ជនសង្ស័យ ២នាក់ ដែលបានបំផ្ទុះរំសេវកែច្នៃ ក្នុងក្រុងសៀមរាបកាលពីយប់ថ្ងៃទី៣ ខែមិថុនា ដែលជាថ្ងៃបិទយុទ្ធនាការឃោសនាបោះឆ្នោតឃុំ សង្កាត់អាណត្តិទី៥កន្លងទៅនេះ ត្រូវបានសមត្ថកិច្ចឃាត់ខ្លួនបានហើយកាលពីថ្ងៃទី៧ ខែមិថុនា ឆ្នាំ២០២២។
តាមការឱ្យដឹងពី លោកវរសេនីយ៍ឯក ដា ចំរើន អធិការ នៃអធិការដ្ឋាននគរបាលក្រុងសៀមរាប បានបង្ហាញថា ក្រោមការយកចិត្តទុកដាក់របស់លោកស្នងការនគរបាលខេត្តសៀមរាប សមត្ថកិច្ចគ្រប់លំដាប់ថ្នាក់ បានស្រាវជ្រាវរយៈពេល ៣ថ្ងៃ និងឈានទៅឃាត់ខ្លួន ជនសង្ស័យទី១ ឈ្មោះ សេង សុកន ភេទប្រុស អាយុ ១៨ ឆ្នាំ ជាសិស្សរៀនជួសជុលម៉ូតូ មានស្រុកកំណើតនៅប្រទេសថៃ និងមានជំនាញកែច្នៃគ្រាប់រំសេវ បានមកស្នាក់នៅបន្ទប់ជួលក្នុងភូមិតាភុល សង្កាត់ស្វាយដង្គំ ក្រុងសៀមរាប និងជនសង្ស័យទី២ ឈ្មោះ រ៉ន ដារ៉ុង ហៅហ៊ីង ភេទប្រុស អាយុ ២០ឆ្នាំ ជាសិស្សរៀនជួសជុលម៉ូតូ មានស្រុកកំណើតនៅភូមិព្រៃស្រមោច ឃុំកំពង់ឃ្លាំង ស្រុកសូទ្រនិគម ខេត្តសៀមរាប។
តាមចម្លើយសារភាពរបស់ជនសង្ស័យ មូលហេតុ ដែលបង្កឱ្យមានការបំផ្ទុះគ្រាប់រំសេវកែច្នៃនេះ គឺដោយសារជនសង្ស័យឈ្មោះ រ៉ន ដារ៉ុង ធ្លាប់មានជម្លោះហិង្សាជាមួយក្រុមជនទំនើងមួយក្រុម និងបានប្រាប់ទៅឈ្មោះ សេង សុកន ដោយបានទិញផាវគ្រាប់បាល់ចំនួន៥០គ្រាប់ យករំសេវមកលាយជាមួយថ្មម៉ិច រុំថង់ប្លាស្ទិក និងស្កុត និងផលិតបានគ្រឿងផ្ទុះកែច្នៃចំនួន ៥គ្រាប់។
សមត្ថកិច្ចបន្ថែមថា ជនសង្ស័យទាំង២ បានជិះម៉ូតូមកដល់នៅក្នុងភូមិស្វាយដង្គុំ សង្កាត់ស្វាយដង្គុំ ជាកន្លែងក្រុមជនទំនើងដែលធ្លាប់វាយខ្លួន តែងជួបជុំគ្នា និងបានបំផ្ទុះគ្រាប់រំសេវកែច្នៃចំនួន ១គ្រាប់ ដោយឈ្មោះ សេង សុកន ដើម្បីជាការគម្រាម។ ក្រោយធ្វើសកម្មភាពរួច ជនសង្ស័យទាំង២ ក៏បានយកគ្រាប់រំសេវកែច្នៃចំនួន ៤គ្រាប់ ដែលនៅសល់ ហែកបោះចោលតាមផ្លូវ។
តាមការបញ្ជាក់ របស់សមត្ថកិច្ច ការបំផ្ទុះគ្រាប់បែកកែច្នៃនោះ ពុំមានបង្កឱ្យមានមនុស្សរងរបួស ឬស្លាប់ឡើយ។ ក្នុងនោះ កម្លាំងសមត្ថកិច្ច បានដកហូតវត្ថុតាងបានម៉ូតូជនសង្ស័យជិះធ្វើសកម្មភាពចំនួន ១គ្រឿង និងកំពុងរៀបចំកសាងសំណុំរឿងបញ្ជូនទៅកាន់តុលាការខេត្ត ដើម្បីចាត់ការបន្តតាមនីតិវិធី។
អត្ថបទ និង រូបភាព៖ លោក ម៉ី សុខារិទ្ធ និងស្នងការដ្ឋាននគរបាលខេត្តសៀមរាប
កែសម្រួល៖ លោក សេង ផល្លី
