នៅថ្ងៃទី២៩ ខែមិថុនា ឆ្នាំ២០២២ អង្គការលំនៅឋានមនុស្សជាតិកម្ពុជាសហការជាមួយរដ្ឋបាលក្រុងសៀមរាប និងរដ្ឋបាលខេត្តដឹកនាំដោយលោក លី សំរិទ្ឋ អភិបាលរងខេត្ត រួមនឹងតំណាងស្ថាប័ន អង្គភាពមន្ទីរពាក់ព័ន្ឋ អាជ្ញាធរក្រុង សង្កាត់ អង្គការដៃគូជាតិនិងអន្តរជាតិ និងក្រុមជាងបានចូលរួមនៅក្នុងយុទ្ធនាការនិមិត្តរូប ដឹកនាំសាងសង់លំនៅឋានជូនដល់ប្រជាពលរដ្ឋនៅភូមិវាល សង្កាត់សំបួរ ក្រុងសៀមរាប។
លោកស្រី Bernadette Bolo-Duthy នាយិកាប្រចាំកម្ពុជានៃអង្គការលំនៅឋានមនុស្សជាតិអន្តរជាតិកម្ពុជា បានចាត់ទុកគម្រោងដែលកំពុងចាប់ផ្តើមសាងសង់នេះ ថាជាផ្លែផ្កាដែលបានមកពីលទ្ឋផលនៃជំនួបពិភាក្សានិងសហការល្អជាមួយគ្នាទាំងអាជ្ញាធរខេត្ត អង្គការ Habitat និងម្ចាស់ជំនួយនានាហើយនេះជាគម្រោងទី១ ដែលទាក់ទងទៅនឹងតំបន់ទីប្រជុំជន។
លោក Luis Noda អនុប្រធានប្រចាំតំបន់ អាស៊ីប៉ាស៊ីហ្វិកនៃអង្គការលំនៅឋានមនុស្សជាតិអន្តរជាតិ បានកត់សម្គាល់ឃើញថា តាមរយៈគម្រោង «លំនៅឋានសង្គមកិច្ចសម្រាប់ពលរដ្ឋដែលតាំងទីលំនៅបណ្តោះអាសន្នលើដីសាធារណៈរបស់រដ្ឋក្នុងក្រុងសៀមរាប» មានរហូតជាង ១០០០គ្រួសារ ដែលទទួលផលពីវា ប៉ុន្តែនៅមានច្រើនពាន់គ្រួសារទៀត ដែលត្រូវការលំនៅឋានសមរម្យបែបនេះ ទោះជាយើងមិនអាចជួយបានគ្រប់សំណូមពរតែក្រុមយើង តែងតែប្រឹងជាជំហានៗ តាមធនធានថវិកាទៅតាមលទ្ឋភាពដែលអាចធ្វើបាន។
មានប្រសាសន៍ក្នុងឱកាសនោះលោក លីសំរិទ្ឋ អភិបាលរងខេត្ត បានសម្តែងការអរគុណចំពោះអង្គការ និងម្ចាស់ជំនួយទាំងអស់ដែលបានសហការ ជួយផ្តល់ជាលំនៅឋានដ៍សមរម្យ ជូនដល់គ្រួសារបងប្អូនប្រជាពលរដ្ឋ ចំនួន ៧៥គ្រួសារ ដែលពួកគាត់ពីមុននៅក្នុងសង្កាត់គោកចក ក្រុងសៀមរាប រស់នៅលើចំណីផ្លូវ ៣៨ខ្សែ ហើយអាជ្ញាធរខេត្តក៍បានធ្វើការសម្របសម្រួលដីធ្លីឱ្យពួកគាត់ មករស់នៅក្នុងទីតាំងនេះវិញ។ ជាមួយគ្នានោះរដ្ឋបាលខេត្ត បានត្រៀមដីទំហំ ៣ហិកតា នៅសង្កាត់សំបួរនេះ ដើម្បីសាងសង់សាលបណ្តុះបណ្តាលវិជ្ជាជីវៈក្នុងនោះក៍មានដីសម្រាប់លំនៅឋានសង្គមកិច្ចនេះផងដែរ។
លោកអភិបាលរងខេត្ត បញ្ជាក់ថា ក្នុងក្រុងសៀមរាបមានប្រជាពលរដ្ឋជិត ៥ពាន់គ្រួសារ ដែលត្រូវការដំណោះស្រាយ នេះជាចំណោទដែលថ្នាក់ដឹកនាំខេត្ត កំពុងគិតរកវិធីជួយដោះស្រាយ។ ក្នុងនោះ កាលពីចុងឆ្នាំ២០២១ បានដោះស្រាយគោលនយោបាយជូនប្រហែល ៧០០គ្រួសារ ដែលរស់នៅក្នុងតំបន់មិនរៀបរយតាមមាត់ស្ទឹង និងរស់នៅលើដីចំណីផ្លូវ ៣៨ខ្សែ ក្នុងក្រុងសៀមរាប ឱ្យទៅរស់នៅភូមិធម្មជាតិ ឃុំរុនតាឯក ស្រុកបន្ទាយស្រី និងមួយចំនួនមកកាន់ទីនេះ។ នៅសល់ជាង ៣ពាន់គ្រួសារទៀត កំពុងស្វែងរកអង្គការដៃគូផ្សេងៗ ទៀតដើម្បីសហការជាមួយអាជ្ញាធរខេត្តនាំគ្នាជួយពួកគាត់។
ក្នុងនាមអភិបាលនៃគណៈអភិបាលខេត្ត និងក្នុងនាមក្រុមប្រឹក្សាខេត្ត លោក លីសំរិទ្ឋ សង្ឃឹមថា ភូមិសាស្ត្រក្នុងភូមិវាលសង្កាត់សំបួរនេះ នឹងបោះជំហានទៅជាទីប្រជុំជន និងមានមនុស្សរស់នៅកុះករនាពេលឆាប់ៗនេះ ដែលទាមទារនូវហេដ្ឋារចនាសម្ព័ន្ឋ និងទឹកស្អាតប្រើប្រាស់ ថ្វីត្បិតតែបច្ចុប្បន្នបងប្អូនកំពុងប្រើប្រាស់ទឹកអណ្តូង ឬទឹកក្រោមដី តែនៅឆ្នាំ២០២៤ខាងមុខ នឹងទទួលបានទឹកស្អាតប្រើប្រាស់ ស្របពេលនេះដែរបណ្តាញអគ្គីសនីបានភ្ជាប់អស់ហើយ ផ្លូវថ្នល់ក្រហមក៍សមល្មមអាចប្រើប្រាស់ជាបណ្តោះអាសន្នសិនដែរ។ ជាមួយនោះអាជ្ញាធរខេត្តបានរៀបគម្រោង ដើម្បីស្ថាបនាផ្លូវកៅស៊ូមកកាន់តបន់នេះរួចហើយ ប៉ុន្តែដោយសារតែវិបត្តិជំងឺកូវីដ-១៩ ទើបគម្រោងអភិវឌ្ឍជាច្រើនត្រូវបានអាក់ខានក្នុងទូទាំងខេត្ត។
សូមជម្រាបថា អង្គការលំនៅឋានមនុស្សជាតិអន្តរជាតិកម្ពុជា តាមរយៈគម្រោង «លំនៅឋានសង្គមកិច្ចសម្រាប់ពលរដ្ឋដែលតាំងទីលំនៅបណ្តោះអាសន្ន លើដីសាធារណៈរបស់រដ្ឋក្នុងក្រុងសៀមរាប» ទទួលបានការហការជាមួយរដ្ឋបាលខេត្តសៀមរាប និងបានការគាំទ្រមូលនិធិពីអង្គការលំនៅឋានមនុស្សជាតិសឹង្ហបុរី និងកូរ៉េ បានសម្រេចសាងសង់លំនៅឋានជូនប្រជាពលរដ្ឋចំនួន ៧៥ខ្នងផ្ទះ រយៈពេលនៃការសាងសង់រហូតដល់ដំណាច់ខែធ្នូ ឆ្នាំ២០២២។ លំនៅឋាននេះក្នុង ១ខ្នង ចំណាយថវិកាអស់ជាង ៦២០០ដុល្លារ មានទំហំ៣,៥ គុណ ៧,៥ម៉ែត្រ សង់ពីស៊ីម៉ង់ត៍ ឥដ្ឋ ដែក ដំបូលប្រកស័ង្កសី ជញ្ជាំងសង់ពីសេរ៉ាបត លើទំហំផ្ទៃដី ៥ គុណ ១៥ម៉ែត្រ។ គម្រោងនេះដែរមានរយៈពេល ៥ឆ្នាំ គឺចាប់ពីឆ្នាំ២០១៧ ដល់ឆ្នាំ២០២១ ប៉ុន្តែដោយសារជួបវិបត្តិជាសកលនៃជំងឺកូវីដ-១៩ ជាង២ឆ្នាំមកហើយ គម្រោងត្រូវបានពន្យាមកដល់ពេលនេះ ដើម្បីបន្តសកម្មភាពការងារដែលនៅសេសសល់ តាមរយៈការផ្តល់លំនៅឋានសង្គមកិច្ចដល់ប្រជាពលរដ្ឋ ដែលតាំងទីលំនៅបណ្តោះអាសន្នលើដីសាធារណៈរបស់រដ្ឋក្នុងក្រុងសៀមរាប ដើម្បីឱ្យពួកគាត់អាចទទួលបានលំនៅឋានសមរម្យ និងមានឱកាសកែលម្អជីវភាពឱ្យប្រសើរជាងមុន៕
អត្ថបទ និង រូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
