ក្រុមអ្នកជំនាញរបស់នាយកដ្ឋានអភិរក្សប្រាសាទក្រៅឧទ្យានអង្គរ នៃអាជ្ញាធរជាតិអប្សរា កំពុងដំណើរការជួសជុលស្ពានតាអោង ដែលជាស្ពានបុរាណមួយ កសាងឡើងនៅក្នុងសម័យអង្គរ ស្ថិតនៅភូមិចុងស្ពាន ឃុំខ្វាវ ស្រុកជីក្រែង ដែលកំពុងមានភាពទ្រុឌទ្រោនទៅហើយ ដែលនេះជាដំណាក់កាលជួសជុលលើកទី២ ដោយចាប់ផ្ដើមកាលពីដើមខែមេសា រហូតដល់ខែសីហា ឆ្នាំ២០២២ខាងមុខ ដោយប្រើថវិកាមូលនិធិរបស់អាជ្ញាធរជាតិអប្សរា។
បើតាម លោក ពុទ្ធ សុទ្ធ មន្ត្រីទទួលបន្ទុកការដ្ឋានជួសជុលស្ពាន បានឱ្យដឹងថា ការជួសជុលពង្រឹងគ្រឹះស្ពានតាអោងនេះ ក្នុងគោលបំណងជួយពង្រឹងរចនាសម្ពន្ធរបស់ស្ពានឱ្យរឹងមាំឡើងវិញ និងរក្សាឱ្យបាននូវអាយុកាលយូរអង្វែងបន្តទៅទៀត។ ពិសេសគឺជួយសម្រួលចរន្តទឹកហូរដើម្បីបញ្ចៀសចេញពីការជន់លិច ព្រមទាំងឱ្យប្រជាពលរដ្ឋ និងភ្ញៀវទេសចរធ្វើដំណើរឆ្លងកាត់មានភាពងាយស្រួល។
លោក ពុទ្ធ សុទ្ធ បានឲ្យដឹងទៀតថា នៅផ្នែកខាងត្បូងរបស់ស្ពានតាអោង គឺមានការទ្រុឌទ្រោមខ្លាំងដូចជា ថ្ម រលុះធ្លាក់ពីរកន្លែង និងជញ្ជាំងស្ពានរហែកចេញមួយកន្លែង ហើយកត្តាដែលនាំឱ្យស្ពានតាអោងរងការខូចខាត គឺដោយអាយុកាល អាកាសធាតុធម្មជាតិ និងសម្ពាធនៃទម្ងន់ដែលបង្កឡើងពីមនុស្សជាដើម។ ក្នុងនោះដំណើរការជួសជុលពេលនេះ គឺក្រុមការងារបានធ្វើសម្រង់ប្លង់ ចុះបញ្ជីថ្ម ជួសជុលថ្ម ពង្រឹងសសរស្ពានដែលរលុះធ្លាក់ ព្រមទាំងជួសជុលជញ្ជាំងរហែកខាងកើតឱ្យត្រូវ តាមលំនាំដើមឡើងវិញ។ ជាមួយគ្នានេះដែរ ក៏មានការជួសជុលពង្រឹងដៃបង្កាន់នាគដាក់ចូលទីតាំងដើមឡើងវិញ សរុបប្រវែង ៧០ម៉ែត្រ។
សូមបញ្ជាក់ថា ស្ពានបុរាណតោអោងសាងសង់ឡើងអំពីថ្មបាយក្រៀម លម្អដោយបង្កាន់ដៃនាគក្បាល៩ធ្វើអំពីថ្មភក់ និងមានព្រះពុទ្ធ សមាធិនៅចំកណ្តាលក្បាលនាគ។ ស្ពាននេះ សាងឡើងនាសម័យអង្គរក្នុងរចនាប័ទ្មបាយ័ន្ត ដោយយោងទៅលើបង្កាន់ដៃនាគ។
កាលពីឆ្នាំ២០២០ អ្នកជំនាញនៃអាជ្ញាធរជាតិអប្សរាធ្លាប់បានជួសជុលស្ពានតាអោងនេះម្តងមកហើយនៅដំណាក់កាលទីមួយ ដោយកាលណោះ ការជួសជុលបានធ្វើនៅផ្នែកខាងជើងដូចជា បង្កាន់ដៃនាគ ពង្រឹងជញ្ជាំងសសរចំនួន១១ និងការកាយដីកកស្ទះ ដើម្បីសម្រួលដល់ផ្លូវទឹកហូរឆ្លងកាត់៕
អត្ថបទ និង រូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
