យុវជន យាង វណ្ឌី បានលើកឡើងថា ២ឆ្នាំកន្លងទៅនេះ ពិធីចូលឆ្នាំថ្មីប្រពៃណីខ្មែរ ត្រូវបានអាក់ខានដោយសារជំងឺកូវីដ-១៩ ប៉ុន្ដែនៅឆ្នាំ២០២២នេះ រាជរដ្ឋាភិបាលបានបើឱ្យមានពិធីចូលឆ្នាំថ្មីនេះឡើងវិញ ដូចនេះក្នុងនាមជាយុវជនក៍ដូចជាប្រជាពលរដ្ឋផ្សេងទៀត បានត្រៀមខ្លួនជាស្រេច ក្នុងការចូលរួមពិធីបុណ្យ ចូលឆ្នាំប្រពែណីជាតិនេះ ជាពីសេសព្រឹត្តិការណ៍សៀមរាបសង្ក្រាន្ដ ព្រោះពិធីនេះមិនត្រឹមតែរៀបចំអបអរចូលឆ្នាំថ្មីស្រស់ស្អាតប៉ុណ្ណោះទេ ថែមទាំងហេដ្ឋរចនាសម្ព័ន្ធផ្លូវ ៣៨ខ្សែ ដែលជាទីក្រុងមួយមានភាពស្រស់ស្អាត កំពុងទាក់ទាញអ្នកទេសចរ។
ដោយឡែកប្រជាពលរដ្ឋចំនួនមួយចំនួនទៀត ពួកគាត់បានសម្ដែងការសប្បាយ និងពេញចិត្ដចំពោះការរៀបចំពិធីសៀមរាបសង្ក្រាន្ដ ព្រោះពិធីចូលឆ្នាំថ្មីនេះ ខុសប្លែកពីឆ្នាំមុនៗ ដោយសរសើរអាជ្ញាធរថា បានខិតខំរកពិធីសាស្ដ្រល្អៗ ដើម្បីបំរើសេចក្ដីត្រូវការរបស់ប្រជាពលរដ្ឋៗ។ ពួកគាត់ក៏ខ្លួនបានត្រៀមខ្លួនជាស្រេចក្នុងការចូលរួមបង្កើនការសប្បាយ នៅក្នុងពិធីសៀមរាបសង្ក្រាន្ដនាពេលខាងមុខនេះ។
បើតាមលោក ប្រាក់ សោភ័ណ អភិបាលរងខេត្ដសៀមរាប និងជាប្រធានសហភាពសហព័ន្ធយុវជនកម្ពុជាខេត្ត បានមានប្រសាសន៍ថា ព្រឹត្តិការណ៍សៀមរាបសង្ក្រាន្ដ មានកម្មវិធីកំសាន្ដចំនួន ៧កន្លែង ទាំងនៅប្រាសាទបុរាណ និងនៅក្នុងក្រុងសៀមរាប។ ក្នុងនោះចំពោះការរៀបចំនៅតាមដងស្ទឹងសៀមរាប បានជិតរួចរាល់ហើយ ដោយមានផ្សារបណ្ដែតទឹក ការជិះទូកកំសាន្ដ ដោយមានទូកជាង ១០០គ្រឿង ការប្រគំតន្ដ្រី ការប្រដាល់គុណខ្មែរ និងល្បែងប្រជាប្រិយជាដើម។ ដោយឡែកការរៀបចំ នៅប្រាសាទចៅសាយទេវតា ដែលមានការរៀបចំជាភូមិខ្ញុំ រស់នៅបែបបុរាណ ដែលមកដល់ពេលនេះ បានរៀបចំរួចរាល់ប្រមាណ ៧០ភាគរយហើយដែរ។
លោក ប្រាក់ សោភ័ណ រំពឹងថាព្រឹត្តិការណ៍ដែលនឹងមកដល់នៅសល់ ៦ថ្ងៃខាងមុនេះ នឹងអាចទាក់ទាញភ្ញៀវទេសចរ ឱ្យមកទស្សនាខេត្តសៀមរាបកាន់តែច្រើន និងធ្វើឱ្យសេដ្ឋកិច្ចនៅក្នុងខេត្តបានងើបល្អប្រសើរឡើងវិញ។ ហើយពេលបច្ចុប្បន្ននេះ អាជ្ញាធរខេត្តកំពុងខ្នះខ្នែងយ៉ាងខ្លាំងលើការងារសំអាតទីធ្លាសាធារណៈ សំអាតសំរាមនៅតាមដងស្ទឹង ព្រមទាំងតុបតែងលំអ នៅតាមដងផ្លូវនានា ការដាក់ទង់ជាតិ និងអំពូលភ្លើងពណ៌ជាច្រើនតាមដងផ្លូវ ដើម្បីបង្អួតភ្នែកអ្នកទេសចរ ដែលនឹងចូលមកលេងក្នុងខេត្តសៀមរាបនាពេលខាងមុខនេះ៕
អត្ថបទ និង រូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
