គមសម្រាប់គ្រួសារក្រីក្រ និងក្រុមជាគោលដៅដទៃទៀត ពិសេសបានដាក់ចេញនូវយុទ្ធសាស្ត្រ យន្តការ និងវិធានការចាំបាច់នានា ដែលមានលក្ខណ:គ្រប់ជ្រុងជ្រោយ ដើម្បីគ្រប់គ្រងនិងទប់ស្កាត់ការចម្លងរាតត្បាតនៃជំងឺកូវីដ-១៩ នៅក្នុងសហគមន៍ និងបើកដំណើរការសកម្មភាពសង្គម សេដ្ឋកិច្ចឡើងវិញជាជំហ៊ានៗតាមកន្លងប្រក្រតីថ្មី។
ឯកឧត្តមរដ្ឋមន្ត្រី មានប្រសាសន៍បញ្ជាក់ថា៖ នៅឆ្នាំបន្តខាងមុខ ក្រសួងសុខាភិបាលនៅតែដាក់ចេញនូវផែនការយុទ្ធសាស្ដ្រសុខាភិបាល ឲ្យបន្ដអនុវត្ដយ៉ាងសកម្ម ការកាត់បន្ថយថែមទៀតនូវអត្រាមរណភាពរបស់មាតា ទារក និងកុមារ និងកង្វះអាហារូបត្ថម្ភ ពង្រីកកម្មវិធីបង្ការ និងព្យាបាលជំងឺឆ្លង ជម្ងឺមិនឆ្លងរ៉ាំរ៉ៃ ក្នុងការពង្រឹង និងពង្រីក ការកែលម្អរគុណភាពសេវាសុខាភិបាល ជូនប្រជាជន កែលម្អឥរិយាបថរបស់អ្នកផ្ដល់សេវាសុខាភិបាល លើកកម្ពស់កម្រិតជំនាញ និងសមត្ថភាពរបស់បុគ្គលិកសុខាភិបាល កែលម្អការគ្រប់គ្រង និងផ្គត់ផ្គង់ឱសថ គ្រឿងបរិក្ខារវេជ្ជសាស្ដ្រ ការពង្រឹងប្រព័ន្ធព័ត៌មានសុខាភិបាល តាមរយ:អភិបាលកិច្ចតាមដានសុខាភិបាល។ លើសពីនេះទៀត ក្រសួងសុខាភិបាល នៅតែបន្តការអនុវត្ដ គោលការណ៍លើកលែងការបង់ថ្លៃសេវាចំពោះប្រជាជនក្រីក្រ តាមរយ:គម្រោងមូលនិធិសមធម៌ និងការអនុវត្តការផ្តល់របបសន្តិសុខសង្គមផ្នែកថែទាំសុខភាពដោយឥតបង់ថ្លៃនៅគ្រប់មូលដ្ឋានសុខាភិបាលសាធារណ: ជូនដល់មន្ត្រីរាជការសាធារណ:អតីតមន្ត្រីរាជការ និង អតីតយុទ្ធជន។
យោងរបាយការណ៍ មន្ទីរសុខាភិបាលខេត្តសៀមរាប បានឱ្យដឹងថា៖ ទោះស្ថិតក្នុងដំណាក់កាលនៃវិបត្តិជំងឺកូវីដ-១៩ ក៏ដំណើរការនៃការផ្តល់សេវាសុខភាពជូនប្រជាជននៅតាមមូលដ្ឋានសុខាភិបាលនៅតែបន្តដោយរលូន ពោលគឺការចូលរួមលះបង់ កំលាំងកាយ កំលាំងចិត្ត របស់មន្ត្រីរាជការសុខាភិបាលគ្រប់ឋានានុក្រម ការចូលរួមសហការល្អពីអាជ្ញាធរមូលដ្ឋាន អង្គការដៃគូ និងអ្នកពាក់ព័ន្ធ ជាច្រើន បានធ្វើឲ្យគ្រប់មូលដ្ឋានសុខាភិបាលទាំងអស់ក្នុងខេត្តសៀមរាប បើកទ្វារផ្តល់សេវាសុខភាពជូនប្រជាពលរដ្ឋ២៤ម៉ោង លើ២៤ម៉ោង ដោយមានប្រជាពលរដ្ឋមកទទួលសេវាសុខភាពជាធម្មតារៀងរាល់ថ្ងៃ គ្រួសារក្រីក្រត្រូវបានបង្ការហានិភ័យហិរញ្ញវត្ថុដោយបានផ្តល់ជូននូវសេវាពិនិត្យ ពិគ្រោះ ព្យាបាលជំងឺដូចៗគ្នា តាមរយ:ការគ្របដណ្តប់នៃមូលនិធិសមធម៌ ដែលផ្តល់ដោយរាជរដ្ឋាភិបាល និងដៃគូអភិវឌ្ឍន៍ ដោយលើកលែងការបង់ថ្លៃសេវានៅគ្រប់មូលដ្ឋានសុខាភិបាលសាធារណ:ក្នុងខេត្តសៀមរាប៕
អត្ថបទ និងរូបភាព: លោកជា ស្រស់ កែសម្រួលដោយ លីវ សុខុន!!!
