ក្រុមកីឡាករជាច្រើននាក់មកពីតាមបណ្ដាក្លឹបវាយសីក្នុងប្រទេសកម្ពុជា បាននាំគ្នាចូលរួមប្រគួតវាយសីមិត្ដភាព ដើម្បីបង្ហាញដល់យុវជនឱ្យចូលរួមលេងកីឡា និងដើម្បីទទួលបានបទពិសោធន៍គ្នាទៅវិញទៅមក ក្នុងការចូលរួមក្នុងស័យកីឡា ដែលការប្រគួតកីឡាវាយសីនេះ រៀបចំដោយក្លឹបវាយសីយូនិត ស្ថិតនៅសង្កាត់ស្វាយដង្គំ ក្រុងសៀមរាប ដែលធ្វើឡើងរយៈពេល ២ថ្ងៃ ចាប់ពីថ្ងៃទី២៥ ដល់ថ្ងៃទី២៦ ខែមិថុនា ឆ្នាំ២០២២នេះកន្លងទៅនេះ។
លោក អ៊ុ លីភៀវ ប្រធានក្លឹបកីឡាវាយសីយូនីត បានឲ្យដឹងថា ក្រុមកីឡាករដែលចូលរួមប្រគួតនេះមានចំនួន ៣២គូ មកពីក្លឹបផ្សេងៗ ទូទាំងប្រទេស។ ការប្រគួតវាសីនេះ គឺដើម្បីលើកស្ទួយវិស័យកីឡាវាយសីនៅក្នុងព្រះរាជណាចក្រកម្ពុជា ឱ្យកាន់តែមានការរីកចំរើនថែមទៀត ស្របពេលរាជរដ្ឋាភិបាល កំពុងយកចិត្ដទុកដាក់លើវិស័យកីឡាគ្រប់ប្រភេទ។ ការប្រគួតវាយសីនេះ ដោយមានផ្ដល់រង្វង់លើកទឹកចិត្ដសម្រាប់ក្រុមកីឡាករលេខ១ ដល់លេខ៣ ដោយមានថវិកាចាប់ពី ១០០០ដុល្លា ដល់២០០ដុល្លា។ ហើយការប្រគួតវាយុសីនេះដែរគឺរៀបចំឡើងទ្រង់ទ្រាយធំ ប្រចំាឆ្នាំ២០២២ ដែលមិនធ្លាប់មាននៅខេត្ដសៀមរាប។
លោក អ៊ុ លីភៀវ បន្ថែមថា កីឡាវាយសីនេះ មិនត្រឹមតែបង្កើតភាពស្និទ្ធស្នាលជាមួយគ្នាតាមរយៈការលេងកីឡាប៉ុណ្ណោះទេ តែវាក៏មានអត្ថប្រយោជន៍សម្រាប់សុខភាព និងធ្វើឱ្យបំបាត់ការគិតច្រើន និងកាត់ត្រេសជាដើម។ ជាមួយគ្នានេះ វាក៏ជួយដុតបំផ្លាញជាតិខ្លាញ់ធាត់បានយ៉ាងប្រសើរ ជួយធ្វើឲ្យរាងស្អាត និងបង្កើនភាពសប្បាយរីករាយ។ លោកក៏សូមអំពាវនាវដល់យុវជន ក៍ដូចប្រជាពលរដ្ឋ គាំទ្រកីឡាវាយសី និងត្រូវចូលរួមលេងកីឡាឱ្យបានមួយមុខយ៉ាងតិច ដើម្បីឱ្យមានសុខភាពល្អ និងប្រទេសមានការរីកចំរើននូវវិស័យកីឡា។
សូមជម្រាបថា ការលេងកីឡាផ្សេងៗសុទ្ធតែនាំមកនូវអត្ថប្រយោជន៍ជាច្រើនដល់សុខភាព មិនថាលេងបាល់ ហែលទឹក រត់ប្រណាំង ឬកីឡាផ្សេងៗជាច្រើននោះទេ។ ដោយឡែក វាយសីជាប្រភេទកីឡាមួយដែលពេញនិយមសម្រាប់មិត្តយុវវ័យជាច្រើន។ វាជួយឲ្យរាងកាយពួកគេបានរាងស្អាត និងសុខភាពបានប្រសើរ ព្រមទាំងបង្កើនភាពសប្បាយរីករាយផងដែរ៕
អត្ថបទ និង រូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
