លោក ព្រុំ វិច ប្រធានការិយាល័យផលិតកម្ម និងបសុព្យាបាលនៃមន្ទីរកសិកម្ម រុក្ខាប្រមាញ់ និងនេសាទខេត្ដសៀមរាប បានឲ្យដឹងនៅនៅល្ងាចថ្ងៃទី២៨ ខែមិថុនា ឆ្នាំ២០២២នេះម្សិលមិញថា ក្នុងខែមិថុនានេះ ក្រុមការងារពេទ្យសត្វ បានរកឃើញសត្វក្របីចំនួន ២៧ក្បាល បានងាប់ជាបន្ដបន្ទាប់ និងខ្លះទៀតមានជំងឺ ដោយសារកើតជំងឺសាទឹក ខណៈដែលម្ចាស់របស់វាលែងចោលតាមទម្លាប់នៅតាមវាលព្រៃរនាមក្នុងបឹងទន្លេសាប ស្ថិតនៅឃុំកែវពណ៌ ស្រុកពួក ខេត្ដសៀមរាប។
លោកប្រធានការិយាល័យ បានឲ្យដឹងទៀតថា ក្រុមការងារពេទ្យសត្វបានកំពុងខិតខំធ្វើការចាក់ថ្នាំដល់សត្វក្របីដែលកំពុងកើតជំងឺ ហើយការផ្ដល់វ៉ាក់សាំងដល់សត្វក្របីមានការលំបាកខ្លះៗ ក្នុងការស្វែងរកស្វក្របី ព្រោះប្រជាកសិករបានលែងសត្វក្របីចោលនៅក្នុងព្រៃរនាម ដែលមានចំង៉ាយឆ្ងាយពិបាកធ្វើដំណើរ ប៉ុន្ដែទោះជាយ៉ាងណាក្រុមមន្ដ្រីពេទ្យសត្វ បានបញ្ជូនអ្នកជំនាញចាក់វ៉ាក់សាំង និងទៅព្យាបាលសត្វក្របីជាបន្ដបន្ទាប់ ដើម្បីជួយសង្រ្គោះសត្វក្របីទាំងនោះ។ លោកថា ជំងឹសាទឹដែលកើតលើសត្វក្របីនេះ គឺមានវ៉ាក់សាំងការពារ ប៉ុន្ដែកន្លងមកប្រជាកសិករដែលជាម្ចាស់ក្របី មិនបានយកក្របីទៅចាក់វ៉ាក់សាំងការពារនោះទេ នៅពេលក្រុមជំនាញមានកម្មវិធីចាក់វ៉ាក់សាំងដល់សត្វនៅតាមភូមិម្ដងៗ ដោយសារពួកគាត់បានលែងក្របីចោលនៅក្នុងព្រៃ។
បើតាមលោក ស៊ីន ចាន់ថុល អភិបាលស្រុកពួក ខេត្ដសៀមរាប មានប្រសាសន៍ថា តាមរបាយការណ៍នៅឃុំកែវពណ៌ ស្រុកពួក ដោយការិយាល័យកសិកម្ម ធនធានធម្មជាតិ និងបរិស្ថានស្រុក បានផ្ដលព័ត៌មានថា ក្របីឈឺ និងស្លាប់ ភាគច្រើនលែងចោលនៅព្រៃរនាម ហើយមិនបានចាក់វ៉ាក់សាំងការពារពីមុន។ មន្ដ្រីជំនាញបានធ្វើការចុះស្រាវជ្រាវរកម្ចាស់សត្វក្របីដែលបានស្លាប់ជាក់ស្តែង ដែលបច្ចុប្បន្ននេះ ម្ចាស់ក្របីបានយកក្របីទៅប្រលែងចោលនៅក្នុងព្រៃរនាម រយៈពេលយូរថ្ងៃ ទើបពួកគាត់ទៅរកម្តង។ ជាមួយគ្នានោះ ក្រុមការងារបានចុះណែនាំពីបច្ចេកទេសក្នុងការព្យាបាល និងសហការជាមួយភ្នាក់ងារសុខភាពសត្វភូមិ ចុះព្យាបាលសត្វ និងផ្តល់ថ្នាំព្យាបាលដល់ភ្នាក់ងារសុខភាពសត្វភូមិផងដែរ៕
អត្ថបទ និង រូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
