ដើម្បីរួមចំណែកជាមួយរាជរដ្ឋាភិបាលកម្ពុជា ដើម្បីឱ្យមន្រ្តីនគរបាលចរាចរណ៍ផ្លូវគោកខេត្តសៀមរាប បានអនុវត្តច្បាប់ចរាចរាណ៍កាន់តែមានប្រសិទ្ធភាព មន្ទីរពេទ្យអន្តរជាតិរ៉ូយ៉ាល់អង្គរ រ៉ូយ៉ាល់ភ្នំពេញ និងមន្ទីរពេទ្យបាងកក តែងតែបានធ្វើការងារសង្គមជាច្រើនជួយដល់ប្រជាពលរដ្ឋកម្ពុជា និងផ្តល់សម្ភារផ្សេងៗ ដល់មន្រ្តីនគរបាលចរាចរណ៍ខេត្តសៀមរាប។ ជាក់ស្តែងនៅថ្ងៃទី២៩ ខែមិថុនា ឆ្នាំ២០២២នេះ មន្ទីរពេទ្យអន្តរជាតិរ៉ូយ៉ាល់អង្គរ បានផ្តល់ប៉ុស្តិ៍ប្រចាំការ ចំនួន ១០បន្ថែមទៀត ដល់នគរបាលចរាចរណ៍ផ្លូវគោកនៃស្នងការនគរបាលខេត្តសៀមរាប។
លោកវេជ្ជបណ្ឌិត និវ៉ាត់ ឥន្ទ្រាវិជ្ឈាន (Niwat Intarawichia) នាយកមន្ទីរពេទ្យអន្តរជាតិ រ៉ូយ៉ាល់អង្គរ បានឱ្យដឹងថា ដោយមើលឃើញថា មន្រ្តីនគរបាលចរាចណ៍ដែលបានកំពុងឈរជើងប្រចាំការនៅតាមគោលដៅនានាតាមដងផ្លូវ ជួបការលំបាកដោយត្រូវ នៅក្រោមកំដៅព្រះអាទិត្យ ឬក្រោមភ្លៀងធ្លាក់ ទាំងយប់ទាំងថ្ងៃ ដោយពុំទាន់មានកន្លែងជ្រកគ្រប់គ្រាន់។ ដូចនេះហើយបានជាខាងមន្ទីរពេទ្យទាំងបីនេះ រួមគ្នាធ្វើប៉ុស្តិ៍ប្រចាំការជូនពួកគាត់ ដើម្បីអាចជ្រកក្តៅ ជ្រកភ្លៀងបាន ដែលបង្កភាពងាយស្រួលដល់ពួកគាត់ក្នុងការអនុវត្តច្បាប់ចរាចរណ៍នៅតាមដងផ្លូវឱ្យកាន់តែមានប្រសិទ្ធភាព។
លោកឧត្តមសេនីយ៍ តេង ចន្ទ័ ណាត ស្នងការនៃស្នងការដ្ឋាននគរបាលខេត្តសៀមរាប បានថ្លែងអំណរគុណដល់មន្ទីរពេទ្យទាំងបី ដែលតែងតែបានជួយដល់នគរបាលខេត្តសៀមរាប ខណៈកន្លងមកនេះនគរបាលចរាចរណ៍ផ្លូវគោកខេត្ត បានទទួលបានប៉ុស្តិ៍ប្រចាំការចំនួន០៧ និងស្នាក់ការចរាចរណ៍ចំនួន ០១រួចមកហើយ បើសរុបទាំងថ្ងៃនេះមានប៉ុស្តិ៍ប្រចាំការចំនួន១៧ និងស្នាក់ការចំនួន១ និងបានជួយបណ្តុះបណ្តាលពង្រឹងសមត្ថភាព ផ្នែកសង្គ្រោះបឋមដល់មន្ត្រីនគរបាលជារៀងរាល់ឆ្នាំ។ ហើយកត្តាទាំងនេះ គឺបានជួយសម្រួលដល់កងកម្លាំងនគរបាលចរាចរណ៍ផ្លូវគោក បានបំពេញភារកិច្ច និងការទទួលខុសត្រូវ ចំពោះការងារចរាចរណ៍ ជូនបងប្អូនប្រជាពលរដ្ឋក្នុងខេត្តសៀមរាប និងសាធារណៈជនទូទៅ ព្រមទាំងភ្ញៀវទេសចរណ៍ជាតិ-អន្តរជាតិ ផងដែរ។
ចូលរួមក្នុងឱកាសនោះដែរ ឯកឧត្តមអ្នកឧកញ៉ា សៀង ណាំ តំណាងស្រ្តមណ្ឌលសៀមរាប បានមានប្រសាន៍ថា ពេលមានភ្លៀងធ្លាក់ ថ្ងៃក្តៅខ្លាំង យើងអាចជ្រកក្នុងម្លប់បានយ៉ាងស្រួល ប៉ុន្តែសម្រាប់មន្រ្តីនគរបាលចរាចរណ៍ គឺមិនអាចទេដោយពួកគាត់ត្រូវនឈរនៅតាមគោលដៅតាមផ្លូវត្រូវខ្យល់ត្រូវភ្លៀង និងថ្ងៃក្តៅខ្លាំង ដូចនេះការផ្តល់នូវប៉ុស្តិ៍ប្រចាំការដល់ពួកគាត់ជារឿងមួយដ៏ល្អ និងបានរួមចំណែកធ្វើឱ្យពួកគាត់ អនុវត្តច្បាប់ចរាចរណ៍បានកាន់តែមានប្រសិទ្ធភាព ព្រោះពួកគាត់មានកន្លែងជ្រកត្រឹមត្រូវ ហើយឯកឧត្តមសង្ឃឹមថានាពេលខាងមុខខាងមន្ទីរពេទ្យទាំងបី និងបន្តជួយដល់មន្រ្តីនគរបាលបន្តទៀត៕
អត្ថបទ និង រូបភាព៖ លោក ឃុត សៅ
កែសម្រួល៖ លោក អ៊ុន ណារាជ្យ
