នៅថ្ងៃទី២៣ ខែមិថុនា ឆ្នាំ ២០២២ ឯកឧត្តម លោកជំទាវ ក្រុមប្រតិភូ ថ្នាក់ដឹកនាំសមាគមជាតិក្រុមប្រឹក្សារាជធានី ខេត្ត និងលោក លោកស្រី ថ្នាក់ដឹកនាំសម្ព័ន្ធភាពជាតិក្រុមប្រឹក្សាថ្នាក់មូលដ្ឋានរាជធានី ខេត្ត សមាគមជាតិក្រុមប្រឹក្សាថ្នាក់មូលដ្ឋាន ប្រមាណជិត ១០០នាក់ ដឹកនាំដោយឯកឧត្តម សយ កុសល ប្រធានសម្ព័ន្ធភាពជាតិក្រុមប្រឹក្សាថ្នាក់មូលដ្ឋាន សហការជាមួយរដ្ឋបាលខេត្តសៀមរាប ដឹកនាំដោយ លោកលី សំរិទ្ឋ អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម ទៀ សីហា អភិបាល នៃគណ:អភិបាលខេត្ត និងវត្តមានប្រធានមន្ទីរ អង្គភាពពាក់ព័ន្ធ អភិបាលស្រុកមួយចំនួន ក្នុងខេត្តសៀមរាប បានជួបជុំគ្នានៅសណ្ឋាគារខេមរ៉ាអង្គរ ក្រុងសៀមរាប ចូលរួមស្តាប់បទបង្ហាញអំពីការអភិវឌ្ឍខេត្ត និងស្រុកបន្ទាយស្រី ដើម្បីសិក្សាវាយតម្លៃទៅលើបទពិសោធន៍ អំពីចំណុចខ្លាំង និងចំណុចខ្សោយ ក្នុងគោលបំណងគឺសិក្សាស្វែងយល់ ការផ្លាស់ប្ដូរបទពិសោធន៍ សម្រាប់យកទៅអនុវត្តនៅមូលដ្ឋានរបស់ខ្លួន ឱ្យសម្រេចបានជោគជ័យ។
ដំណើរទស្សនកិច្ចនេះ ជាទស្សនកិច្ចសិក្សានៃកម្មវិធីពានរង្វាន់ឧត្តមភាពលើការងាររៀបចំតំបន់ប្រជុំជនរបស់សមាគមក្រុមប្រឹក្សារដ្ឋបាលថ្នាក់ក្រោមជាតិ បន្ទាប់ពីបានធ្វើទស្សនកិច្ចសិក្សានៅសង្កាត់ទឹកល្អក់ទី១ រាជធានីភ្នំពេញ ក្រោមការគាំទ្ររបស់គម្រោងពង្រឹងសមត្ថភាពអាជ្ញាធរថ្នាក់ក្រោមជាតិនៅកម្ពុជា ក្នុងការរៀបចំផែនការនគរូបនីយកម្ម និងការគ្រប់គ្រងដីធ្លី ដើម្បីកែប្រែមុខមាត់សហគមមិនទាន់រៀបរយ និងធានានូវលទ្ធភាពក្នុងការទទួលបាន នូវសេវាសាធារណ:ជាសារវ័ន្ត។ ដែលគម្រោងនេះទទួលបានហិរញ្ញប្បទានពីសហភាពអឺរ៉ុប(EU) តាមរយ:សមាគមអន្តរជាតិនៃអភិបាលក្រុងប្រើប្រាស់ភាសាបារាំង (AIMF)។
ឯកឧត្តម សយ កុសល មានប្រសាសន៍ថា៖ គម្រោងដែលជាប់ជាជ័យលាភីនៅសង្កាត់ទឹកល្អក់ទី១ រាជធានីភ្នំពេញ គឺជាគម្រោង “អភិវឌ្ឍន៍ហេដ្ឋារចនាសម្ព័ន្ធផ្លូវបេតុងសហគមន៍ភូមិ១៥-១៦”។ មុនពេលអនុវត្តគម្រោង តំបន់នេះជាដីទំនាបលិចទឹកនៅគ្រប់រដូវកាល ជាពិសេសរដូវភ្លៀង។ ការរស់នៅ បរិស្ថានមិនស្អាត មានក្លិនស្អុយ គ្មានបណ្តាញលូទឹក ស្អុយ គ្មានបណ្តាញអគ្គីសនីបំភ្លឺផ្លូវ គ្មានបណ្តាញទឹកស្អាត ហើយផ្លូវមានសភាព តូចចង្អៀត បន្ទាប់មករដ្ឋបាលរាជធានីភ្នំពេញ បានអភិវឌ្ឍសង្កាត់ទឹកល្អក់ទី១ ឱ្យមានអ្វីៗគ្រប់យ៉ាង ចាប់ពីឆ្នាំ២០១១ ដល់ឆ្នាំ២០១៨។ ក្នុងបទបង្ហាញរបស់ លោកទិព្វ ពិសិទ្ធិ នាយកទីចាត់ការផែនការវិនិយោគខេត្ត បានលើកឡើងអំពី ផែនការអភិវឌ្ឍខេត្ត បញ្ហាប្រឈមដំណោះស្រាយផងដែរ។ ក្នុងនោះក៏បានលើកឡើងពីសក្តានុពលនៃហេដ្ឋារចនាសម្ព័ន្ឋផ្លូវ៣៨ខ្សែក្នុងក្រុងសៀមរាបដែលបានជួយបង្កើនភាពទាក់ទាញទេសចរនៅកណ្តាលក្រុង ក្លាយជាទីក្រុងស្អាតទទួលបានជ័យលាភីទីក្រុងទេសចរណ៍អាស៊ានស្អាត និងជាទីក្រុងស្ថិតនៅក្នុងគម្រោងទីក្រុងវៃឆ្លាតក្រោមជំនួយសហការបច្ចេកទេសពីទីភ្នាក់ងារសហប្រតិបត្តិការអន្តរជាតិជប៉ុន(JICA) និងក្រសួងដែនដី និងហេដ្ឋារចនាសម្ព័ន្ធដឹកជញ្ជូន និងទេសចរណ៍ជេប៉ុន(MLIT) បានផ្តល់សក្តានុពល ដើម្បីពង្រីកតំបន់ទ្រនាប់នៃក្រុងសៀមរាប សម្រាប់បម្រើឱ្យវិស័យទេសចរណ៍ផងដែរ។
សូមជំរាបថា៖ បើផ្អែកតាមផេកសមាគមក្រុមប្រឹក្សារដ្ឋបាលថ្នាក់ក្រោមជាតិ បង្ហាញថា កម្មវិធីពានរង្វាន់ឧត្តមភាពលើការងាររៀបចំតំបន់ប្រជុំជន” ត្រូវបានប្រកាសដាក់ឱ្យអនុវត្ត ក្នុងខែមករា ឆ្នាំ២០២០ ជាកម្មវិធីដំបូងគេនៅកម្ពុជា ក្នុងគោលបំណងជ្រើសរើស និងទទួលស្គាល់គម្រោងគំរូលើការងារអភិវឌ្ឍលំនៅដ្ឋានប្រជាជនក្រីក្រនៅទីប្រជុំជន ធ្វើឱ្យប្រសើរឡើង នូវសំណង់មិនរៀបរយ និងពង្រីកការអនុវត្តឱ្យល្អប្រសើរ។ នៅថ្ងៃទី២៧ វិច្ឆិកា ឆ្នាំ២០២០៖ គណ:កម្មការជ្រើសរើសជ័យលាភីកម្មវិធី “ពានរង្វាន់ឧត្តមភាពលើការងាររៀបចំតំបន់ប្រជុំជន” បានរៀបចំកិច្ចប្រជុំវាយតម្លៃ និងសម្រេចលើបេក្ខជនរដ្ឋបាលក្រុង ស្រុក ឃុំ សង្កាត់ សម្រាំងចុងក្រោយចំនួន៥ ដើម្បីកំណត់ជ្រើសរើសជាជ័យលាភីប្រចាំកម្មវិធី។ បេក្ខជនពាក់កណ្តាលផ្តាច់ព្រ័ត្រទាំង៥ រួមមាន៖
១. គម្រោង “អភិវឌ្ឍហេដ្ឋារចនាសម្ព័ន្ធផ្លូវបេតុងសហគមន៍ភូមិ ១៥-១៦” របស់សង្កាត់ទឹកល្អក់១ ខណ្ឌទួលគោក រាជធានីភ្នំពេញ
២. គម្រោង “សាងសង់លូដោះទឹក” របស់ឃុំពន្លៃ ស្រុកអង្គរបុរី ខេត្តតាកែវ
៣. គម្រោង “អភិវឌ្ឍហេដ្ឋារចនាសម្ព័ន្ធផ្លូវបេតុងលានស្រូវ និងប្រព័ន្ធលូ” របស់សង្កាត់ក្រាំងអំពិល ក្រុងកំពត ខេត្តកំពត
៤. គម្រោង “សាងសង់ទំនប់បង្ហៀរក្បាលហុងស្ទឹងពោធិ៍សាត់” របស់រដ្ឋបាលក្រុងពោធិ៍សាត់
៥. គម្រោងយុទ្ធនាការ “ផ្ទះ១ អំពូល១” របស់រដ្ឋបាលស្រុកបន្ទាយស្រី ខេត្តសៀមរាប។
លទ្ឋផលផ្តាច់ព្រ័ត្ត លេខ១-បានទៅលើ គម្រោង “សាងសង់ទំនប់បង្ហៀរក្បាលហុងស្ទឹងពោធិ៍សាត់” របស់រដ្ឋបាលក្រុងពោធិ៍សាត់។ លេខ២-បានទៅលើគម្រោងយុទ្ធនាការ “ផ្ទះ១ អំពូល១” របស់រដ្ឋបាលស្រុកបន្ទាយស្រី ខេត្តសៀមរាប។និងលេខ៣បានទៅលើ គម្រោង “អភិវឌ្ឍហេដ្ឋារចនាសម្ព័ន្ធផ្លូវបេតុងសហគមន៍ភូមិ ១៥-១៦” របស់សង្កាត់ទឹកល្អក់១ ខណ្ឌទួលគោក រាជធានីភ្នំពេញ៕
អត្ថបទ និងរូបភាព: លោកយូ វង្ស និង លោកបូ សាវី កែសម្រួលដោយ លីវ សុខុន!!! សូមឯកឧត្តមមេត្តាជ្រាប សូមអរគុណ ។
