ក្រុមបាល់ទាត់ចំនួន ២ក្រុម ដែលមានមូលដ្ឋាននៅខេត្តសៀមរាប គឺក្រុមមន្ទីរពេទ្យយោធភូមិភាគទី៤ និងក្រុមរាជសីស្វាយធំ កាលពីល្ងាចថ្ងៃទី១០ ខែមេសា ឆ្នាំ២០២២នេះ បានរៀបចំកាប្រកួតបាល់ទាត់លក្ខណៈមិត្តភាពមួយ ដើម្បីបង្ហាញដល់យុវជន និងប្រជាពលរដ្ឋទូទៅឱ្យចូលរួមលេង និងគាំទ្រដល់វិស័យកីឡាឲ្យកាន់តែច្រើនឡើងបន្ថែមទៀត។
លោក នី វណ្ណៈ តំណាងក្រុមរាជសីស្វាយធំ ស្រុកប្រាសាទបាគង បានឲ្យដឹងថា ការប្រគួតនេះ ធ្វើឡើងក្នុងគោលបំណង ដើម្បីបង្ហាញដល់យុវជនជន ក៍ដូចជាប្រជាពលរដ្ឋទូទៅ ឲ្យយល់ដឹងពីអត្ថប្រយោជន៍នៃការលេងកីឡា និងចូលរួមគំាទ្រលើសវិស័យកីឡាគ្រប់ប្រភេទ ព្រោះវិស័យកីឡា ជាវិស័យមួយដែលរាជរដ្ឋាភិបាលកំពុងយកចិត្ដទុកដាក់ឱ្យមានការចូលរួមឲ្យបានគ្រប់សកម្មភាព និងទីកន្លែង។ លោកបន្ដថា ការលេងកីឡាមានសារៈសំខាន់ណាស់ កីឡានាំមកនូវសុខភាពល្អ កាយសម្បទារឹងមាំ កីឡានាំមកនូវសាមគ្គីភាព មិត្តភាពល្អ និងបំបាត់នូវការសែបគ្រឿងញៀន គ្រឿងស្រវឹង ល្បែងស៊ីសង មិនត្រឹមតែប៉ុណ្ណោះ កីឡាក៏នាំមកនូវវិន័យល្អ និងភាពឈ្លាសវៃ រហ័សរហួន។
ដោយឡែក លោក ជា សីលា ប្រធានក្រុមមន្ទីរពេទ្យយោធភូមិភាគទី៤ បានបញ្ជាក់ដែរថា ការប្រកួតលក្ខណៈមិត្ដភាពនេះដែរ គឺបានរៀបចំចំនួន ២លើករួចមកហើយ បន្ទាប់ពីបញ្ចប់ពីការបំពេញការងារនៅអង្គភាព។ ការលេងកីឡានេះដែរ គឺជាសារមួយបង្ហាញដល់មនុស្សថា ការបង្កើតឱ្យមានការលេងកីឡា គឺជាគោលដៅចម្បងក្នុងការបណ្តុះផ្នត់គំនិតដល់ពួកគេឱ្យកាន់តែមានភាពវៃឆ្លាត មានសុខភាពល្អ ការសាមគ្កីគ្នាល្អ និងបង្កើតនូវភាពស្និទ្ធស្នាលផងដែរ។
សូមជម្រាបថា ជាលទ្ធផលសម្រាបការប្រគួតនេះដែរ គឺក្រុមរាជសីស្វាយធំ បានយកឈ្នះទៅលើក្រុមគ្រូពេទ្យយោធភូមិភាគទី៤ ដោយលទ្ធផល ៨-៤ ៕
អត្ថបទ និង រូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
