អគារសិក្សាចំនួនពីរខ្នង និងបណ្ដាល័យមួយខ្នង ស្ថិតក្នុងសាលាបឋមសិក្សាចុងស្ពាន នៅក្នុងឃុំខ្វាវ ស្រុកជីក្រែង ខេត្ដសៀមរាប ដែលជាអំណោយរបស់ក្រុមអ្នកស្ម័គ្រចិត្ដនៃក្រុមឡាយអិនក្លឹបរបស់ប្រទេសកូរ៉េខាងត្បូង តាមរយៈអង្កការមិត្តកម្ពុជា ក្នុងខេត្ដសៀមរាប ត្រូវបានសម្ពោធដាក់ឲ្យលោកគ្រូអ្នកគ្រូ និងសិស្សានុសិស្សប្រើប្រាស់ជាផ្លវការ នៅព្រឹកថ្ងៃទី០៥ ខែមេសា ឆ្នាំ២០២២នេះ។
មានវត្តមានជាអធិបតីភាពនាឱកាសនោះ លោក នាក់ ណេរ៉ុន អភិបាលរងខេត្ដសៀមរាប មានប្រសាសន៍ថា ការទទួលបានអគារសិក្សានេះ ពិតជាធ្វើឱ្យប្រជាពលរដ្ឋ លោកគ្រូ អ្នកគ្រូ ក្មួយៗសិស្សានុសិស្សទាំងអស់មានការសប្បាយចិត្ដ សម្រាប់សម្រួលដល់ការសិក្សារៀនសូត្ររបស់ សិស្សានុសិស្ស និងលោកគ្រូអ្នកគ្រូក្នុងការបណ្តុះបណ្តាលកុមារ និងយុវជនជំនាន់ក្រោយឱ្យក្លាយជាទំពាំងស្នង ឬស្សីដ៏រឹងមាំ និងជាសសរទ្រូងរបស់ប្រទេសជាតិ នាពេលអនាគត។ លោកក៏បានថ្លែងអំណរគុណ ចំពោះអង្គការមិត្តកម្ពុជា ដែលបានកសាងសមិទ្ធផលនានាក្នុងសាលាបឋមសិក្សាចុងស្ពាន ដែលសកម្មភាពនេះពិតជាបានចូលរួមចំណែកជាមួយរាជរដ្ឋាភិបាលក្នុងការស្ដារនិងអភិវឌ្ឍសង្គមជាតិ តាមរយៈការបណ្ដុះបណ្ដាលធនធានមនុស្ស។
លោក នាក់ ណេរ៉ុន មានប្រសាសន៍បន្ដថា វិស័យអប់រំមានសារៈសំខាន់ខ្លាំងណាស់ក្នុងការអភិវឌ្ឍចំណេះណឹងកុមារ យុវជន និងមនុស្សពេញវ័យ ដែលត្រូវទទួលបានការសិក្សាប្រកបដោយគុណភាពខ្ពស់។ ជាមួយគ្នានោះ វិស័យអប់រំ ក៏បានចាត់ទុកជាវិស័យអាទិភាព ដែលថ្នាក់ដឹកនាំ គ្រប់ថ្នាក់ តែងបានយកចិត្តទុកដាក់ក្នុងការបង្កើនលទ្ធភាពឱ្យកុមារ និងយុវជនគ្រប់រូបទទួលបាននូវសេវាអប់រំ ប្រកបដោយសមធម៌ តាមរយៈការបន្តជម្រុញកសាងសាលាបឋមសិក្សាឱ្យដល់ភូមិ និងអនុវិទ្យាល័យឱ្យបានមួយយ៉ាងតិចនៅក្នុងឃុំនីមួយៗ ស្របតាមស្ថានភាពភូមិសាស្ត្រ ព្រមទាំងជម្រុញឱ្យមានសាកលវិទ្យាល័យ ឬសាខាសាកលវិទ្យាល័យ នៅតាមខេត្តនីមួយៗ ស្រមតាមលទ្ធភាព និងស្ថាភាពជាក់ស្ដែង។
បើតាមលោក ចាង ប៊ូ ស៊ន់ ប្រធានក្រុមឡាយអ៊ិនក្លឹបរបស់ប្រទេសកូរ៉េខាងត្បូង បានបញ្ជាក់ថា ការឧបត្ថម្ភលើវិស័យអប់រំនៅជនបទនេះ ដោយសារប្រទេសកម្ពុជា ធ្លាប់មានគុណបានជួយដល់ប្រទេសក្នុងកូរ៉េ ក្នុងពេលដែលប្រទេសពួកគាត់ធ្លាប់មានសង្គ្រាម ទើបក្រុមការងារឡាយអ៊ិនក្លឹប ប្រមូលថវិកាពីក្រុមអ្នកស្ម័គ្រចិត្ដ របស់ប្រទេសកូរ៉េយកទៅសាលារៀននៅកម្ពុជា ដែលនេះជាការដឹងគុណដល់ប្រទេសកម្ពុជា។ ការផ្ដល់លើវិស័យអប់រំនេះ រួមមានការសាងសង់សាលារៀន តុ កៅអី ទីចាត់ការ បណ្ដាល័យជាដើម ដើម្បីបង្កើតធនធានមនុស្សនៅតាមជនបទ។ ជាមួយគ្នានោះ ក្រុមការងារឡាយអ៊ិនក្លឹប ក៍បានជួយសាងសង់លំនៅឋាន អណ្ដូងទឹក ជូនប្រជាពលរដ្ឋខ្វះខាត និងផ្ដល់សម្ភារៈសិក្សាដល់សិស្ស ដែលសរុបទឹកប្រាក់ទៅលើការសាងសង់នេះ អស់ប្រមាណជិត ១៦ម៉ឺនដុល្លារ។
លោកបានបន្ដថា ពួកគាត់មានការសប្បាយចិត្ដនៅពេលក្រុមស្ម័គ្រចិត្ដប្រទេសកូរ៉េ តាមរយៈអង្គរការមិត្ដកម្ពុជា បានជួយវិស័យអប់រំដល់ប្រទេសកម្ពុជា ដើម្បីលើកទឹកចិត្ដដល់កុមារមិនឱ្យបោះបង់ការសិក្សា និងដើម្បីបញ្ជាក់ថា ប្រទេសកម្ពុជា ជាមិត្ដភាពយូរអង្វេងរជាមួយប្រទេសកូរ៉េ ខណៈដែលប្រទេសកម្ពុជា ជាអ្នកមានគុណលើប្រទេសកូរ៉េផងដែរ។លោកបានបន្ដថា ទោះបីស្ថិតក្នុងអំឡុងពេលវិបត្ដិជំងឺកូវីដ-១៩ក្ដី ក្រុមការងារស្ម័គ្រចិត្ដនៃប្រទេសកូរ៉េនេះ នឹងមានគម្រោងជួយដល់ប្រទេសកម្ពុជាបន្ថែមទៀត ដើម្បីបញ្ជាក់ថា កូរ៉េដឹងគុណដល់ប្រទេសកម្ពុជា៕
អត្ថបទ និង រូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
