ក្នុងឱកាសចុះអបរំ ផ្សព្វផ្សាយអំពីវិធានការបង្ការជំងឺគ្រុនឈាម ក្នុងបរិវេណវត្តប្រាសាទគោកចក ក្នុងសង្កាត់គោកចក ក្រុងសៀមរាប នាព្រឹកថ្ងៃទី២៧ ខែមិថុនា ឆ្នាំ២០២២នេះ ឯកឧត្ដម ម៉ម ប៊ុនហេង រដ្ឋមន្ដ្រីក្រសួងសុខាភិបាល មានជំរុញដល់អាជ្ញាធរមូលដ្ឋានត្រូវណែនាំដល់ប្រជាពលរដ្ឋ ឱ្យមានការប្រុងប្រយ័ត្នខ្ពស់ ចំពោះជំងឺគ្រុនឈាម ព្រោះការឆ្លងជំងឺគ្រុនឈាមនេះ បានកើតឡើងមិនត្រឹមតែនៅក្នុងខេត្ដសៀមរាបនោះទេ គឺកើតឡើងនៅទូទាំងប្រទេស ដូចនេះប្រជាពលរដ្ឋទំាងអស់ត្រូវអនុវត្ដតាមការណែនាំពីអ្នកជំនាញសុខាភិបាល ដើម្បីទប់ស្កាត់កុំឱ្យជំងឺនេះឆ្លងបន្ថែមទៀត។
ឯកឧត្តម ម៉ម ប៊ុនហេង បានបញ្ជាក់ថា មូសខ្លាញីដែលជាភ្នាក់ងារចម្លងនៃជំងឺគ្រុនឈាម វាចូលចិត្តរស់នៅតាមទីកន្លែងងងឹតក្នុងផ្ទះ និងនៅតាមបរិវេណជុំវិញផ្ទះដែលត្រជាក់ហើយសើម។ លក្ខណៈចម្លងនៃជំងឺគ្រុនឈាមធ្វើឡើងតាមរយៈវដ្តពីមនុស្សទៅមូស និងពីមូសទៅមនុស្សវិញ។ ការពារកុមារកុំឲ្យមូសខ្លាញីខាំ ដោយស្លៀកពាក់ឲ្យបានជិត និងគេងនៅក្នុងមុងជានិច្ច ប្រើថ្នាំសម្លាប់សត្វមូស និងដង្កូវទឹក សម្អាតទាំងក្នុង និងក្រៅផ្ទះដែលជាទីកន្លែងនៃជម្រកមូសខ្លា និងកន្លែងដែលមូសអាចពងបាន ដូចជាពាងទឹក ចានទ្រតុទូ ឬសម្រាមដែលអាចដក់ទឹកបាន។ ជាពិសេស ការពារកុំឲ្យមានមូសខ្លា និងដង្កូវទឹកទាំងនៅក្នុង និងក្រៅផ្ទះ។ ក្នុងករណីសង្ស័យថាកុមារមានជំងឺគ្រុនឈាម ត្រូវប្រញាប់ស្វែងរកកន្លែងផ្ដល់សេវាសុខាភិបាល ដើម្បីធ្វើរោគវិនិច្ឆ័យរួមទាំងព្យាបាលឲ្យបានត្រឹមត្រូវ និងទាន់ពេលវេលា។
លោកវេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាលខេត្ដសៀមរាប មានប្រសាសន៍ថា បច្ចុប្បន្នក្នុងខេត្តសៀមរាបជំងឺគ្រុនឈាម បានកំពុងតែហក់ឡើងជាគំហុក ដែលជំងឺគ្រុនឈាមអាចឆ្លងពីមនុស្សម្នាក់ទៅមនុស្សទៀតបាន ដោយសារតែមានវត្តមានមូសខ្លាញីហើយវាខាំនៅពេលថ្ងៃ។ ជាក់ស្ដែងចាប់តាំងពីសប្តាហ៍ទី១ ដល់សប្ដាហ៍ទី២៤ ដើមឆ្នាំ២០២២នេះ ក្នុងខេត្តសៀមរាប មានអ្នកជំងឺគ្រុនឈាមបានចូលមកសម្រាកព្យាបាលនៅតាមមន្ទីរពេទ្យ មានចំនួន ៥៨៣នាក់ មានការកើនឡើង ២៧,៧៨ភាគរយ បើធៀបនឹងរយៈពេលដូចគ្នាក្នុងឆ្នាំ២០២១ ដែលមានត្រឹមតែ ១៦២នាក់ប៉ុណ្ណោះ។
លោកវេជ្ជបណ្ឌិត បន្ថែមថា បើទោះជាមានការកើឡើងក្តី ប៉ុន្តែមិនទាន់មានមនុស្សស្លាប់ដោយសារជំងឺគ្រុនឈាមនេះឡើយទេ ប៉ុន្តែទោះយ៉ាងណាអាជ្ញាធរសុខាភិបាល ត្រូវតែប្រុងប្រយ័ត្ននឹងបង្ការទុកជាមុន៕
អត្ថបទ និង រូបភាព៖ លោក ជា ស្រស់ ,លោក បូ សាវី
កែសម្រួល៖ លោក អ៊ុន ណារាជ្យ
