ព្រឹកថ្ងៃទី១៤ ខែមេសា ឆ្នាំ២០២២ ត្រូវនឹងថ្ងៃ ១៣កើត ខែចេត្រ ជាថ្ងៃដ៏នក្ខតឬក និងជាថ្ងៃទី១ នៃថ្ងៃចូលឆ្នាំថ្មីប្រពៃណីជាតិខ្មែរ ស្របនឹងខេត្តនេះ មានរៀបចំព្រឹត្តិការណ៍សៀមរាប-សង្ក្រាន្ត ចាប់ពីថ្ងៃទី១២ ដល់ទី១៦ ខែមេសា ឆ្នាំ២០២២ផងដែរ។ ក្នុងពិធីទទួលទេវតាឆ្នាំថ្មីនេះ យើងសង្កេតឃើញវត្តមានដ៏ខ្ពង់ខ្ពស់អញ្ជើញចូលរួមពីសម្តេចពិជ័យសេនាទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានក្រុមការងាររាជរដ្ឋាភិបាល ចុះជួយមូលដ្ឋានខេត្តសៀមរាប រួមទាំងឯកឧត្តម លោកជំទាវ សមាជិកព្រឹទ្ធសភា រដ្ឋសភា គណ:ប្រតិភូអមដំណើរ និងប្រធានក្រុមប្រឹក្សាខេត្ត អភិបាលខេត្ត ព្រមទាំងឯកឧត្តម លោកជំទាវមជាសមាជិក សមាជិការក្រុមប្រឹក្សាខេត្ត គណ:អភិបាលខេត្ត អាជ្ញាធរជាតិអប្សរា អស់លោក លោកស្រីជាថ្នាក់ដឹកនាំមន្ទីរ អង្គភាព អាជ្ញាធរ ក្រុង ស្រុក និងមន្ត្រីរាជការ រួមទាំងបងប្អូនប្រជាពុទ្ធបរិស័ទ អញ្ជើញចូលរួមក្នុងពិធីទៅតាមបែបវប្បធម៌ ប្រពៃណី សាសនានិងជំនឿ ដែលបានបង្កប់នៅក្នុងជីវិតរស់នៅរបស់ប្រជាជនកម្ពុជា ។
ក្នុងឱកាសចូលឆ្នាំៗនេះ រដ្ឋបាលខេត្តសៀមរាប សហភាពសហព័ន្ធយុវជនកម្ពុជាខេត្តសៀមរាប និងអាជ្ញាធរជាតិអប្សរា បានរួមសហការរៀបចំឡើងវិញនូវ សៀមរាប-សង្ក្រាន្ត នៅប្រាសាទចៅសាយទេវតា ប្រាសាទ និងនៅក្នុងក្រុងសៀមរាប បន្ទាប់ពីពិធីនេះត្រូវបានអាក់ខានអស់រយ:ពេល២ឆ្នាំដោយសារតែវិបត្តិជំងឺកូវីដ-១៩។ ក្នុងឱកាសចូលឆ្នាំថ្មីឆ្នាំនេះ រួមជាមួយនឹងព្រឹត្តិការណ៍សៀមរាប-សង្ក្រាន្ត ផង គេសង្កេតឃើញមានក្រុមកម្លោះ ក្រមុំ ចាស់ក្មេងប្រុសស្រីយ៉ាងច្រើនកុះករ សប្បាយរីករាយ ទឹកមុខស្រស់ស្រាយ សួរសុខទុក្ខគ្នាបង្ហាញពីក្តីនឹករលឹកបន្ទាប់ពីរងផលប៉ះពាល់ដោយសារតែវិបត្តិជំងឺកូវីដ-១៩ អស់រយ:ពេលជាង២ឆ្នាំកន្លងមក។ ពួកគាត់នាំគ្នា លេងល្បែងប្រជាប្រីយ៍ បោះអង្គុញ ចោលឈូង ទាញព្រ័ត្រ វាយឆ្នាំងដី លោកបាវ និងរាំលេងកំសាន្តសប្បាយផងដែរ។ បងប្អូនប្រជាពលរដ្ឋ បានសម្តែងនូវការអរគុណនិងដឹងគុណយ៉ាងជ្រាលជ្រៅ នូវគោលនយោបាយឈ្នះ ឈ្នះ របស់សម្តេចតេជោ ហ៊ុន សែន នាយករដ្ឋមន្ត្រី ដែលបាននាំមកនូវសន្តិភាព ពេញលេញ និងការរីកចម្រើនឡើង លើគ្រប់វិស័យជាលំដាប់របស់ប្រទេសជាតិយើង។ ជាពិសេសសមិទ្ធផលថ្មីគឺហេដ្ឋារចនាសម្ព័ន្ឋផ្លូវ ៣៨ខ្សែ នៅខេត្តនេះបានសាងសង់រួចរាល់ និងត្រូវបានសម្តេចអគ្គមហាសេនាបតីតេជោហ៊ុនសែន នាយករដ្ឋមន្ត្រី ហើយសម្ដេចបានប្រសិទ្ធិនាមខេត្តសៀមរាបថា ជាតារារះទិសឧត្តរ ។ អ្នកទេសចរណ៍ក្នុងស្រុកនិយាយថា អរគុណសម្តេចតេជោ ដែលបានផ្តល់ជូនវ៉ាក់សាំងចាក់ជូនដល់ប្រជាពលរដ្ឋកម្ពុជាដោយឥតគិតថ្លៃ ចាប់ពីដូសមូលដ្ឋានរហូតដល់ដូសជម្រុញ។ ដែលជាយ័នការពារដ៏សាកសិទ្ឋិ និងវិធានការ ៣កុំ និង៣ការពារ ទើបពួកខ្ញុំមានឱកាសបានជួបជុំ និងដើរកំសាន្តនាពេលនេះ។ ឯកឧត្តម ទៀ សីហា អភិបាល នៃគណ:អភិបាលខេត្ត ក្នុងឱកាសពិធីបើកសៀមរាប-សង្ក្រាន្តបានបញ្ជាក់ថា៖ នេះជាប្រវត្តិសាស្ត្រ ក្នុងការប្រារព្ធព្រឹត្តិការណ៍សៀមរាបសង្ក្រាន្ត ក្នុងបរិបទកូវិដ-១៩ ។ ឆ្នាំនេះសង្ក្រាន្តឆ្នាំថ្មី ត្រូវបានរៀបចំឡើងនៅតាមបណ្ដារាជធានី ខេត្តមួយចំនួន និងនៅខេត្តសៀមរាប ដើម្បីបង្ហាញអំពីកេរ្ត៍តំណែលវប្បធម៌ ទំនៀមទម្លាប់ប្រពៃណីដ៏ផូរផង់ខ្មែរយើង ដែលជាមោទន:ភាពជាតិ ។ តាមរយ:សៀមរាប -សង្ក្រាន្ដនេះ ខេត្តសៀមរាបរំពឹងទុកថា នឹងមានភ្ញៀវជាតិ និងអន្តរជាតិ ចូលទស្សនាកម្ពុជាឡើងវិញហើយចរន្តសេដ្ឋកិច្ចរបស់បងប្អូនប្រជាពលរដ្ឋ ក្នុងខេត្តក៏នឹងប្រសើរឡើងផងដែរ។ ឯកឧត្តមរម្លឹកផងដែរថា៖ ទោះជាស្ថិតក្នុងដំណាក់កាល នៃផលប៉ះពាល់ដោយសារជំងឺកូវីដធ្ងន់ធ្ងរក៏ដោយ ក៏រដ្ឋបាលខេត្ត ដោយមានការគាំទ្រពីរាជរដ្ឋាភិបាលបាន យកចិត្តទុកដាក់លើការកែលម្អសោភ័ណភាពក្រុងឱ្យបានកាន់តែល្អប្រសើរថែមទៀត ជាសក្ខីភាពហេដ្ឋារចនាសម្ព័ន្ធផ្លូវថ្នល់ ៣៨ខ្សែ ប្រព័ន្ធលូ ភ្លើងបំភ្លឺសាធារណ: និងកែលម្អស្ទឹងសៀមរាប គឺជាសមិទ្ធផលប្រវត្តិសាស្រ្តថ្មីមួយមិនអាចកាត់ថ្លៃបានរបស់សម្តេចតេជោ ហ៊ុន សែន នាយករដ្ឋមន្រ្តី សម្រាប់ខេត្តសៀមរាប ដែលបានធ្វើពិធីសម្ពោធដាក់ឱ្យប្រើប្រាស់ជាផ្លូវការ កាលពីថ្ងៃទី០៤ ខែមេសា ឆ្នាំ២០២២កន្លងទៅថ្មីៗនេះ ក្រោមអធិបតីភាពដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ហើយសម្តេចបានប្រសិទ្ធិនាមខេត្តសៀមរាបថាជាតារារះនៅទិសឧត្តរ។លោក ប្រាក់ សោភ័ណ្ឌ អភិបាលរងខេត្ត និងជាប្រធានសហភាពសហព័ន្ធយុវជនកម្ពុជាខេត្ត បានឲ្យដឹងថា ឧត្តមភាពនៃវប្បធម៌ និងការផ្សព្វផ្សាយព្រឹត្តិការណ៍សៀមរាបសង្រ្កាន្តនេះ កន្លងមកបានបង្កើននូវភាពទាក់ទាញ ដល់ភ្ញៀវទេសចរណ៍ ក្នុង និងក្រៅប្រទេស ចូលមកទស្សនាកម្សាន្តខេត្តនេះកាន់តែមានការកើនឡើងជាបន្តបន្ទាប់។
៕ អត្ថបទ និងរូបភាព: លោកយូ វង្ស កែសម្រួលដោយ លីវ សុខុន!!!
