បន្ទាប់ពីអញ្ជើញដល់ខេត្តសៀមរាបនៅថ្ងៃទី២ ខែមេសា ឆ្នាំ២០២២ នៅរសៀលថ្ងៃដដែល សម្ដេចអគ្គមហាសេនាតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញចុះពិនិត្យស្ថានភាពបណ្ដាផ្លូវមួយចំនួន ស្ថិតក្នុងគម្រោងហេដ្ឋារចនាសម្ព័ន្ធផ្លូវ៣៨ខ្សែ និងដងស្ទឹងសៀមរាប ក្នុងក្រុងសៀមរាប ខណៈភ្លៀងបាននិងកំពុងបន្តធ្លាក់នៅឡើយ។
ក្នុងឱកាសអញ្ជើញពិនិត្យស្ថានភាពផ្លូវក្នុងក្រុងក្រោយការសាងសង់រួចជាស្ថាពរនៅថ្ងៃដំបូងនេះ សម្ដេចតេជោ ហ៊ុន សែន ក៏បានចុះពិនិត្យផ្សារទឹក នៅតាមដងស្ទឹងសៀមរាប ដែលកំពុងរៀបចំឡើង ដើម្បីបង្កើតជាទស្សនីយភាព និងសម្រាប់ការកម្សាន្តក្នុងពិធីបុណ្យចូលឆ្នាំប្រពៃណីជាតិខ្មែរ សៀមរាបសង្ក្រាន្ត ដែលរដ្ឋបាលខេត្តសៀមរាប គ្រោងនឹងរៀបចំនៅថ្ងៃទី១២ ដល់ទី១៤ ខែមេសាខាងមុខនេះ។ ទន្ទឹមនោះ សម្ដេចតេជោ ក៏បានជួបសួរសុខទុក្ខ និងឧបត្ថម្ភថវិកាមួយចំនួន ដល់ប្រជាពលរដ្ឋចំនួន ៩១គ្រួសារ នៃសហគមន៍ចុងឃ្នៀស ស្ថិតនៅសង្កាត់ចុងឃ្នៀស ដែលបាននាំយកទូកមកចូលរួមក្នុងកម្មវិធីកម្សាន្តនានា ក្នុងឱកាសពិធីចូលឆ្នាំប្រពៃណីជាតិក្នុងក្រុងសៀមរាប។ ហើយការរៀបចំ កម្មវិធីសៀមរាបសង្ក្រាន្តនេះដែរ ទទួលបានការគិតគូរ និងយកចិត្តទុកដាក់ខ្ពស់ពីឯកឧត្តម ទៀ សីហា អភិបាលខេត្តសៀមរាប រួមនិងកិច្ចសហការរៀបចំដោយសហភាពសហព័ន្ធយុវជនកម្ពុជាខេត្តសៀមរាប និងមន្ទីរ អង្គភាពជុំវិញខេត្ត។
វត្តមានដ៏ខ្ពង់ខ្ពង់សម្ដេចតេជោនាពេលនេះ គឺជាការយកចិត្តទុកដាក់ខ្ពស់សម្រាប់ក្រុងសៀមរាប ក៏ដូចជាខេត្តសៀមរាបទាំងមូល ដោយសម្ដេច នឹងអញ្ជើញសម្ពោធដាក់ឱ្យប្រើប្រាស់ជាផ្លូវការ នូវគម្រោងហេដ្ឋារចនាសម្ព័ន្ធផ្លូវ៣៨ខ្សែ ក្នុងក្រុងសៀមរាប នាថ្ងៃទី៤ ខែមេសា ឆ្នាំ២០២២នេះ។ ក្នុងដំណើរអញ្ជើញមកខេត្តសៀមរាបនេះដែរ សម្ដេចតេជោ ក៏នឹងគ្រោងទៅពិនិត្យដំណើរការសាងសង់អាកាសយានដ្ឋានអន្តរជាតិសៀមរាបអង្គរថ្មី ស្ថិតក្នុងស្រុកសូទ្រនិគម ខេត្តសៀមរាបផងដែរ។
គួររំលឹកដែរថា គម្រោងហេដ្ឋារចនាសម្ព័ន្ធផ្លូវ៣៨ខ្សែ ក្នុងក្រុងសៀមរាប ត្រូវបានបើកការដ្ឋានជាផ្លូវការ កាលពីថ្ងៃទី៣០ ខែវិច្ឆិកា ឆ្នាំ២០២០ ក្រោមវត្តមានដ៏ខ្ពង់ខ្ពស់សម្ដេចតេជោ ហ៊ុន សែន ដែលក្នុងនោះសាងសង់ជាផ្លូវបេតុង និងក្រាលកៅស៊ូAC មានប្រវែងប្រមាណជាង១០៦គ.ម រួមទាំងមានការសាងសង់បណ្ដាញលូទឹកភ្លៀង ទឹកកខ្វក់ប្រវែងជាង២៤២គ.ម ព្រមទាំងការកែលម្អសោភណ្ឌភាពជាច្រើនទៀតក្នុងក្រុង ដោយផ្ដោតលើធម្មជាតិ វប្បធម៌ និងប្រវត្តិសាស្ត្រ និងប្រើប្រាស់ថវិកាជាតិសរុបប្រមាណ ១៦០លានដុល្លារអាមេរិច។
អត្ថបទ៖ សេង ផល្លី
