ផ្លូវបេតុងមួយខ្សែ មានប្រវែង ១,៨៧០ម៉ែត្រ ទទឹង៦ម កម្រាស់ 0,១៦ម៉ែត្រ រួមនឹងហេដ្ឋារចនាសម្ព័ន្ឋដូចជាបំពាក់អំពូលសូឡាតាមដងផ្លូវ លូរំដោះទឹកភ្លៀង និងសមទ្ធផលមួយចំនួនទៀត ដែលចំណាយថវិកាអស់ជាង ៣០ម៉ឺនដុល្លារ ស្ថិតនៅភូមិភ្នំក្រោម សង្កាត់សៀមរាប ក្រុងសៀមរាប ត្រូវបានសម្ពោធដាក់ឱ្យប្រើប្រាស់ជាផ្លូវការ នៅព្រឹកថ្ងៃទី០៩ ខែឧសភា ឆ្នាំ២០២២ ក្រោមអធិបតីភាព លោក នួន ពុទ្ឋារ៉ា អភិបាលក្រុង ដោយមានការចូលរួមពីសំណាក់ លោកលោកស្រីក្រុមការងារខេត្តចុះជួយមូលដ្ឋានសង្កាត់សៀមរាប អាជ្ញាធរមូលដ្ឋាន លោកគ្រូអ្នកគ្រូ សិស្សានុសិស្ស សប្បុរសជនជិតឆ្ងាយ និងប្រជាពលរដ្ឋ សរុបជាង ៣០០នាក់។
បើតាមលោក ម៉ៃ សាមេត ចៅសង្កាត់សៀមរាប បានឲ្យដឹងថា សមិទ្ឋផលនៃផ្លូវបេតុងមួយខ្សែនេះ កើតឡើងក្រោមការផ្តួចផ្តើមរបស់ព្រះតេជគុណ ហាប់ ចយ អតីតព្រះចៅអធិការវត្តភ្នំក្រោម រួមនឹងព្រះសង្ឃ អាចារ្យ គណៈកម្មការវត្ត អាជ្ញាធរមូលដ្ឋានបានមូលមតិគ្នាកៀរគរពីប្រជាពុទ្ឋបរិស័ទ និងសប្បុរសជនជិតឆ្ងាយ បរិច្ចាកធនធានថវិកាផ្ទាល់ខ្លួន ក្នុងនោះ ក៍ទទួលបានថវិកាចូលរួមពីទីក្រុងស៊ូវ៉ុន សាធារណៈរដ្ឋកូរ៉េជាង ៦ម៉ឺនដុល្លារផងដែរ សាងសង់រួចកាលពីដើមឆ្នាំ២០២១ ដើម្បីរួមចំណែកបម្រើផលប្រយោជន៍បងប្អូនប្រជាពលរដ្ឋក្នុងមូលដ្ឋានក៍ដូចជាសាធារណៈជនទូទៅ។
លោកចៅសង្កាត់បញ្ជាក់ថា គិតមកដល់ពេលនេះ មូលដ្ឋានសង្កាត់សៀមរាប មានផ្លូវបេតុងចំនួន ១០ខ្សែក្នុងនោះសាងសង់ដោយរាជរដ្ឋាភិបាលចំនួន ៣ខ្សែ មូលនិធិឃុំសង្កាត់ ៤ខ្សែ និងសាងសង់ដោយព្រះសង្ឃ និងសប្បុរសជនចំនួន ៣ខ្សែ។ សម្រាប់ប្រពលរដ្ឋក្នុងសង្កាត់នេះជាង ៤០% ប្រកបរបរកសិកម្ម ជាង ៥០% ប្រកបអាជីវកម្មជាមួយសេវាកម្មនានា និងជិត ១ភាគរយទៀតប្រកបរបរសិប្បកម្ម។
មានប្រសាសន៍ក្នុងឱកាសនោះ លោក នួន ពុទ្ឋារ៉ា អភិបាលក្រុងសៀមរាប ចាត់ទុកនូវសមិទ្ឋផលនៃផ្លូវមួយខ្សែនេះ ថាពិតជាមានអត្ថប្រយោជន៍យ៉ាងធំធេងណាស់ ក្នុងការរួមចំណែកបម្រើផលប្រយោជន៍បងប្អូនប្រជាពលរដ្ឋក្នុងមូលដ្ឋានក៍ដូចជាសាធារណៈជនទូទៅ ស្របតាមផែនការរបស់រដ្ឋបាលក្រុង រដ្ឋបាលខេត្ត តែងតែចាត់ទុកបញ្ហាផ្លូវជាអាទិភាពចម្បង និងស្របតាមសូចនាករនៃគោលនយោបាយកសាងហេដ្ឋារចនាសម្ព័ន្ឋរបស់រាជរដ្ឋាភិបាល ក្នុងការអភិវឌ្ឍហេដ្ឋារចនាសម្ព័ន្ឋផ្លូវថ្នល់ ដើម្បីសម្រួលដល់ការធ្វើដំណើរ និងលើកស្ទួយកម្រិតជីវភាពរស់នៅរបស់ប្រជាពលរដ្ឋគ្រប់ទីកន្លែងផងដែរ។ ផ្លូវនេះជាឆ្អឹងខ្នង ជាសរសៃឈាមសេដ្ឋកិច្ចមួយយ៉ាងសំខាន់ ជួយលើកកំពស់ដល់វិស័យទេសចរណ៍ ជាពិសេសរួមចំណែកលើកស្ទួយជីវភាពរស់នៅនិងជួយសម្រួលការធ្វើដំណើររបស់បងប្អូនប្រជាពលរដ្ឋ និងសិស្សានុសិស្ស ក្នុងការធ្វើដំណើរទៅសាលារៀននិងដឹកជញ្ជូនភោគផលផ្សេងៗ។
លោកអភិបាលក្រុង ក៏សូមថ្លែងអំណរគុណយ៉ាងជ្រាលជ្រៅចំពោះសម្ដេចតេជោ ហ៊ុន សែន នាយករដ្ឋមន្ដ្រី នៃព្រះរាជាណាចក្រកម្ពុជា បានផ្ដល់វិកាកសាងហេដ្ឋារចនាសម្ព័ន្ឋផ្លូវ ៣៨ខ្សែ ដែលបានសាងសង់រួចរាល់ហើយនោះ ថាជាចំណងដៃដ៍ថ្លៃថ្លាថ្មីមួយទៀតសម្រាប់អ្នកក្រុងសៀមរាប ហើយសមិទ្ធិផលនោះបានជួយកែលំអរសោភណ្ឌភាពទីក្រុងសៀមរាប ឱ្យក្លាយជាទីក្រុងដ៏ទំនើប ពោរពេញដោយសោភ័ណភាព បរិស្ថានល្អសម្រាប់ការ រស់នៅសក្ដិសមជាទីក្រុងទេសចរណ៍ វប្បធម៌ និងប្រវត្តិសាស្ត្រ អាចទាក់ទាញភ្ញៀវទេសចរណ៍បានកាន់តែច្រើនសំដៅលើកស្ទួយសេដ្ឋកិច្ចជាតិឱ្យកាន់តែមានការរីកចម្រើន ព្រមទាំងធ្វើឱ្យប្រសើរឡើងដល់ការតភ្ជាប់ពីទីប្រជុំជនក្រុងសៀមរាបទៅកាន់តំបន់ដាច់ស្រយាលផងដែរ។ លោកក៍បានអំពាវនាវដល់ព្រះសង្ឃ ដូនជីតាជី និងបងប្អូនប្រជាពលរដ្ឋក្នុងក្រុងសៀមរាប សូមនិមន្ត និងអញ្ជើញ ទៅចាក់វ៉ាក់សាំងការពារជំងឺកូវីដ-១៩ ដូសទី៣ និងដូសទី៤ ដោយឥតគិតថ្លៃនៅ តាមគោលដៅដែលរដ្ឋបាលក្រុងសង្កាត់បានរៀបចំឲ្យបានគ្រប់ៗគ្នា៕
អត្ថបទ និង រូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
