កាលពីថ្ងៃទី២៥ ខែមិថុនា ឆ្នាំ២០២២ នៅទីបញ្ជាការដ្ឋានតំបន់ប្រតិបត្តិការសិករងសៀមរាប លោក ពិន ប្រាកដ អភិបារងខេត្ត តំណាងឯកឧត្តម ទៀ សីហា អភិបាលខេត្តសៀមរាប បានធ្វើការប្រគល់អដ្ឋិធាតុយុទ្ធជនកងទ័ពស្ម័គ្រចិត្តវៀតណាម ដែលបានពលីជីវិតក្នុងសម័យសង្គ្រាមនៅកម្ពុជា ស្ថិតក្នុងភូមិសាស្ត្រខេត្តសៀមរាប ជំហាន២ ដំណាក់កាលទី២១ ចំនួន ២៣អដ្ឋិធាតុបន្ថែមទៀត ដើម្បីធ្វើមាតុភូមិនិវត្តន៍ទៅកាន់ប្រទេសវៀតណាមវិញ។
យោងតាមរបាយការណ៍របស់ តំបន់ប្រតិបត្តិការសិករងសៀមរាប បង្ហាញថា កន្លងមកក្រុមការងារគណៈកម្មការរុករកជីកគាស់ធ្វើមាតុភូមិនិវត្តន៍វៀតណាម ខេត្តតៃនិញ ជាមួយខេត្តសៀមរាប បានស្វែងរុករកជីកគាស់អដ្ឋិធាតុកងទ័ពស្ម័គ្រចិត្តវៀតណាមនៅក្នុងភូមិសាស្ត្រខេត្តសៀមរាប ចាប់ពីឆ្នាំ២០០៣ មកដល់ខែមិថុនា ឆ្នាំ២០២២នេះ បានចំនួន សរុប ៩៤០អដ្ឋិធាតុ។ ក្នុងនោះ សម្រាប់ជំហាន២ ដំណាក់កាលទី២១នេះ គឺចាប់អនុវត្តន៍ពីថ្ងៃទី២១ ខែកុម្ភៈ មកដល់ថ្ងៃទី១៣ ខែមិថុនា ឆ្នាំ២០២២។ ជាលទ្ធផលក្រុមការងារ បានរកឃើញអដិ្ឋធាតុ ចំនួន ២៣ អដ្ឋិធាតុ នៅស្រុកចំនួន ៥ ក្នុងខេត្តសៀមរាប រួមមានស្រុកក្រឡាញ់ , ពួក , អង្គរជុំ , សូទ្រនិគម និងស្រុកអង្គរធំ ។
លោកវរៈសេនីយ៍ឯកបម្រុង ង្វៀង ដឹកថឹង ប្រធានក្រុមការងារអង្គភាពK71 ចំណុះយោធភូមិភាគទី៧ ខេត្តតៃនិញ នៃសាធារណរដ្ឋសង្គមនិយមវៀតណាម បានថ្លែងអំណរគុណដល់ថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ គ្រប់ជាន់ថ្នាក់ និងប្រជាពលរដ្ឋខេត្តសៀមរាប ដែលបានសហការល្អជាមួយក្រុមការងាររបស់លោក ក្នុងការស្វែងរុករក និងធ្វើមាតុភូមិនិវត្តន៍អដិ្ឋធាតុកងទ័ពវៀតណាម ដោយទទួលបានលទ្ធផលល្អ។ លោកក៏បានលើកពីបញ្ហាប្រឈម ក្នុងការរុករកអដ្ឋិធាតុ និង ស្រាវជ្រាវរកផងដែរ ដោយភូមិសាស្ត្រដែលបានកប់សាកសព មានការប្រែប្រួល និង សាកី្សមួយចំនួនវ័យចាស់ជរា និងបានស្លាប់ ដែលធ្វើឲ្យការទទួលព័ត៌មានមិនបានច្បាស់លាស់។
ព័ត៌មានជាតិ ថ្មីៗ
តាមការលើកឡើងរបស់ លោក ពិន ប្រាកដ មានប្រសាសន៍ថា ក្នុងការស្វែងរុករក និង ធ្វើមាតុភូមិនិវត្តន៍អដិ្ឋធាតុកងទ័ពវៀតណាម ដែលបានពលីអាយុជីវិត ក្នុងសម័យសង្គ្រាមនៅខេត្តសៀមរាប ដំណាក់កាលទី២១ នេះ គឺអនុវត្តន៍តាម កិច្ចព្រមព្រៀងសហប្រតិបត្តិការរវាងរាជរដ្ឋាភិបាលកម្ពុជា និងរដ្ឋាភិបាលវៀតណាម និងរវាងខេត្តសៀមរាប ជាមួយខេត្តតៃនិញ។
លោកអភិបាលរងខេត្ត បញ្ជាក់ថា ចំពោះការចូលរួមស្វែងរុករក និង ធ្វើមាតុភូមិនិវត្តន៍អដ្ឋិធាតុកងទ័ពវៀតណាមនេះ គឺជាការងារមនុស្សធម៌ផង និងជាការបង្ហាញពីទឹកចិត្តរបស់ប្រជាជនកម្ពុជាផង។ ព្រោះការពលីអាយុជីវិតរបស់កងទ័ពវៀតណាមនៅលើទឹកដីកម្ពុជា គឺជាការរួមចំណែកក្នុងរំដោះប្រទេសកម្ពុជាពីសង្គ្រាម ដើម្បីទទួលបានសន្តិភាពរហូតមកដល់ពេលបច្ចុប្បន្ន។ ដូច្នេះ ក្នុងនាមអាជ្ញាធរគ្រប់ជាន់ថ្នាក់ និងកងកម្លាំងប្រដាប់អាវុធពាក់ព័ន្ធ ព្រមទាំងប្រជាពលរដ្ឋក្នុងខេត្ត ត្រូវបន្តធ្វើសហប្រតិបត្តិការ និង បង្កលក្ខណៈងាយស្រួល ដល់កិច្ចដំណើរការស្វែងរុករកអដ្ឋិធាតុកងទ័ពវៀតណាម ដែលបានពលីជីវិតនៅទឹកដីខេត្តសៀមរាប ដែលនៅសេសសល់បន្តទៀត ដើម្បីធ្វើមាតុភូមិនិវត្តន៍ទៅប្រទេសខ្លួនវិញ និងបានជួបជុំក្រុមគ្រួសាររបស់ខ្លួន៕
អត្ថបទ និងរូបភាព ៖ លោក ម៉ី សុខារិទ្ធ
កែសម្រួលអត្ថបទ ៖ លោក សេង ផល្លី
