នៅថ្ងៃទី៣ ខែមេសា ឆ្នាំ២០២២នេះ សម្ដេចអគ្គមហាសេនាបតីតេជោ ហ៊ុន សែន បានអញ្ជើញចុះពិនិត្យការដ្ឋានសាងសង់អាកាសយានដ្ឋានអន្តរជាតិសៀមរាប-អង្គរកម្រិត4E ស្ថិតក្នុងឃុំតាយ៉ែក ស្រុកសូទ្រនិគម ខេត្តសៀមរាប ដែលមានសមត្ថភាពអាចទទួលអ្នកដំណើរប្រមាណ ៧លាននាក់ក្នុងឆ្នាំ បន្ទាប់ពីការសាងសង់រួចរាល់នៅឆ្នាំ២០២៣ខាងមុខ។
តាមរបាយការណ៍របស់ ឯកឧត្តម តឹក រ៉េតសំរេច ប្រធានគណកម្មការតម្រង់ទិសសម្រាប់ការសាងសង់អាកាសយានដ្ឋានសៀមរាប-អង្គរ បង្ហាញថា អាកាសយានដ្ឋានអន្តរជាតិថ្មីនេះ ត្រូវបានសាងសង់លើផ្ទៃដីប្រមាណ ៧០០ហិកតា ដែលមានផ្លូវសម្រាប់យន្តហោះរត់ល្បឿនប្រវែង ៣៦០០ម៉ែត្រ ទទឹង៤៥ម៉ែត្រ និងអាចទទួលយន្តហោះគ្រប់ប្រភេទហោះហើរត្រង់ និងចុះចតបានដោយសុវត្ថិភាព។
តាមរបាយការណ៍ដដែលបញ្ជាក់បន្ថែមថា អាកាសយានដ្ឋានអន្តរជាតិថ្មីនេះ ចាប់ផ្តើមដំណើរការសាងសង់នៅថ្ងៃទី១៥ ខែមីនា ឆ្នាំ២០២០ ហើយគ្រោងប្រើរយៈពេលសាងសង់សរុបចំនួន ៣៦ខែ ឬ ៣ឆ្នាំ ដោយបានប្រើប្រាស់កម្មករប្រមាណជិត ២ពាន់នាក់ ក្នុងនោះ ៧០ភាគរយជាជនជាតិខ្មែរ។ តាមគម្រោងអាកាសយានដ្ឋានអន្តរជាតិសៀមរាប-អង្គរ គ្រោងនឹងបញ្ចប់ការសាងសង់នៅថ្ងៃទី៣០ ខែមីនា ឆ្នាំ២០២៣ និងដំណើរការសាកល្បង ជាលើកដំបូងនៅខែតុលា ឆ្នាំ២០២៣។ អាកាសយានដ្ឋានអន្តរជាតិថ្មីនេះ ត្រូវបានសាងសង់ឡើងដោយមានការយកចិត្តទុកដាក់ខ្ពស់ពីផលប៉ះពាល់ដល់ទីប្រជុំជនក្នុងក្រុង និងតំបន់ការពារបេតិភណ្ឌនានាក្នុងខេត្ត ដោយមានចម្ងាយប្រហែល ៤០គ.ម ពីរមណីយដ្ឋានអង្គរ និង៥០គ.ម ពីទីប្រជុំជនក្នុងក្រុងសៀមរាប។
ព័ត៌មានជាតិ ថ្មីៗ
គួររំលឹកថា កិច្ចព្រមព្រៀងសម្បទានអភិវឌ្ឍន៍សាងសង់អាកាសយានដ្ឋានអន្តរជាតិសៀមរាប-អង្គរ ត្រូវបានចុះហត្ថលេខានៅថ្ងៃទី១៣ ខែតុលា ឆ្នាំ២០១៦ នៅរាជធានីភ្នំពេញ រវាងរាជរដ្ឋាភិបាលកម្ពុជាតំណាងដោយសម្ដេចវិបុលបញ្ញា សុខ អាន និងតំណាងក្រុមហ៊ុនអង្គរអ៊ិនធើណេសិនណល អ៊ែរផត អ៊ិនវេសម៉ិន ( ខេមបូឌា ) (ឯ.ក) ហៅកាត់ថា AIAI ក្រោមអធិបតីភាព សម្ដេចអគ្គមហាសេនាបតីតេជោ ហ៊ុន សែន និងឯកឧត្តម ស៊ី ជីងពីង ប្រធានាធិបតី នៃសាធារណរដ្ឋប្រជាមានិតចិន។ គម្រោងសម្បទាននេះដែរ មានសុពលភាពរយៈពេល ៥៥ឆ្នាំ ដែលរយៈពេល ៥ឆ្នាំដំបូងសម្រាប់ដំណើរការសាងសង់ និង៥០ឆ្នាំសម្រាប់ការធ្វើអាជីវកម្ម ក្រោមទម្រង់កសាង, ប្រតិបត្តិការ និងផ្ទេរ ឬហៅកាត់ថាBOT និងទទួលការសាងសង់ដោយក្រុមហ៊ុនរបស់រដ្ឋាភិបាលចិន ក្នុងគម្រោងទឹកប្រាក់ប្រមាណ ៨៨០លានដុល្លារ។
អត្ថបទ : សេង ផល្លី
