កាលពីចុងសប្តាហ៍នេះ ក្រុមការងារយុវជនសង្កាត់សៀមរាប ដោយបានការគាំទ្រពីអាជ្ញាធរសង្កាត់ និងក្រោមការសហការពីមេភូមិ ព្រះសង្ឃ និងបងប្អូនប្រជាពលរដ្ឋ បានស្ម័គ្រចិត្ត សាមគ្គីគ្នារៀបចំបោសសំអាតបរិស្ថានតាមដងផ្លូវ និងមាត់ប្រឡាយចាស់មានប្រវែងប្រមាណជាង ១គីឡូម៉ែត្រ ចាប់ពីផ្សាវត្តអធ្វា ទៅកាន់ភូមិសាស្ត្រនៃភូមិចំនួនពីរ គឺភូមិស្ពានជ្រាវ និងភូមិកក្រាញ់ ស្ថិតក្នុងសង្កាត់សៀមរាប ក្រុងសៀមរាប ប្រើរយៈពេល៥ថ្ងៃ គិតពីថ្ងៃទី២៣ ខែមេសា ឆ្នាំ២០២២កន្លងមក។
លោក ទូច ដារិទ្ឋ ក្រុមការងារយុវជនសង្កាត់សៀមរាបបានឱ្យដឹងថា ដោយមើលឃើញពីភាពកង្វះអនាម័យមានព្រៃស៊ុបទ្រុប ភាពកកស្ទះចរន្តទឹកហូរនៃប្រឡាយចាស់ និងដោយមើលឃើញពីទិដ្ឋភាពក្នុងមូលដ្ឋាននេះ មានប្រាសាទបុរាណ មានវត្ត មានអ្នកទេសចរចេញចូល ហើយជាប្រឡាយដ៍ចំណាស់មួយដែលកាលពីមុនមានទឹកហូរ ខួបប្រាំងខួបវស្សា ជួយបង្កលក្ខណៈងាយស្រួលដល់ការដាំដុះបន្លែបង្ការរបស់បងប្អូនមួយចំនួន ក៍នាំគ្នាផ្តើមគំនិតអំពាវនាវឱ្យមានការចូលរួម តាមរយៈជាថវិកា ទោះតិចក្តីច្រើនក្តី ដើម្បីយកមកទិញសម្ភារៈមាន ចប បង្គី កាំបិតផ្គាក់ ស្រោមដៃស្រោមជើងសម្រាប់ពាក់ពេលចុះកាប់កាយជាដើម។ល។ តាមរយៈការអំពាវនាវក្រុមការងារ ក៍ទទួលបានថវិកាពីគ្រួសារមួយចំនួននិងគ្រួសារមួយចំនួនទៀតស្ម័គ្រចិត្តប្រើកម្លាំងកាយទៅតាមលទ្ឋភាព។
លោក ម៉ៃ សាមេត ចៅសង្កាត់សៀមរាប បានបង្ហាញការគាំទ្រ កោតសរសើរនិងថ្លែងអំណរគុណដល់ក្រុមការងារយុវជនចុះជួយមូលដ្ឋានសង្កាត់សៀមរាប ព្រមទាំងបងប្អូនប្រជាពលរដ្ឋក្នុងភូមិទាំងពីរ និងសប្បុរសជននានា ដែលបានលះបង់ជាថវិកានិងកម្លាំងកាយ ដើម្បីរួមគ្នាឆ្ការព្រៃនិងបារភក់ចេញពីប្រឡាយនេះ ដើម្បីសុខមាលភាពសាធារណៈផង ដើម្បីបានទឹកប្រើប្រាស់សម្រាប់ការដាំដុះបន្លែក្បែរខាងផ្ទះ ក៍ដូចជាជួយលើកសម្រស់ទិដ្ឋភាពក្នុងមូលដ្ឋាន ឱ្យសមជាសហគមន៍ទេសចរណ៍ ដែលមានផាសុខភាព មានភាពទាក់ទាញដោយបរិស្ថានស្អាត។
លោក ចៅសង្កាត់ មានប្រសាសន៍ថា ប្រឡាយនេះកើតមានយូរមកហើយៗកន្លងមកអាជ្ញាធរសង្កាត់ ក៍តែងតែចលនាឱ្យចូលរួមកាប់ឆ្ការគុម្ពោធព្រៃ តាមមាត់ប្រឡាយជាញយដងដែរ តែអ្នកចូលរួមមិនច្រើនដូចលើកនេះទេ។ តាមរយៈការជួយពីក្រុមយុវជនសង្កាត់នាពេលនេះដែរ សង្ឃឹមថាទិដ្ឋភាពនៃប្រឡាយចាស់នេះ នឹងមានទឹកហូរឡើងវិញ ភូមិឋានមានអនាម័យល្អ កាត់បន្ថយជម្រកមូសនិងសត្វអសិរពិសផ្សេងៗ ជាពិសេសជួយលើកមុខមាត់តំបន់ប្រាសាទបុរាណ និងក៍ជាចំណែកមួយចូលរួមក្នុងការលើកកម្ពស់ទីក្រុងវប្បធម៌អាស៊ាន ដោយសារក្រុងសៀមរាបត្រូវបានជ្រើសរើសជាទីក្រុងវប្បធម៌អាស៊ានសម្រាប់ឆ្នាំ ២០២១-២០២២ កាលពីពេលថ្មីៗនេះ៕
អត្ថបទ និង រូបភាព៖ លោក យូ វង្ស
