ក្រុមសម្ព័ន្ធភាពជាតិក្រុមប្រឹក្សាថ្នាក់មូលដ្ឋានរាជធានីខេត្ត ប្រមាណជិត ១០០នាក់ នៅថ្ងៃទី២៣ ខែមិថុនា ឆ្នាំ២០២២នេះ បានសិក្សាស្វែងយល់ពីការអនុវត្ដន៍គម្រោង ”ផ្ទះមួយអំពូលមួយ” នៅស្រុកបន្ទាយស្រី ខេត្ដសៀមរាប ដែលទទួលបានជ័យលាភីលេខ២ ដើម្បីយកបទពិសោធន៍ទៅអភិវឌ្ឍន៍នៅមូលដ្ឋានរបស់ខ្លួន នៅតាមបណ្ដាខេត្ដផ្សេងទៀត។
ក្នុងដំណើរទស្សនកិច្ចនេះ លោក ឃឹម ហ្វីណង់ អភិបាលស្រុកបន្ទាយស្រី បានធ្វើបទបង្ហាញនូវគម្រោងផ្ទះមួយ អំពូលមួយ ទាំងមុនពេល និងក្រោយពេលអនុវត្តគម្រោងដែលបានទទួលជ័យលាភីលេខ២ ដោយលោកប្រាប់ថា ការអនុវត្ដគម្រោងនេះ ឈរលើភាពច្នៃប្រឌិត និងដោយមិនពឹងផ្អែកលើកញ្ចប់ថវិការដ្ឋ ប៉ុន្ដែពឹងផ្អែកលើការចូលរួមរបស់បងប្អូនប្រជាពលរដ្ឋ។ ចំណែកការអភិវឌ្ឍវិស័យទេសចរណ៍អាជ្ញាធរស្រុក ប្រើយុទ្ឋសាស្ត្រដាក់វិស័យទេសចរណ៍នៅកណ្តាល។ លោកក៍បានបង្ហាញនូវទីតាំងផ្ទះមួយអំពូលមួយក្នុងភូមិព្រះដាក់ សម្រាប់យកទៅអនុវត្តក្នុងមូលដ្ឋានរៀងៗខ្លួន។
ជាមួយគ្នានោះលោក ទិព្វ ពិសិទ្ឋ នាយកទីចាត់ការផែនការ និងវិនិយោគខេត្តសៀមរាប បានបង្ហាញពីសក្តានុពលនៃហេដ្ឋារចនាសម្ព័ន្ឋផ្លូវ ៣៨ខ្សែក្នុងក្រុងសៀមរាប ដែលបានជួយបង្កើនភាពទាក់ទាញទេសចរនៅកណ្តាលក្រុង ក្លាយជាទីក្រុងស្អាត ទទួលបានជ័យលាភីទីក្រុងទេសចរណ៍អាស៊ានស្អាត និងជាទីក្រុងស្ថិតនៅក្នុងគម្រោងទីក្រុងវៃ។
ឯកឧត្តម សយ កុសល ប្រធាននសម្ព័ន្ធភាពជាតិក្រុមប្រឹក្សាថ្នាក់មូលដ្ឋាន មានប្រសាសន៍ថា ការជួបជុំគ្នានៅពេល ដើម្បីសិក្សាវាយតម្លៃទៅលើបទពិសោធ អំពីចំណុចខ្លាំង និងចំណុចខ្សោយ ក្នុងគោលបំណងសំខាន់គឺសិក្សាស្វែងយល់ផ្លាស់ប្ដូរបទពិសោធន៍ ដើម្បីរៀនសូត្រតាមនូវបទពិសោធន៍ របស់ក្រុមប្រឹក្សាមូលដ្ឋានដែលទទួលបានជោគជ័យលើការងារអភិវឌ្ឍន៍មូលដ្ឋាន ជាពិសេសទាក់ទងនឹងការរៀបចំតំបន់ប្រជុំជន និងការផ្តល់សេវាជូនប្រជាពលរដ្ឋនៅក្នុងមូលដ្ឋានរបស់ខ្លួន។ ឯកឧត្ដមបន្ដថា ដំណើរទស្សនកិច្ចមកកាន់ខេត្តសៀមរាបនេះ ជាទស្សនកិច្ចសិក្សានៃកម្មវិធីពានរង្វាន់ឧត្តមភាព លើការងាររៀបចំតំបន់ប្រជុំជនរបស់សមាគមក្រុមប្រឹក្សារដ្ឋបាលថ្នាក់ក្រោមជាតិ បន្ទាប់ពីបានធ្វើទស្សនកិច្ចសិក្សានៅសង្កាត់ទឹកល្អក់ទី១ រាជធានីភ្នំពេញ ក្រោមការគាំទ្ររបស់គម្រោងពង្រឹងសមត្ថភាពអាជ្ញាធរថ្នាក់ក្រោមជាតិនៅកម្ពុជា ក្នុងការរៀបចំផែនការនគរូបនីយកម្មនិងការគ្រប់គ្រងដីធ្លី ដើម្បីកែប្រែមុខមាត់សហគមន៍មិនទាន់រៀបរយ និងធានានូវលទ្ធភាពក្នុងការទទួលបាននូវសេវាសាធារណៈ ជាសារវ័ន្តដែលទទួលបានហិរញ្ញប្បទាន ពីសហភាពអឺរ៉ុប តាមរយៈសមាគមអន្តរជាតិ នៃអភិបាលក្រុងប្រើប្រាស់ភាសាបារាំង (EU-AIMF)។
សូមជម្រាបថា រាជធានីភ្នំពេញ និងខេត្តចំនួន២ទៀត មានខេត្តពោធិ៍សាត់ និងខេត្តសៀមរាប បានទទួលនូវជ័យលាភីក្នុងការអនុវត្តគម្រោងអភិវឌ្ឍមូលដ្ឋាន ឱ្យមានការរីកចម្រើន និងបម្រើសេវាជូនប្រជាពលរដ្ឋឲ្យបានល្អ។សម្រាប់ជ័យលាភីលេខ១ បានទៅលើក្រុងពោធិ៍សាត់ អនុវត្តគម្រោងទំនប់បង្ហៀរទឹកក្បាលហុង ស្ទឹងពោធិ៍សាត់ លេខ២ បានទៅលើស្រុកបន្ទាយស្រី ខេត្តសៀមរាប អនុវត្តគម្រោងផ្ទះមួយ អំពូលភ្លើងមួយ និងលេខ៣ បានទៅលើសង្កាត់ទឹកល្អក់ទី១ ស្ថិតក្នុងខណ្ឌទួលគោក រាជធានីភ្នំពេញ អនុវត្តគម្រោងហេដ្ឋារចនាសម្ព័ន្ធផ្លូវបេតុងសហគមន៍ភូមិ១៥-១៦៕
អត្ថបទនិង រូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
