នាព្រឹកថ្ងៃទី២០ ខែមិថុនា ឆ្នាំ២០២២នេះ នៅសាលប្រជុំសាលាខេត្តសៀមរាប អង្គភាពច្រកចេញចូលតែមួយ និង ការិយាល័យប្រជាពលរដ្ឋ ដោយមានកិច្ចសហការជាមួយអង្គការតម្លាភាព បានបើកអង្គសិក្ខាសាលាផ្សព្វផ្សាយមួយ ស្តីពីកម្មវិធីទូរស័ព្ទដៃ សម្រាប់ទទួលព័ត៌មានត្រឡប់ពីប្រជាពលរដ្ឋ អំពីការផ្តល់សេវាសាធារណៈនៅថ្នាក់ក្រោមជាតិ ក្រោមអធិបតីឯកឧត្តម សួស សុខចាន់ សមាជិកក្រុមប្រឹក្សាខេត្ត ដោយមានការនិមន្ត និងអញ្ជើញចូលរួមពីព្រះសង្ឃ ថ្នាក់ដឹកនាំ មន្ទីរ អង្គភាពនានាក្នុងខេត្ត អង្គការសង្គមស៊ីវិល លោកគ្រូអ្នកគ្រូ សិស្ស និង និស្សិត មកពីបណ្តាសាកលវិទ្យាល័យនានាក្នុងខេត្ត សរុបចំនួន២០០នាក់ ។
កញ្ញា ឈន រក្សា មន្ត្រីសម្របសម្រួលជាន់ខ្ពស់ប្រចាំខេត្តសៀមរាប នៃអង្គការតម្លាភាព បានបញ្ជាក់ថា គោលបំណងនៃអង្គសិក្ខាសាលានេះ គឺដើមី្បបន្តនិងពង្រីកវិសាលភាពនៃគម្រោងជាមួយនឹងគោលបំណងចម្បងៗ ក្នុងការពង្រឹងសមត្ថភាពមន្ត្រីក្រសួងមហាផ្ទៃ និង ផ្សព្វផ្សាយពីតួនាទី និង ភារកិច្ចរបស់អង្គភាពច្រកចេញចូលតែមួយ និង ការិយាល័យ ប្រជាពលរដ្ឋ និង កម្មវិធីទូរស័ព្ទដៃ សម្រាប់ទទួលព័ត៌មានត្រឡប់ពីប្រជាពលរដ្ឋ ទាក់ទងនឹងការផ្តល់សេវារដ្ឋបាលនៅ ថ្នាក់ក្រោមជាតិ សំដៅពង្រឹងយន្តការផ្តល់ព័ត៌មានត្រឡប់ដោយ ប្រជាពលរដ្ឋ តាមរយៈការផ្តួចផ្តើមផលិតកម្មវិធីទូរស័ព្ទដៃ និង បន្តប្រើប្រាស់ឧបករណ៍ល្អៗ ដែលមានកន្លងមក សម្រាប់ឆ្លុះបញ្ចាំងពីការផ្តល់សេវាសាធា រណៈ ។
ឯកឧត្តម សួស សុខចាន់ សមាជិកក្រុមប្រឹក្សាខេត្ត បានលើកឡើងថា ការអនុវត្តកម្មវិធីកំណែទម្រង់ វិមជ្ឈការ និង សហវិមជ្ឈការ ដែលរាជរដ្ឋាភិបាលបានដាក់ចេញជាបន្តបន្ទាប់មកនោះ បានធ្វើការកំណែទម្រង់ធំៗជាច្រើន ដល់រដ្ឋបាលថ្នាក់ក្រោមជាតិ តាមរយៈការបន្តពង្រឹង និង អភិវឌ្ឍន៍ធនធានមនុស្ស ការផ្ទេរមុខងារ ធនធានថវិកា និង ទ្រព្យសម្បត្តិ គឺបានធានាឲ្យរដ្ឋបាលគ្រប់ថ្នាក់ក្រោមជាតិ ប្រកបដោយគណនេយ្យភាព តម្លាភាព និង ការឆ្លើយតប ក្នុងការផ្តល់សេវាសាធា រណៈ សម្រាប់ការអភិវឌ្ឍន៍មូលដ្ឋាន ដើមី្បរួមចំណែកអភិវឌ្ឍន៍ សង្គមសេដ្ឋកិច្ចជាតិប្រកបដោយចិរភាព ដែលសមទ្ធិផល នៃកំណែទម្រង់នេះ បានលើកកម្ពស់នូវគុណភាពសេវា និង បានលើកទឹកចិត្ត ឲ្យមន្ត្រីរាជការនៅរដ្ឋបាលថ្នាក់ក្រោមជាតិ ផ្តល់សេវាជូនប្រជាពលរដ្ឋ ឲ្យកាន់មានប្រសិទ្ធភាព ឆ្លើយតបទៅនឹងគោលការណ៍ អភិបាលល្អ ។
ឯកឧត្តមបន្តថា ការផ្តល់សេវារដ្ឋបាលរបស់អង្គភាពច្រកចេញចូលតែមួយ និង ការដាក់ឲ្យដំណើរនៃការិយាល័យប្រជាពលរដ្ឋ នៃរដ្ឋបាលខេត្តសៀមរាប នារយៈពេលកន្លងមកនេះ ក៏នៅមានបងប្អូនប្រជាពលរដ្ឋមួយចំនួន មិនទាន់យល់ច្បាស់ពីតួនាទីភារកិច្ច និង បែបបទនីតិវិធី នៃការផ្តល់សេវារដ្ឋបាល នៅអង្គភាពច្រកចេញចូលតែមួយនៅខេត្ត ក្រុង ស្រុក និង តួនាទីភារកិច្ចរបស់ការិយាល័យប្រជាពលរដ្ឋ ដែលកត្តាទាំងនេះហើយ ត្រូវទាមទារធ្វើការផ្សព្វផ្សាយឲ្យបានទូលំទូលាយ និង គ្រប់មធ្យោបាយ ជូនដល់ បងប្អូនប្រជាពលរដ្ឋនៅក្រប់មូលដ្ឋានឲ្យបានជ្រាប ពីការផ្តល់សេវារដ្ឋបាលរបស់អង្គភាពច្រកចេញចូលតែមួយ និង ការិយាល័យប្រជាពលរដ្ឋ ខណៈកន្លងមកនេះរដ្ឋបាលខេត្ត ក៏បានប្រកាសដាក់ឲ្យប្រើប្រាស់ជាផ្លូវការកម្មវិធីទូរស័ព្ទដៃសម្រាប់ទទួលព័ត៌មាន ត្រឡប់ពីប្រជាពលរដ្ឋ ទាក់ទងនឹងការផ្តល់សេវារដ្ឋបាល នៅថ្នាក់ក្រោមជាតិ ។
ជាមួយគ្នានេះដែរ ឯកឧត្តម សួស សុខចាន់ បានធ្វើការផ្តាំផ្ញើដល់សិក្ខាកាមទាំងអស់ ត្រូវយកចិត្តទុកដាក់ស្តាប់នូវរាល់បទបង្ហាញនានា របស់អង្គភាពច្រកចេញចូលតែមួយ ការិយាល័យប្រជាពលរដ្ឋ និង អង្គការតម្លាភាព ហើយបើមានចម្ងល់ ត្រូវលើកឡើងជាសំនួរ សម្រាប់ធ្វើការពិភាក្សាគ្នាឲ្យបានផុសផុល ដើម្បីយកទៅអនុវត្តឲ្យកាន់តែមានប្រសិទ្ធភាពខ្ពស់ ៕
អត្ថបទ និងរូបភាព ៖ លោក ម៉ី សុខារិទ្ធ
កែសម្រួលអត្ថបទ ៖ លោក លីវ សាន្ត
