យុវជនប្រមាណជាង៥រយនាក់ បានទទួលនូវការបណ្ដុះបណ្ដាលពីការបង្កើតគម្រោង និងអនុវត្តគម្រោងដើម្បីជាទុនដល់យុវជន សម្រាប់បំណិនជីវិតប្រចាំថ្ងៃ និងការបំពេញការងារ ក្នុងការប្រាស្រ័យទាក់ទងគ្នាទៅវិញទៅមក ដែលអាចត្រៀមខ្លួនឱ្យកាន់តែប្រសើរសម្រាប់ការអនុវត្តជាក់ស្តែងនៅក្នុងសហគមន៍។
វគ្គបណ្តុះបណ្តាលនេះ រៀបចំដោយកម្មវិធី ”ការស្ម័គ្រចិត្ដដើម្បីសហគមន៍ខ្ញុំ “ អស់រយៈពេល០៣ថ្ងៃ ចាប់ពីថ្ងៃទី២២ ដល់ថ្ងៃទី២៤ ខែមិថុនា ឆ្នាំ២០២២នេះ ដែលធ្វើឡើងនៅមជ្ឍមណ្ឌលជាតិយុវជនកម្ពុជា ស្ថិតនៅសង្កាត់ស្លក្រាម ក្រុងសៀមរាប ខេត្ដសៀមរាប ។
លោក អ៊ុយ គា អនុប្រធាននាយកដ្ឋានគ្រប់គ្រងមជ្ឈមណ្ឌល នៃក្រសួងអប់រំយុវជននិងកីឡា បានថ្លែងថា វគ្គបណ្ដុះបណ្ដាលនេះ បានផ្ដោតទាក់ទងសញ្ញាណទូទៅ និងបរិបទទាក់ទងនឹងការងារស្ម័គ្រចិត្តដើម្បីសហគមន៍ខ្ញុំ(ស.ស.ខ/VMC)ដល់យុវជន។
ផ្តល់ជាចំណេះដឹងជាក់លាក់ក្នុងការរៀបចំ និងអនុវត្តគម្រោងដែលពួកគេនឹងជ្រើសរើស ផ្តល់ជំនាញទន់សំខាន់ៗ មួយចំនួន ដើម្បីជាទុនដល់យុវជនសម្រាប់បំណិនជីវិតប្រចាំថ្ងៃ និងការបំពេញការងាររបស់ពួកគេ។
ផ្តល់ឱកាសដល់យុវជនស្ម័គ្រចិត្ត ក្នុងការប្រាស្រ័យទាក់ទងគ្នាទៅវិញទៅមក និងបង្កើនការរីករាយជាវិជ្ជមាន ផ្តល់ឱកាសដល់មន្ត្រីសម្របសម្រួលកម្មវិធី ឱ្យបានយល់កាន់តែច្បាស់ពីយុវជនស្ម័គ្រចិត្ត ដើម្បីអាចត្រៀមខ្លួនឱ្យកាន់តែប្រសើរសម្រាប់ការអនុវត្តជាក់ស្តែង។
ជាមួយគ្នានោះ ក៍បានផ្តល់ឱកាសក្នុងការចូលរួមក្នុងកម្មវិធីស្ម័គ្រចិត្តដើម្បីឱ្យយុវជនបានអនុវត្តនូវបំណិនទន់ និងបំណិនរឹង ពង្រឹងសមត្ថភាព បទពិសោធន៍ ក្នុងការដោះស្រាយបញ្ហាជាក់ស្តែង។
ឯកឧត្ដម សេរី ជំនះ អនុរដ្ឋលេខាធិការក្រសួងអប់រំ យុវជននិងកីឡា បានថ្លែងថា ការទទួលបាននូវចំណេះដឹងទំាងនេះ គឺជាប្រយោជន៍សំខាន់សម្រាប់យុវជនយកទៅប្រើប្រាស់ការងាររបស់ពួកគាត់នៅតាមសហគមន៍ ។
ឯកឧត្ដមរំពឹថា ប្អូនៗយុវជន គឺជាបង្គោលដ៍រឹងមាំ ដែលយកចំណេះដឹងរបស់ខ្លួន យកទៅប្រើប្រាស់ឱ្យមានប្រយោជន៍នៅក្នុងសហគមន៍ ឱ្យមានផលប្រយោជន៍ដល់ប្រទេស ព្រោះកន្លងមកយុវជនរាជធានីខេត្ដ ដែលបានធ្លាប់អនុវត្ដគម្រោង និងធ្លាប់មានបទពិសោធន៍លើចំណេះដឹង ផ្នែកអនុត្ដគម្រោងនៃការស្ម័គ្រចិត្ដដើម្បីសហគមន៍នេះ ពួកគាត់ទទួលជោគជ័យ។
ជាមួយគ្នានោះ ការទទួលបានបំណិនថ្មីៗជាច្រើន គឺជាទុនដល់យុវជនយកទៅបំពេញនូវចំណុចខ្វះខាតរបស់ខ្លួន ក្នុងការចុះអនុវត្តកម្មវិធីការស្ម័គ្រចិត្ត ជាពិសេស ការវិភាគលើកត្តាខ្លាំង កត្តាខ្សោយដោយផ្អែកលើមូលដ្ឋានគ្រឹះច្បាស់លាស់ក្នុងការអភិវឌ្ឍខ្លួនឱ្យក្លាយជាពលរដ្ឋសកម្ម ដែលជាមូលធនមនុស្សសម្រាប់អភិវឌ្ឍសហគមន៍៕
អត្ថបទ និង វីដេអូ ៖ លោក ឈិត សាវី
