កាលពីរសៀលថ្ងៃទី២៧ ខែមិថុនា ឆ្នាំ២០២២ កន្លងមកនេះ សមាគមចលនាយុវជនកម្ពុជា (ក្រុម១៥៧) សាខាខេត្តសៀមរាប បានរៀបចំការដាំកូនឈើចម្រុះប្រមាណជា ១,០០០ដើម ក្នុងនោះមាន កូនឈើគគី ៥០០ដើម និងកូនឈើបេង ៥០០ដើម ស្ថិតនៅភូមិព្រៃខ្មាំង ឃុំស្រែណូយ ស្រុកវ៉ារិនខេត្តសៀមរាប ក្នុងគោលបំណងចូលរួមស្តារគម្របបៃតង និងគម្របព្រៃឈើឡើងវិញ ដើម្បីបរិស្ថានល្អ មានភាពបៃតង និងរក្សាបាននូវប្រភពទឹកក្រោមដី។ ពិធីនោះ មានការចូលរួមពីសំណាក់ លោក ធិននី វិធូរ អភិបាលស្រុកវ៉ារិន, លោក ឧត្តមសេនីយ៏ទោ សាយ រិទ្ធីសក្តិ នាយកសាលានគរបាលភូមិភាគ ៤ខេត្ត, លោក សឹង្ហ សំរឹទ្ធ អនុប្រធានសមាគមចលនាយុវជនកម្ពុជា (ក្រុម១៥៧) សាខាខេត្តសៀមរាប មន្ទីរ អង្គភាព ស្ថាប័ន កងកម្លាំងប្រដាប់អាវុធ អាជ្ញាធរមូលដ្ឋាន យុវជនស្រុក និងប្រជាពលរដ្ឋប្រមាណជាង ២០០នាក់ផងដែរ។
មានប្រសាសន៍ក្នុងឱកាសនោះ លោក ធិននី វិធូរ អភិបាលស្រុកវ៉ារិន បានបង្ហាញថា ការដាំដើមឈើឡើងវិញនេះ ពិតជាមានសារ:ប្រយោជន៍ សម្រាប់ការបំផុសស្មារតីប្រជាពលរដ្ឋយើងឲ្យចេះស្រឡាញ់ព្រៃឈើ ចូលរួមដាំដើមឈើឡើងវិញ និងចូលរួមទប់ស្កាត់ការប្រែប្រួលអាកាសធាតុ។ សរុបមកពិធីដាំកូនឈើនៅថ្ងៃនេះ មានការចូលរួមយ៉ាងច្រើនកុះករ ជាការឆ្លុះបញ្ចាំងនូវការភ្ញាក់រលឹករបស់សហគមន៍យើងទាំងមូល ក្នុងការប្រឈមមុខដោះស្រាយចំពោះការបាត់បង់ព្រៃឈើ និងជាស្មារតីម្ចាស់ការក្នុងការទទួលខុសត្រូវលើការគ្រប់គ្រងធនធានធម្មជាតិ សម្រាប់អនាគតភូមិ ឃុំ និងជាជោគវាសនានៃមាតុភូមិយើង ជាពិសេសសម្រាប់កូនចៅជំនាន់ក្រោយ ដើម្បីឱ្យខេត្តសៀមរាបរបស់យើងរក្សាបាននូវគម្របបៃតងស្រស់ ហើយវាមានតួនាទីយ៉ាងសំខាន់ក្នុងការជួយថែរក្សាលំនឹង នៃការប្រែប្រួលអាកាសធាតុ ដែលព្រៃឈើ និងបរិស្ថានធម្មជាតិ តាមរយ:ការជួយធ្វើនិយ័តកម្មអាកាសធាតុ ជួយកាត់បន្ថយឥទ្ធិពលជាអវិជ្ជមាននៃការប្រែប្រួលអាកាសធាតុ និងទប់ទល់នឹងគ្រោះរាំងស្ងួត ទឹកជំនន់ ខ្យល់ព្យុះ ។ល។
លោក សឹង្ហ សំរឹទ្ធ អនុប្រធានសមាគមចលនាយុវជនកម្ពុជា (ក្រុម១៥៧) សាខាខេត្តសៀមរាប បានលើកឡើងថា ពិធីដាំកូនឈើចំនួន ១,០០០ដើម តាមបណ្តោយផ្លូវទៅភ្នំចង្ក្រានរយនាពេលនេះ សមាគមចលនាយុវជនកម្ពុជា (ក្រុម១៥៧) ដែលមានឯកឧត្តមបណ្ឌិត ហ៊ុន ម៉ាណែត ជាស្ថាបនិក បានបង្កើតឡើងនៅក្នុងគោលបំណង ដើម្បីបំរើការងារមនុស្សធម៌ ការងារសង្គម និងបំរើប្រជាពលរដ្ឋទូទៅ ដោយសហការជាមួយអាជ្ញាធរមូលដ្ឋានគ្រប់លំដាប់ថ្នាក់ទូទាំងប្រទេស។ លោក បានបញ្ជាក់ទៀតថា ដើម្បីជួយដល់ប្រពន័្ធអេកូឡូស៊ី និងស្រទាប់អូហ្សូន ការពារផែនដីជាមួយរាជរដ្ឋាភិបាលកម្ពុជា ស្របគ្នាជាមួយជារដូវវស្សាផងដែរ ក្នុងនោះព្រៃឈើ ក៏ផ្តល់នូវសេវាកម្មគាំពារបរិស្ថានជាច្រើនទៀត ដូចជាការការពារទីជម្រាល ការទប់ស្កាត់ការហូរច្រោះដី ការធ្វើឱ្យប្រសើរឡើងនៃគុណភាពដី និងផ្តល់នូវផល-អនុផលព្រៃឈើជាច្រើនអនេកដល់ប្រជាពលរដ្ឋ ជាពិសេសរួមចំណែកដល់ការកាត់បន្ថយភាពក្រីក្ររបស់សហគមន៍នៅជនបទផងដែរ៕
ព័ត៌មានជាតិ ថ្មីៗ
អត្ថបទ និងរូបភាព៖ លោក ស៊ាន សុផាត
កែសម្រួល៖ លោក លីវ សុខុន
