តំបន់ទេសចរណ៍ធម្មជាតិមួយកន្លែង ស្ថិតខាងកើតជាប់ជើងភ្នំគូលេន កំពុងមានការទាក់ទាញអ្នកទេសចរទៅទស្សនា និងសំរាកកំសាន្ដទាំងថ្ងៃទាំងយប់ គឺ “សួនផ្កាធិស័ក្ដិ” ស្ថិតនៅភូមិបិតផ្កា ឃុំស្វាយលើ ស្រុកស្វាយលើ ពីខេត្ដសៀមរាប ដែលជាតំបន់ទេសចរណ៍មានការរៀបចំដោយទេសភាពធម្មជាតិពិតៗ រួមមានសួនផ្កាចំរុះពណ៌ ដែលមានទំហំប្រមាណ ៣ហិកតា បោះតង់លក្ខណៈគ្រួសារ អមដោយទេសភាពព្រៃភ្នំ ពើងថ្ម ពើងគំនូរពីបុរាណ កន្លែងក្មេងលេងកំសាន្ដ ជិះកង់ឡើងភ្នំ។
លោក ប៉ែន រតនា ជាអ្នកគ្រប់គ្រងសួនផ្កាខាងលើ មានបញ្ជាក់ថា នៅថ្ងៃបុណ្យចូលឆ្នាំថ្មីប្រពៃណីខ្មែរនាពេលខាងមុខនេះ “សួនផ្កាធិស័ក្ដិ” នឹងបើកឱ្យអ្នកទេសចរជាតិ និងអន្ដរជាតិទៅទស្សនាដោយមិនគិតថ្លៃនោះទេ ជាពិសេសទៅទៀតនៅថ្ងៃចូលឆ្នាំ កន្លែងទេសចរណ៍ធម្មជាតិជាប់ជើងភ្នំគូលេនេះ បានរៀបចំសង្ក្រាន្ដឆ្នាំថ្មី ដោយមានសិល្បៈករសម្ដែង និងលេងល្បែងប្រជាប្រិយ៍កំសាន្ដ ដើម្បីលើកតម្កើងវិស៍យទេសចរណ៍ឡើងវិញ បន្ទាប់ពីអាក់ខានរយៈពេល ២ឆ្នាំកន្លងមក ដើម្បីឱ្យប្រជាកសិកររកប្រាក់ចំណូលពីវិស័យទេសចរណ៍ក្នុងស្រុក សម្រាប់ផ្គត់ផ្គង់ជីវភាព។ សម្រាប់អ្នកទៅកំសាន្ដនៅទៅនោះ អាចទៅទស្សនាប្រាសាទបុរាណ ទឹកធ្លាក់ភ្នំគូលេនផងដែរ។ លោកបានអំពាវដល់អ្នកទេសចរក្នុងស្រុក ឱ្យចូលរួមលើកស្ទួយវិស័យទេសចរណ៍ឱ្យបានកាន់តែច្រើន ស្របតាមរាជរដ្ឋាភិបាលប្រកាសឱ្យចូលរួមលើកស្ទួយវិស័យទេសចរណ៍ក្នុងស្រុក៕
បើតាមភ្ញៀវទេសចរមួយចំនួនដែលបានមកកំសាន្តនៅសួងផ្កាខាងលើ បានលើកឡើងថា “សួនផ្កាធិស័ក្ដិ” ជើងភ្នំគូលេនេះ មានទេសភាពធម្មជាតិពិតៗ ដែលគួរឲ្យទាក់ទាញ ហើយពួកគាត់បានបានគាំទ្រចំពោះការបង្កើតកន្លែងទេសចរណ៍បែបធម្មជាតិ ព្រោះវាជួយផ្ដល់ការងារដល់អ្នកភូមិនៅក្បែនោះរកប្រាក់ចំណូលក្នុងជីវភាព។
ព័ត៌មានជាតិ ថ្មីៗ
អត្ថបទ និង រូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
