ជនសង្ស័យចំនួន ០៥នាក់ កាលពីថ្ងៃទី១៣ ខែមិថុនា ឆ្នាំ២០២២នេះ ត្រូវបានកម្លាំងសមត្ថកិច្ចនគរបាលក្រុងសៀមរាប ធ្វើការឃាត់ខ្លួនជាប់ពាក់ព័ន្ធនឹងករណី ឆបោក នៅចំណុចភូមិត្រពាំងវែង សង្កាត់ក្របីរៀល ក្រុង/ខេត្តសៀមរាប។
លោកវរសេនីយ៍ឯក ដា ចំរើន អធិការ នៃអធិការដ្ឋាននគរបាលក្រុងសៀមរាប បានឲ្យដឹងថា ការឃាត់ខ្លួននេះធ្វើឡើងបន្ទាប់ពីទទួលពាក្យបណ្ដឹងពីប្រជាពលរដ្ឋ កាលពីថ្ងៃទី១១ ខែមិថុនា ឆ្នាំ២០២២ ថាមានករណីជនឆបោក ដោយមានបុរសចំនួន ០៥នាក់ បានអះអាងថាខ្លួនជាឯកឧត្តម ឬឧកញ៉ា យកម៉ាស៊ីនភ្លើងលក់ នៅចំនុចភូមិត្រពាំងវែង សង្កាត់ក្របីរៀល ក្រុង/ខេត្តសៀមរាប។ ជនសង្ស័យទាំង ០៥នាក់ បានជិះរថយន្តម៉ាកឡិចស៊ីស RX300 ពណ៌ខ្មៅ ពាក់ផ្លាកលេខភ្នំពេញ ២R-៤១៧៩ បានចូលទៅផ្ទះជនរងគ្រោះ រស់នៅភូមិកើតហេតុ ដោយប្រាប់ជនរងគ្រោះថាខ្លួនជាឯកឧត្តម មានម៉ាស៊ីនភ្លើងលក់ ដោយលក់ក្នុងតម្លៃដើម ១២០០ដុល្លារ ហើយចង់លក់យកលុយទិញស្រាផឹក បើទិញពួកខ្លួនលក់តែតម្លៃ ៧០០ដុល្លារទេ។ ពេលនោះជនរងគ្រោះមិនព្រមទិញ ក៏ធ្លាក់ថ្លៃក្នុងតម្លៃត្រឹមតែ ៤០០ដុល្លារប៉ុណ្ណោះ តែជនរងគ្រោះនៅតែមិនទិញដដែល។ បន្ទាប់មកជនសង្ស័យបានលួងលោមជនរងគ្រោះ ដោយព្រមលក់ចំនួន ២៧០ដុល្លារ ខណៈពេលដែរនាំជនរងគ្រោះទៅយកប្រាក់ ក្រុមជនសង្ស័យម្នាក់ទៀត បានប្រាប់ទៅប្អូនប្រុសជនរងគ្រោះថា ជនរងគ្រោះនៅខ្វះលុយ ឱ្យថែមស្រាបៀរ ចំនួន ១៥កេស ហើយប្អូនជនរងគ្រោះ ក៏លើកស្រាបៀរដាក់លើរថយន្តជនសង្ស័យ បន្ទាប់ពីធ្វើសកម្មភាពរួច ជនសង្ស័យបាននាំគ្នាបើករថយន្តគេចខ្លួនបាត់ ។
លោកវរសេនីយ៍ឯក ក្រោយពីទទួលពាក្យបណ្តឹងពីជនរងគ្រោះ នៅថ្ងៃទី១៣ ខែមិថុនា ឆ្នាំ២០២២ សមត្ថកិច្ចបានស្រាវជ្រាវ និងស្វែងរកជនសង្ស័យ រហូតប្រទះឃើញក្រុមជនសង្ស័យ កំពុងបម្រុងធ្វើសកម្មភាពម្តងទៀតនៅផ្សារកន្រ្តក ក្នុងភូមិកន្រ្តក សង្កាត់ស្វាយដង្គំ ក្រុង/ខេត្តសៀមរាប។ ភ្លាមនោះពួកគេបានព្យាយាមរត់គេច រហូតដល់ចំណុចខាងលិចរង្វង់ស្វាយធំ ក្នុងភូមិជ្រៃ ឃុំកណ្តែក ស្រុកប្រាសាទបាគង ក៏ត្រូវសមត្ថកិច្ចឃាត់ខ្លួនបានតែម្ដង។ ក្នុងនោះជនសង្ស័យទាំង ០៥នាក់រួមមនា៖ ទី១/ឈ្មោះ សុះ សាលី ភេទប្រុស អាយុ ៥២ឆ្នាំ មុខរបរមិនពិតប្រាកដ មានស្រុកកំណើតនៅភូមិព្រែករាំង ឃុំព្រៃតាសេក ស្រុកមុខកំពូល ខេត្តកំពង់ចាម, ទី២/ឈ្មោះ មឿន សារ៉ាវី ហៅសឿន សាវី ភេទប្រុស អាយុ៥០ឆ្នាំមុខរបរយោធាព្យួរឈ្មោះ នៅកងពលអន្តរាគមន៍លេខ២ ជើងគោក មានស្រុកកំណើត នៅភូមិកំពង់សំបូរ ឃុំសំរោង ស្រុកសង្កែ ខេត្តបាត់ដំបង, ទី៣/ឈ្មោះ ទីន លី ភេទប្រុស អាយុ៥៨ឆ្នាំ មុខរបរមិនពិតប្រាកដ មានស្រុកកំណើតនៅភូមិព្រែកតាងួន ឃុំព្រែកតាងួន ស្រុកកោះសូទិន ខេត្តកំពង់ចាម, ទី៤/ឈ្មោះ ឈុន សុជា ហៅហ៊ុយ ភេទប្រុស អាយុ៤៥ឆ្នាំមុខរបរមិនពិតប្រាកដ មានស្រុកកំណើតនៅភូមិស្តៅ ឃុំត្រែង ស្រុកវឌ្ឍនសង្គម ខេត្តបាត់ដំបង និងទី៥/ឈ្មោះ ស្មាន ស្មាអែល ភេទប្រុស អាយុ ៤៣ឆ្នាំមុខរបរមិនពិតប្រាកដមានស្រុកំណើត បច្ចុប្បន្នភូមិឃ្លាំងស្បែក ឃុំកំពង់ហ្វួង ស្រុកពញាឮ ខេត្តកណ្តាល។
ក្រោយឃាត់ខ្លួន ជនសង្ស័យទាំង ០៥នាក់ បានបានឆ្លើយសារភាពថា ពួកខ្លួនពិតជាបានធ្វើសកម្មភាព ឆបោកពិតប្រាកដមែន។ បច្ចុប្បន្នជនសង្ស័យខាងលើ ត្រូវបានសមត្ថកិច្ចបញ្ជូនខ្លួនទៅការិយាល័យជំនាញ ដើម្បីបន្តនីតិវិធី៕
អត្ថបទ និង រូបភាព៖ លោក អ៊ុន ណារាជ្យ
