បើតាមលោកសាស្ត្រាចារ្យវេជ្ជបណ្ឌិត យ៉ៃ ចន្ទនា នាយកមន្ទីរពេទ្យជ័យវរ្ម័នទី៧ ខេត្តសៀមរាប បានឲ្យដឹងថា ក្នុងអំឡុងប្រមាណជា ១ខែចាប់ពីខែឧសភា ដល់ខែមិថុនា ឆ្នាំ២០២២ មន្ទីរពេទ្យជ័យវរ្ម័នទី៧ ឬមន្ទីរពេទ្យគន្ឋបុប្ផាទី៣ ខេត្តសៀមរាប បានពិនិត្យឃើញអ្នកមានជំងឺកាមរោគ ហៅឱ្យចំថាជំងឺស្វាយ ចំនួន ៣៨ករណី នៅលើស្ត្រីមានផ្ទៃពោះសម្រាលកូន និងទារកទើបនឹងកើតចំនួន ១១ករណី តាមរយៈការពិនិត្យឈាមមុនពេលសម្រាល។ នេះជាលើកដំបូងសម្រាប់មន្ទីរពេទ្យនេះ ខណៈពីមុនមកមានម្នាក់ ឬពីរនាក់ប៉ុណ្ណោះដែលពិនិត្យឃើញមានជំងឺស្វាយ។
លោកនាយកមន្ទីរពេទ្យមន្ទីរពេទ្យ បន្ថែមថា ក្នុងនោះក្រុមគ្រូពេទ្យបានចាក់ថ្នាំព្យាបាល និងការពារជូនដល់ម្តាយ និងទារកទាំងអស់ទៅតាមប្រក្រតីទិនរៀងខ្លួន ហើយនឹងអញ្ជើញស្វាមី ឬដៃគូជីវិតរបស់ស្ត្រីដែលក្រោយពិនិត្យទៅឃើញមានកើតជំងឺស្វាយ ដើម្បីមកពិនិត្យ និងព្យាបាលឱ្យទាន់ពេលវេលា តាមអនុសាសន៍ណែនាំដ៍ខ្ពស់ខ្ពស់របស់ ឯកឧត្តម សាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល ដើម្បីទប់ស្កាត់ ការពារការចម្លងនេះទៅអ្នកដទៃ។ ជាមួយគ្នានេះ មន្ទីរពេទ្យក៏នៅតែបន្តយកចិត្តទុកដាក់ពិនិត្យទៅលើគ្រប់ស្ត្រីមានផ្ទៃពោះសម្រាលកូនទាំងអស់ដែលមកស្វែងរកសេវាព្យាបាល និងថែទាំជំងឺនៅទីនេះ។
ឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានបញ្ជាក់ថា នេះជាការកើតរើឡើងវិញនូវជំងឺស្វាយ ជាប្រភេទជំងឺកាមរោគ ដែលយើងទាំងអស់គ្នាមិនត្រូវធ្វេសប្រហែសជាដាច់ខាត។ ជាមួយគ្នានេះដែរ ក្រសួងសុខាភិបាល កំពុងយកចិត្តទុកដាក់ នឹងជួបពិភាក្សាចំពោះការងារនេះ ជាមួយមជ្ឈមមណ្ឌលជាតិប្រយុទ្ឋនឹងជំងឺអេដស៍ ជំងឺសើរស្បែកនិងកាមរោគ ដើម្បីបន្តការអប់រំដល់ប្រជាពលរដ្ឋដើម្បីការពារ ទប់ស្កាត់ការឆ្លងឡើងវិញនៃជំងឺនេះ។
ព័ត៌មានជាតិ ថ្មីៗ
សូមជំរាបថា ឯកឧត្តមវេជ្ជបណ្ឌិត ម៉ម ប៊ុនហេង បានមានប្រសាសន៍បែបនេះ ក្នុងឱកាសដឹកនាំគណៈប្រតិភូ និងថ្នាក់ដឹកនាំសុខាភិបាល អញ្ជើញចុះពិនិត្យមើលសកម្មភាព ពិនិត្យព្យាបាលជំងឺនៅមន្ទីរពេទ្យ ជ័យវរ្ម័នទី៧ ឬមន្ទីរពេទ្យគន្ឋបុប្ផាទី៣ ខេត្តសៀមរាប និងចុះពិនិត្យការផ្តល់សេវាសុខភាព នៅមណ្ឌលសុខភាពគោកចកក្រុងសៀមរាប និងដឹកនាំអាជ្ញាធរមូលដ្ឋានក្នុងសង្កាត់នេះ ដាក់ថ្នាំអាបែតនៅតាមពាងទឹក អាងទឹក នៃផ្ទះប្រជាពលរដ្ឋ ក្នុងភូមិវាល សង្កាត់គោកចកព្រមទាំងបានសំណេះសំណាលផ្តល់សារអប់រំសុខភាព ដល់មន្ត្រីសុខាភិបាល អាជ្ញាធរមូលដ្ឋាន ក្រុមយុវជនស្ម័គ្រចិត្តកាកបាទក្រហម នៅវត្តប្រាសាទគោកចក នៅព្រឹកថ្ងៃទី២៧ ខែមិថុនា ឆ្នាំ២០២២នេះ៕
អត្ថបទ និង រូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
