នារសៀលថ្ងៃទី២៣ ខែមិថុនា ឆ្នាំ២០២២នេះ ស្ថិតនៅក្នុងសាលប្រជុំធំ រដ្ឋបាលខេត្តសៀមរាប មានបើកកិច្ចប្រជុំពិភាក្សា និងស្តាប់របាយការណ៍ប្រចាំខែ ស្តីពីយុទ្ធនាការចុះបង្ក្រាបបទល្មើសជលផល ក្នុងភូមិសាស្ត្រខេត្តសៀមរាប ក្រោមអធិបតីភាពឯកឧត្តម ណៅ ធួក រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ លោក លី សំរិទ្ធ អភិបាលរងខេត្ត អភិបាលក្រុង ស្រុក ប្រធានមន្ទីរ អង្គភាពពាក់ព័ន្ធ បានចូលរួមជាច្រើននាក់ផងដែរ។
លោក ទា គឹមសុទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្ត បានធ្វើសេចក្តីរាយការណ៍អំពីលទ្ធផល នៃការបង្ក្រាបបទល្មើសនេសាទ ដោយការដកហូតឧបករណ៍នេសាទល្មើសច្បាប់គ្រប់ប្រភេទ ក្នុងភូមិសាស្ត្រខេត្ត ដើម្បីចូលរួមទប់ស្កាត់បទល្មើសជលផលនៅក្នុងដែននេសាទបឹងទន្លេសាប និងក្នុងគោលបំណងគ្រប់គ្រងឱ្យបានគង់វង្ស និងប្រើប្រាស់ធនធានជលផលប្រកបដោយនិរន្តរភាព ស្របតាមខ្លឹមសារនៃច្បាប់ស្តីពីជលផល និងបទបញ្ជាដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយក រដ្ឋមន្ត្រី នៃព្រះរាជាណាចក្រកម្ពុជា។ ចំពោះបងប្អូនប្រជានេសាទ ដែលប្រើឧបករណ៍នេសាទ ផ្ទុយពីច្បាប់កំណត់ សមត្ថកិច្ចយើងនឹងបង្ក្រាប ព្រមទាំងដកហូតយកឧបករណ៍នេសាទល្មើសច្បាប់ទាំងនោះ មករក្សាទុកមានដូចជា៖ អួនអូសទឹកសាប អាំងវ៉ិចទ័រឆក់ត្រី ម៉ាញ់ ឈិបយន្ត កន្ត្រងអូសលៀសដោយម៉ាស៊ីន និងឧបករណ៍នេសាទ ដែលបង្កើតថ្មី ឬឧបករណ៍នេសាទ ដែលគ្មានកំណត់ក្នុងប្រកាសរបស់ក្រសួងកសិកម្ម ព្រមទាំងឧបករណ៍នេសាទល្មើសច្បាប់ដទៃទៀត ប្រគល់ជូនអាជ្ញាធរមានសមត្ថកិច្ច នៅក្នុងមូលដ្ឋានរៀងៗខ្លួន។
លោក បន្តថា ដោយឡែកក្រុមការងារចម្រុះ ខណ្ឌរដ្ឋបាលជលផល បានសហការជាមួយក្រុមការងារពិនិត្យ ស្រាវជ្រាវ និងបង្ក្រាបបទល្មើសជលផល ក្នុងខេត្ត ក្រុង ស្រុក សម្រេចបានលទ្ធផលដូចជា បង្ក្រាបបទល្មើសជលផលចំនួន ២៥ករណី ក្នុងនោះ មាន ២៤ករណីបំផ្លាញចោលនៅនឹងទីកន្លែង និង១ករណី បានបញ្ចូនមកសាលាដំបូងខេត្ត គឺករណីការកាប់គាស់រានឈូសឆាយដីព្រៃលិចទឹកផងដែរ។
ឯកឧត្តម ណៅ ធួក រដ្ឋលេខាធិការក្រសួងកសិកម្ម មានប្រសាសន៏ថា ត្រូវបង្កើនកិច្ចសហការជាមួយគណ:កម្មការទប់ស្កាត់ និងបង្ក្រាបបទល្មើសជលផលថ្នាក់ជាតិ គណ:បញ្ជាការឯកភាពរដ្ឋបាលក្រុង-ស្រុក និងស្ថាប័នអយ្យការសាលាដំបូងខេត្ត បន្តយកចិត្តទុកដាក់ផ្សព្វផ្សាយច្បាប់លិខិតបទដ្ឋានគតិយុត្តិពាក់ព័ន្ធ និងការគ្រប់គ្រងវិស័យជលផលដល់ប្រជានេសាទ និងអាជ្ញាធរមូលដ្ឋានឲ្យបានយល់ដឹងទាំងអស់គ្នា អំពីខ្លឹមសារ នៃច្បាប់។ ក្រុមការងារយើង ត្រូវតាមដានស្រាវជ្រាវទប់ស្កាត់ និងបង្ក្រាបបទល្មើសជលផលឲ្យមានប្រសិទ្ធភាព ទាន់ពេលវេលាបន្តទៀត ដោយមិនត្រូវឃុបឃិតជាមួយជនល្មើសជាច់ខាត។
ឯកឧត្តម បានបញ្ជាក់ទៀតថា ដោយយើងផ្អែកលើសកម្មភាពរួមខាងលើ ក្រោមការដឹកនាំរបស់គណ:កម្មការអន្តរក្រសួង ត្រូវបង្កើនប្រសិទ្ធិភាពទប់ស្កាត់ និងបង្ក្រាបបទល្មើសនេសាទនៅបឹងទន្លេសាប និងក្រុមការងារពិនិត្យ ស្រាវជ្រាវបទល្មើសជលផលក្នុងភូមិសាស្ត្រខេត្តសៀមរាប និងកិច្ចសហការ ចូលរួមពីអាជ្ញាធរមូលដ្ឋាន និងប្រជាពលរដ្ឋ ពិតជាអាចសម្រេចបាននូវការទប់ស្កាត់បទល្មើសជលផលតាមរយ:មូលដ្ឋាននេសាទក្នុងភូមិសាស្ត្រខេត្ត ប្រកបដោយប្រសិទ្ធិភាពខ្ពស់ជាទីបំផុត៕
អត្ថបទ និងរូបភាព៖ លោក ស៊ាន សុផាត
កែសម្រួល៖លោក លីវ សុខុន
