កាលពីរសៀលថ្ងៃទី១៥ ខែឧសភា ឆ្នាំ២០២២ ប្រជាពលរដ្ឋ សិស្សានុសិស្ស រួមនិងព្រះសង្ឃជាច្រើនអង្គនាក់ បានធ្វើការដង្ហែក្បួន ដើម្បីអបអរសាទពិធីបុណ្យវិសាខបូជា ដែលជាថ្ងៃ ព្រះសម្មាសម្ពុទ្ធទ្រង់ប្រសូត្រ បានត្រាស់ដឹង និងបរិនិពាន្ធ។
មានវត្តមានចូលរួមក្នុងក្បួនដង្ហែនោះ លោកស្រី កៅ គន្ធា បានឱ្យដឹងថា ដោយសារជំងឺកូវីដ-១៩ រយៈពេល២ឆ្នាំកន្លងមកនេះ ពុទ្ធបរិស័ទក្នុងខេត្តសៀមរាប ក៏ដូចជានៅទូទាំងប្រទេសបានផ្អាកការជួបជុំប្រារព្ឋពិធីបុណ្យវិសាខបូជា រួមនិងពិធីសាសនាធំៗជាច្រើនទៀត។ លោកស្រីបន្តថា ដោយសារគោលនយោបាយ និងការដឹកនាំ ដ៏ត្រឹមត្រូវរបស់រាជរដ្ឋាភិបាល ប្រទេសយើងគ្រប់គ្រងបានទាំងស្រុងនូវបញ្ហាកូវីដ-១៩នេះ ហើយប្រមុខរាជរដ្ឋាភិបាលបានអនុញ្ញាតឱ្យមានការជួបជុំ និងប្រារព្ធកម្មវិធីនានាឡើងវិញ ទើបលោកស្រីបានចូលរួមពិធីពិសាខបូជានេះ។
គរុនិស្សិតមកពីសាលាគរុកោសល្យខេត្ដសៀមរាប បានបង្ហាញចំណាប់អារម្មណ៍របស់ពួកគាត់ថា ពិធីបុណ្យពិសាខបូជា មិនត្រឹមតែជាពិធីសាសនា សម្រាប់រំលឹក និងការគោរពចំពោះព្រះសម្មាសម្ពុទ្ធប៉ុណ្ណោះទេ ពិធីនេះ ក៏បានទាក់ទាញអ្នកទេសចរឱ្យចាប់អារម្មណ៍ពីក្រុងសៀមរាប ដែលជាតំបន់ទេសចរណ៍ដ៏ធំមួយរបស់កម្ពុជាផងដែរ។
សូមជម្រាបថា ពិធីដង្ហែក្បួននេះ មានការសម្ដែងព្រះធម៌ ដោយចេញពីចំណុចបរិវេណវត្ដព្រះរាជបូណ៌ ស្ថិតនៅសង្កាត់សាលាកំរើក ឆ្ពោះទៅតាមបណ្ដោយផ្លូវដងស្ទឹងសៀមាប ព្រមទាំងឆ្លងកាត់តាមបណ្ដាផ្លូវសំខាន់ៗមួយចំនួន នៅក្រុងសៀមរាប។ នៅថ្ងៃដដែលនោះ គេក៏សង្កេតឃើញមានការដង្ហែក្បួន និងពិធីសាសនាជាច្រើនទៀត នៅក្នុងតំបន់រមណីយដ្ឋានអង្គរ ព្រមទាំងមានរៀបចំពិធីបំបួសកុលបុត្រ កុលធីតា ចំនួន២០០អង្គផងដែរ។
គួររំលឹកថា បុណ្យវិសាខបូជា គឺជាពិធីបុណ្យសាសនាដ៏ធំមួយ ក្នុងចំណោមបុណ្យសាសនាដទៃៗទៀត ។ បើតាមគម្ពីរព្រះត្រៃបិតកបង្ហាញថា ព្រះសម្មាសម្ពុទ្ឋ ទ្រង់ប្រសូត ត្រាស់ដឹង និងបរិនិព្វាន ក្នុងថ្ងៃ១៥កើត ពេញបូណ៌មី ខែវិសាខ ដូច្នេះ បុណ្យវិសាខបូជា គឺតំណាងឱ្យ «ថ្ងៃទាំងបី» នៃព្រះសម្មាសម្ពុទ្ឋ។ ការប្រារព្ធពិធី ក្នុងសាសនាព្រះពុទ្ធនេះ គឺជាតួនាទីពុទ្ធបរិសទ្ធគ្រប់រូប ដើម្បីថែរក្សាការពារ និងផ្សព្វផ្សាយនូវគុណតម្លៃរបស់ព្រះពុទ្ធសាសនា និងដើម្បីបញ្ជាក់ពីកតញ្ញូ ចំពោះព្រះពុទ្ធជាម្ចាស់ ដែលជាវិថីឆ្ពោះទៅរកសេចក្តីសុខ សុភមង្គល និងសន្តិភាពសម្រាប់ជីវិតសត្វលោកគ្រប់ស្រទាប់វណ្ណៈដែលមិនអាចកាត់ថ្លៃបាន៕
អត្ថបទ និង រូបភាព៖ លោក ជា ស្រស់ និងលោក បូ សាវី
កែសម្រួល៖ លោក សេង ផល្លី
