បដិសណ្ឋារកិច្ចល្អ ទេសចរណ៍ មានសុវត្ថិភាព គឺជាមូលដ្ឋានដំបូងដ៍សំខាន់មួយក្នុងការធានាបានភាពកក់ក្តៅ និងភាពពេញចិត្តរបស់អ្នកទេសចរ ដែលមកទស្សនានៅព្រះរាជាណាចក្រកម្ពុជា និងជាចំណែកមួយចូលរួមគាំទ្រដល់កិច្ចខិតខំប្រឹងប្រែងរបស់រាជរដ្ឋាភិបាល ក្នុងការបើកប្រទេសទទួលទេសចរអន្តរជាតិ និងការយកចិត្តទុកដាក់របស់ក្រសួងទេសចរណ៍ក្នុងការរៀបចំគោលនយោបាយ ដើម្បីធានាបាននិរន្តរភាពទេសចរណ៍។ នេះបើតាមប្រសាសន៍ ឯកឧត្តម ហោ សារុន រដ្ឋលេខាធិការទេសចរណ៍ និងជាអនុប្រធានគណៈកម្មការអន្តរក្រសួង ដើម្បីសម្រួលការធ្វើដំណើរនិងដឹកជញ្ជូនភ្ញៀវទេសចរ និងអ្នកដំណើរនៅតំបន់ច្រកទ្វារព្រំដែនអន្តរជាតិនិងច្រកទ្វារអន្តរជាតិទូទាំងប្រទេស (គ.អ.ច.ទ) ក្នុងពិធីបើកសិក្ខាសាលាស្តីពី បដិសណ្ឋារកិច្ចល្អ ទេសចរណ៍ មានសុវត្ថិភាពនៅខេត្តសៀមរាប នាថ្ងៃទី០៧ ខែមេសា ឆ្នាំ២០២២ ។
ឯកឧត្តម ហោ សារុន មានប្រសាសន៍ថា សិក្ខាសាលានេះជាឱកាសមួយផ្សារភ្ជាប់ការចូលរួមរបស់យើងក្នុងការផ្តល់ភាពកក់ក្តៅ និងភាពពេញចិត្តជូនទេសចរ ដែលទាមទារឱ្យយើងជាប្រតិបត្តករទទួលបដិសណ្ឋារកិច្ចភ្ញៀវទេសចរប្រកបដោយទឹកមុខញញឹម រួសរាយរាក់ទាក់ ទន់ភ្លន់តែម៉ឹងម៉ាត់ក្នុងការងារ ដើម្បីចូលរួមស្តារនិងលើកស្ទួយវិស័យទេសចរណ៍កម្ពុជាប្រកបដោយចីរភាព គុណភាព សុវត្ថិភាព និរន្តរភាព ការទទួលខុសត្រូវ និងបរិយាបន្ន ក្នុងបុព្វហេតុលើកកម្ពស់ថែមទៀត នូវកិត្តយានុភាពកម្ពុជា ព្រោះកម្ពុជា ព្រះរាជាណាចក្រអច្ឆរិយផ្តល់ភាពកក់ក្តៅ ហើយជាគោលដៅទេសចរណ៍គុណភាពលំដាប់ពិភពលោក ប្រកបដោយភាពជឿជាក់ និងភាពទាក់ទាញ។
ព័ត៌មានជាតិ ថ្មីៗ
ឯកឧត្តមបន្ថែមថា វិស័យទេសចរណ៍ត្រូវបានរាជរដ្ឋាភិបាលចាត់ទុកជាមាសបៃតង គឺជាវិស័យមួយចូលរួមទ្រទ្រង់កំណើនសេដ្ឋកិច្ច-សង្គម បង្កើតការងារ និងកាត់បន្ថយភាពក្រីក្ររបស់ប្រជាពលរដ្ឋ។ ជាក់ស្តែងក្នុងរយៈពេលជាង ១០ឆ្នាំ គិតត្រឹមឆ្នាំ២០១៩ វិស័យទេសចរណ៍នៅកម្ពុជាកើនឡើងគួរឱ្យកត់សម្គាល់ ក្នុងអត្រាកំណើនទេសចរអន្តរជាតិជាមធ្យម ១២% ក្នុងមួយឆ្នាំ។ ចាប់តាំងពីដើមឆ្នាំ២០២០ ដល់ឆ្នាំ២០២១ វិស័យទេសចរណ៍កម្ពុជាក៍ដូចជាពិភពលោក បានទទួលរងនូវឥទ្ឋិពលអវិជ្ជមានយ៉ាងខ្លាំងដោយសារវិបត្តិជំងឺកូវី-១៩ ប៉ុន្តែអ្វីដែលគួរជាទីមោទនៈ គឺរាជរដ្ឋាភិបាលកម្ពុជាដែលមានសម្តេចតេជោសែននាយករដ្ឋមន្ត្រី បានដាក់ចេញនូវយុទ្ឋសាស្ត្រនិងវិធានការប្រកបដោយប្រសិទ្ឋិភាពដើម្បីកាត់បន្ថយផលប៉ះពាល់ពីជំងឺនេះជាអតិបរិមា និងបានបើកដំណើរការគ្រប់វិស័យទាំងអស់ឡើងវិញ ជាពិសេសវិស័យទេសចរណ៍នៅក្នុងគន្លងប្រក្រតីភាពថ្មីដូចសព្វថ្ងៃ។
ក្នុងនាមថ្នាក់ដឹកនាំខេត្តសៀមរាប លោក ពិន ប្រាកដ អភិបាលរងខេត្ត បានមានប្រសាសន៍ថា ស្របពេលដែលស្ថានភាព នៃការរីករាលដាលនៃជំងឺកូវីដ-១៩ មានសភាពស្ងប់ស្កាត់ រាជរដ្ឋាភិបាលកម្ពុជា ក៏សម្រេចបើកប្រទេសឡើងវិញ កាលពីចុងឆ្នាំ២០២១កន្លងទៅ ដើម្បីធ្វើឱ្យកំណើនសេដ្ឋកិច្ចជាតិ វិលទៅរកប្រក្រតីភាពឡើងវិញ។ ជាមួយនោះសេវាកម្មទេស-ចរណ៍នានា របស់ខេត្ត រួមមាន៖ សណ្ឋាគារ ភោជនីយដ្ឋាន ផ្ទះសំណាក់ ខារ៉ាអូខេ ឌីស្គូតែក ផ្សារទំនើប។ល។ បានបើកដំណើរការទទលភ្ញៀវទេសចរ ទាំងជាតិ-អន្តរជាតិជាបណ្តើរៗហើយ ដោយទីតាំងអាជីវកម្មដ្ឋាន បានអនុវត្តយ៉ាងខ្ជាប់ខ្ជួននូវវិធានការ របស់រាជរដ្ឋាភិបាល ក្រសួងសុខាភិបាល និងតាមការចង្អុលបង្ហាញរបស់អាជ្ញាធរមានសមត្ថកិច្ច។ ជាក់ស្តែងតាមរយៈ នៃការរៀបចំពិធីបុណ្យឆ្លង ឆ្នាំចាស់ផ្លាស់ចូលឆ្នាំថ្មី ឆ្នាំសាកល ២០២១-២០២២កន្លងទៅ បានភ្ញៀវទេសចរជាតិ-អន្តរជាតិ បានចូលមកទស្សនាខេត្តសៀមរាប ប្រមាណ ២០ម៉ឺននាក់ផងដែរ។ លោកអភិបាលរងខេត្ត ក៍បានបង្ហាញនូវការគាំទ្រទាំងស្រុងចំពោះគោលនយោបាយរបស់រាជរដ្ឋាភិបាល ក៏ដូចជាគោលនយោបាយផែនការយុទ្ធសាស្រ្តរបស់ក្រសួងទេសចរណ៍ ដែលបានដាក់ចេញទិសដៅត្រឹមត្រូវទៅតាមនិន្នាការទេសចរណ៍ក្នុងតំបន់ និងក្នុងពិភពលោក។
បើតាម ឯកឧត្តម ប៊ុន រដ្ឋា នាយកអាកាសយានដ្ឋានអន្តរជាតិសៀមរាប បញ្ជាកថា រាជរដ្ឋាភិបាលកម្ពុជាតាមរយៈក្រសួងសុខាភិបាល បានដាក់ចេញនូវនិតិវិធីប្រតិបត្តិស្តង់ដារ (SOPs) ដើម្បីគ្រប់គ្រងអ្នកដំណើរមកដល់អាកាសយានដ្ឋានអន្តរជាតិ នៅកម្ពុជាអនុលោមតាមការរស់នៅតាមគន្លងប្រក្រតីភាពថ្មី ក្នុងបរិបទនៃជំងឺកូវីដ-១៩ ដែលជាការណែនាំដ៍មានសារៈសំខាន់សម្រាប់មន្ត្រីមានសមត្ថកិច្ចក្នុងការអនុវត្តតួនាទី ភារកិច្ចរៀងៗខ្លួន នៅតាមច្រកទ្វារអាកាសយានដ្ឋានអន្តរជាតិ។ គិតពីខែមីនា ដល់ខែមេសា ឆ្នាំ២០២២នេះ មានក្រុមហ៊ុនអាកាសចរណ៍ចំនួន ២ប៉ុណ្ណោះ ដែលបាននឹងកំពុងបន្តប្រតិបត្តិការហោះហើរនៅអាកាសយានដ្ឋានសៀមរាប គឺក្រុមហ៊ុនអាកាសចរណ៍ Cambodia Angkor Air និង ក្រុមហ៊ុន Singapore Airline ៕
អត្ថបទ និង រូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
