នៅថ្ងៃទី០៥ ខែមេសា ឆ្នាំ២០២២ ឯកឧត្តម សាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល និងលោក ពិន ប្រាកដ អភិបាលរងខេត្ត តំណាងដ៏ខ្ពង់ខ្ពស់ឯកឧត្តម ទៀ សីហា អភិបាល នៃគណ:អភិបាលខេត្តសៀមរាប បានអញ្ជើញជាអធិបតីក្នុងពិធីបើកសន្និបាតបូកសរុបការងារប្រចាំ២០២១ និងទិសដៅបន្តឆ្នាំ២០២២របស់មន្ទីរសុខាភិបាលខេត្តសៀមរាប រួមជាមួយវត្តមានឯកឧត្តម លោកជំទាវគណ:ប្រតិភូក្រសួងសុខាភិបាល សមាជិក ក្រុមប្រឹក្សាខេត្ត លោក លោកស្រីអភិបាល អភិបាលរង ក្រុង/ស្រុក ក្រុមប្រឹក្សាឃុំ/សង្កាត់ ថ្នាក់ដឹកនាំមន្ទីរ អង្គភាព ស្ថាប័នពាក់ព័ន្ធ អង្គការដៃគូរអភិវឌ្ឈន៍ និងមន្រ្តីសុខាភិបាល សរុបប្រមាណ ៣០០នាក់ ។ពិធីនេះប្រព្រឹត្តិទៅនៅសាលប្រជុំរបស់មន្ទីរពេទ្យជ័យវរ្ម័នទី៧ឬមន្ទីរពេទ្យគន្ធបុប្ផាខេត្តសៀមរាប ដើម្បីពិនិត្យមើលនូវសមិទ្ធផលការងារសុខាភិបាល សម្រេចបានក្នុងឆ្នាំ២០២១ និងកំណត់សកម្មភាពជាអាទិភាពសម្រាប់ទិសដៅការងារបន្តឆ្នាំ២០២២ និងកំណត់តម្រូវការ នៃការចូលរួមពីអ្នកពាក់ព័ន្ធ ដើម្បីជាធាតុចូលសម្រាប់កែលម្អរការផ្តល់សេវានៅឆ្នាំខាងមុខបន្តទៀត។
ក្នុងរបាយការណ៍ស្វាគមន៍របស់ លោក អ៊ាប ប៊ុនលឿន អណុប្រធានមន្ទីរសុខាភិបាលខេត្ត បានឱ្យដឹងថា៖ ទោះស្ថិតក្នុងដំណាក់កាល នៃវិបត្តិជម្ងឺកូវីដ-១៩ ក៏ដំណើរការនៃការផ្តល់សេវាសុខភាពជូនប្រជាជននៅតាមមូលដ្ឋាន នៅតែបន្តដោយយ៉ាងរលូន ពោលគឺជាការចូលរួមលះបង់ កំលាំងកាយ កំលាំងចិត្ត របស់មន្ត្រីរាជការសុខាភិបាលគ្រប់ឋានានុក្រម ការចូលរួមសហការល្អ ជាពិសេសពីអាជ្ញាធរមូលដ្ឋាន អង្គការដៃគូ និងអ្នកពាក់ព័ន្ធជាច្រើន បានធ្វើឲ្យគ្រប់មូលដ្ឋានសុខាភិបាលទាំងអស់ ក្នុងខេត្តសៀមរាបបើកទ្វារផ្តល់សេវាសុខភាពជូនប្រជាពលរដ្ឋ២៤ម៉ោង លើ២៤ម៉ោង ដោយមានប្រជាពលរដ្ឋមកទទួលសេវាសុខភាពជាធម្មតារៀងរាល់ថ្ងៃ។ គ្រួសារក្រីក្រត្រូវបានបង្ការហានិភ័យហិរញ្ញវត្ថុដោយបានផ្តល់ជូននូវសេវាពិនិត្យ ពិគ្រោះ ព្យាបាលជម្ងឺដូចៗគ្នា តាមរយ:ការគ្របដណ្តប់ នៃមូលនិធិសមធម៌ ដែលផ្តល់ដោយរាជរដ្ឋាភិបាល និងដៃគូអភិវឌ្ឈន៍ ដោយលើកលែងការបង់ថ្លៃសេវានៅគ្រប់មូលដ្ឋានសុខាភិបាលសាធារណ:។
លោក ពិន ប្រាកដ អភិបារងខេត្ត បានចាត់ទុកការប្រព្រឹត្តទៅនៃសន្និបាតនេះគឺជាយន្តការសម្រាប់ត្រួតពិនិត្យការងាររួមគ្នា ដោយផ្ដល់នូវកាលានុវត្ដភាពដល់គ្រប់ប្រតិបត្ដិករវិស័យសុខាភិបាល ព្រមទាំងតួអង្គពាក់ពន្ធ័ផ្សេងៗទៀត ដើម្បីប្រមូលផ្ដុំនូវទស្សន: ផ្តល់នូវគំនិតយោបល់រួមគ្នា តាមរយ:ការពិភាក្សា និងពិនិត្យមើលរួមគ្នាអំពីសមិទ្ធផល ដើម្បីស្វែងរកធាតុចូល ដូចជាបទពិសោធន៍ល្អៗ បញ្ហាប្រឈម ឬអនុសាសន៍សម្រាប់ប្រើប្រាស់ជាមូលដ្ឋានក្នុងការកែលម្អគុណភាព នៃការផ្តល់សេវាសុខាភិបាល។លោកអភិបាលរងខេត្ត បានសំដែងនូវការកោតសរសើរចំពោះលោក លោកស្រី ថ្នាក់ដឹកនាំមន្ទីរសុខាភិបាលខេត្ត ថ្នាក់ដឹកនាំសុខាភិបាលស្រុកប្រតិបត្តិ មន្ទីរពេទ្យបង្អែក និងមន្រ្តីសុខាភិបាលទាំងអស់ ដែលបានខិតខំប្រឹងប្រែងយកអស់ពីកម្លាំងកាយចិត្ដ រយ:ពេលពេញមួយឆ្នាំក្នុងការដឹកនាំ និងអនុវត្ដនូវតួនាទី ភារកិច្ច តាមជំនាញរៀងៗខ្លួនប្រកបដោយការទទួលខុសត្រូវខ្ពស់ ហើយសម្រចបានជោគជ័យនូវសមិទ្ធផលជាច្រើនគួរឱ្យកត់សំគាល់ ពិសេសទទួលបានជោគជ័យក្នុងការចូលរួមបង្ការ ទប់ស្កាត់ នៃការរីករាលដាលជំងឺកូវីដ-១៩ ក្នុងខេត្តនេះ។ លោក ពិន ប្រាកដបញ្ជាក់ថា៖ ទន្ទឹមនឹងលទ្ធផលល្អ និងជោគជ័យខាងលើ យើងក៏នៅមានបញ្ហាសេសសល់មួយចំនួនដែលត្រូវត្រួតពិនិត្យ និងវាយតម្លៃឱ្យបានស៊ីជម្រៅ រាល់សកម្មភាពការងារ ហើយក៏ត្រូវធ្វើការពិភាក្សា ការផ្តល់អនុសាន៍តាមរយ:អង្គសន្និបាតប្រកបដោយចក្ខុវិស័យនេះ ដើម្បីជាមូលដ្ឋានជាក់លាក់ក្នុងការរៀបចំផែនការយុទ្ធសាស្ដ្រថ្មីៗ សំរាប់អនុវត្ដបន្ដឱ្យទទួលបានជោគជ័យបន្តទៀតក្នុងឆ្នាំ២០២២៕
អត្ថបទ និងរូបភាព: លោកយូ វង្ស កែសម្រួលដោយ លីវ សុខុន!!!
