កាលពីរសៀលថ្ងៃទី១០ ខែមេសា ឆ្នាំ២០២២នេះ ព្រះគ្រូសង្ឃវិសុទ្ឋិញាណ ភ្លឿន រដ្ឋ បិយធម្មោ គ្រូសូត្រស្តាំវត្តអធ្វារក្រុងសៀមរាប បានដឹកនាំសហការជាមួយអាជ្ញាធរមូលដ្ឋាន បានដឹកនាំញាតិញោមរៀបចំពិធីបុណ្យទក្ខិណានុប្បទាន កត្តាញ្ញូកត្តវេទី ជូនញោមបង្កើត និងញាតិញោមភូមិផងរបងជាមួយរបស់ព្រះអង្គ នៅភូមិតាត្រាវ ឃុំស្វាយចេក ស្រុកអង្គរធំ ខេត្តសៀមរាប និងពិធីបង្សុកូល ឧទ្ទិសកុសលជូនដល់បុព្វការីជន ជីដូនជីតា និងញាតិសន្តានព្រៀងលានដែលបានចែកឋានទៅហើយ ព្រមទាំងបានដឹកនាំយុវជនក្នុងមូលដ្ឋានផ្ងូតទឹកជូនព្រះរស់ និងញាតិចាស់ទុំ ជាកិច្ចតបគុណ រំឭកដល់ការលះបង់ដ៏ធំធេងរបស់ឪពុកម្តាយ ក្នុងការចិញ្ចឹមបីបាច់ថែរក្សាកូនចៅគ្រប់រូប ដែលជាប្រពៃណីទំនៀមទម្លាប់ពីដូនតាហើយ កូនចៅជំនាន់ក្រោយតែងតែគោរពធ្វើតាមជារៀងដរាបមកដោយបានប្រកាន់ខ្ជាប់ ក្នុងឱកាសពិធីបុណ្យចូលឆ្នាំថ្មីប្រពៃណីជាតិ ក៍មានរៀបចំពិធីភ្ងូតទឹកជូនព្រះរស់ រឺញាតិចាស់ទុំ ស្របគ្នានឹងការទៅចូលរួមពិធីស្រង់ព្រះនៅតាមទីអារាមតែម្តង។
ព្រះតេជគុណ ភ្លឿន រដ្ឋ មានសង្ឃដិកាថា ពិធីស្រង់ទឹកជូនព្រះកន្លោងនៅឯផ្ទះ តាមភូមិ គេអាចធ្វើមុនពិធីបុណ្យចូលឆ្នាំបានអាស្រ័យទៅលើភាពជាក់ស្តែង និងការឯកភាពគ្នា រវាងប្រជាពលរដ្ឋ អាជ្ញាធរ និងព្រះសង្ឃ ខណៈដែលពិធីស្រង់ព្រះ គេធ្វើនៅឯវត្ត ដែលពលរដ្ឋខ្មែរនិយមធ្វើនៅថ្ងៃទីបី នៃពិធីបុណ្យចូលឆ្នាំ ជាថ្ងៃវារៈឡើងស័ក។ ការស្រោចទឹកជូនអ្នកមានគុណអំឡុងពិធីបុណ្យចូលឆ្នាំថ្មី ជាពិធីបែបប្រពៃណីដែលពលរដ្ឋខ្មែរនិយមធ្វើតៗគ្នា ពីជំនាន់មួយទៅជំនាន់មួយ ដើម្បីសុំការអភ័យទោសពីលោកអ្នកមានគុណក្រែងមានកាយវិការសំដីសំដៅឆ្គាំឆ្កងជាមួយពួកគាត់ ទាំងអតីតកាល បច្ចុប្បន្ន ទាំងអនាគតកាល និងបង្ហាញពីការដឹងគុណ ដល់អ្នកមានគុណដែលបានខំថែរក្សាចិញ្ចឹមបីបាច់តាំងពីនៅក្នុងផ្ទៃមកម្ល៉េះ និងដើម្បីសុំពរជ័យសិរីសព្ទប្រកាពីអ្នកមានគុណ ឲ្យមានភាពសុដុមត្រជាក់ត្រជុំ ក្នុងឱកាសឆ្នាំចាស់ផ្លាស់ឆ្នាំថ្មី ទាំងអស់គ្នា។
បើតាមលោក ឈួន ឯម មេឃុំស្វាយចេក បានចាត់ទុកការធ្វើបុណ្យ និងការស្រោចទឹកដុសក្អែលជូនអ្នកមានគុណរបស់កូនចៅប្រុសស្រី ថាជាគំរូដ៍ល្អមួយ សម្រាប់ក្មេងៗជំនាន់ក្រោយយកតម្រាប់តាម។ សកម្មភាពបុណ្យទានគឺកើតឡើងពីកាយវាចាចិត្តរបស់បុគ្គលម្នាក់ៗ ដែលមានបំណងថានឹងធ្វើ ហេតុនេះសូមកូនក្មួយជំនាន់ក្រោយរួមគ្នាថែរក្សាការពារទំនៀមទម្លាប់ប្រពៃណី សាសនារបស់ជាតិខ្លួនឱ្យបានគង់វង្ស តាមរយៈការចូលរួមខ្នះខ្នែងជួយគ្នា ទាំងកម្លាំងកាយ និងធនធានដែលខ្លួនអាចធ្វើបាន នៅតាមកម្មវិធីបុណ្យណានីមួយក្តី ចៀសវាងការមិនអើពើ មើលបំណាំគ្នា និងត្រូវចេះគោរពឱនលំទោនប្រតិបត្តិការគួរសមជាមួយព្រះសង្ឃ ថ្នាក់ដឹកនាំ ចាស់ព្រឺទ្ឋាចារ្យ ទើបសមជាកូនខ្មែរដែលមានដែលមានប្រពៃណីទំនៀមទម្លាប់ដ៍ផូរផង់ និងដើម្បីក្លាយខ្លួនជាសសរទ្រូងដ៍រឹងមាំរបស់សង្គមជាតិនាពេលអនាគត។
ព័ត៌មានជាតិ ថ្មីៗ
សូមជំរាបថា កម្មវីធីបុណ្យកត្តញ្ញូកត្តវេទី និងបង្សុកូលនេះ ក៍មានការចែកទេយ្យទាន ដល់តាយាយចាស់ទុំ និងចែកសម្ភារសិក្សាដល់កុមារា កុមារី ក្នុងភូមិ និងមានការលេងល្បែងប្រជាប្រិយ ដូចជា៖ ទាញព្រ័ត្រ វាយក្អម និងរាំលេងកំសាន្តជាដើម៕
អត្ថបទ និង រូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
