ដោយមានកិច្ចសហការជាមួយរដ្ឋបាលខេត្តសៀមរាប វេទិកាសម្ព័ន្ធសង្គមស៊ីវិល នៃទីស្ដីការគណៈរដ្ឋមន្ត្រី ដែលហៅកាត់ថា វ.ស.ស បានបើកកិច្ចប្រជុំក្រុមការងារកម្រិតបច្ចេកទេស ស្ដីពីកិច្ចសម្របសម្រួលវការងារសង្គមស៊ីវិលនៅមូលដ្ឋាន ដែលប្រព្រឹត្តទៅនៅសណ្ឋាគារប៉ាស៊ីហ្វិក ស្ថិតក្នុងក្រុងសៀមរាប ក្រោមអធិបតីភាពឯកឧត្តម ប៉ៃ សំបូរ អគ្គលេខាធិការ វេទិកាសម្ព័ន្ធសង្គមស៊ីវិល នៃទីស្តីការគណៈរដ្ឋមន្ត្រី និង លោក អ៊ឹង គឹមលាង អភិបាលរងខេត្តសៀមរាប ដោយមានការចូលរួមពីសំណាក់លោក លោកស្រី ជាថ្នាក់ដឹកនាំមន្ទីរ អង្គភាពនានា និង អភិបាលរងក្រុងស្រុកក្នុងខេត្ត ។
ឯកឧត្តម ប៉ៃ សំបូរ អគ្គលេខាធិការ វេទិកាសម្ព័ន្ធសង្គមស៊ីវិល ហៅកាត់ថា វ.ស.ស បានលើកឡើងថា វ.ស.ស ជាស្ថាប័នរដ្ឋ ដែលបង្កើតឡើងតាមរយៈអនុក្រឹត្យ តាមការចង្អុលបង្ហាញពីសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងដឹកនាំផ្ទាល់បង្កើតស្ថាប័នដោយសម្តេចវិបុលបញ្ញា សុខ អាន ឧបនាយករដ្ឋមន្ត្រីរដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី ដើម្បីប្រមូលផ្តុំទស្សនៈ មតិយោបល់ ពីសំណាក់បញ្ញាវ័ន្ត ក្រុមស្រាវជ្រាវ សង្គមស៊ីវិល តាមរយៈកិច្ចពិភាក្សា ស្រាវជ្រាវតាមបែបវិទ្យាសាស្ត្រ ដែលអាចលើកជាសំណើគោលនយោបាយថ្មីៗ សម្រាប់បម្រើផលប្រយោជន៍សាធារណៈតាមគោលការណ៍ស័្មគ្រចិត្ត។
ឯកឧត្តមបន្តថា វ.ស.ស. មិនមែនជាបញ្ញត្តិករគ្រប់គ្រងអង្គការសង្គមស៊ីវិលឡើយ តែជាស្ថាប័នដែលត្រូវបានរាជរដ្ឋាភិបាលប្រគល់តួនាទីឲ្យសម្របសម្រួលការងារ រវាងរាជរដ្ឋាភិបាល និងអង្គការសង្គមស៊ីវិល ដើម្បីសម្រេចបាននូវសុខដុមនីយកម្មសង្គមស៊ីវិលនៅកម្ពុជា ដូច្នេះ រាល់ការប្រព្រឹត្តណាមួយរបស់អង្គការសង្គមស៊ីវិលណាមួយ ដែលប្រព្រឹត្តផ្ទុយអំពីច្បាប់ដោយប្រការណាមួយនោះ វ.ស.ស. នឹងធ្វើការសិក្សាលើករណីអង្គការសង្គមស៊ីវិលនោះ តាមរយៈការពិភាក្សាឆ្លងយោបល់រវាងគ្នានិងគ្នា ដើម្បីឲ្យពួកគាត់ដើរនៅលើផ្លូវត្រឹមត្រូវតាមច្បាប់ដែលបានកំណត់ ។
ឯកឧត្តម ប៉ៃ សំបូរ បន្តទៀតថា វ.ស.ស នឹងបន្តចូលរួមចំណែកកសាងសុខដុមនីយកម្មសង្គម និងពង្រឹងតួនាទីអង្គការសង្គមស៊ីវិល ដើម្បីចូលរួមកាន់តែសកម្មជាមួយរាជរដ្ឋាភិបាលក្នុងការអភិវឌ្ឍសង្គមជាតិ ពិសេសបន្តកិច្ចសហការយ៉ាងជិតស្និទ្ធជាមួយក្រសួង ស្ថាប័ន និងរដ្ឋបាលរាជធានីខេត្ត ដើម្បីបន្តលើកកម្ពស់សមត្ថភាព និងការចូលរួមរបស់អង្គការសង្គមស៊ីវិលក្នុងការអភិវឌ្ឍមូលដ្ឋាន ស្របតាមតម្រូវការជាក់ស្ដែងរបស់ប្រជាពលរដ្ឋ ព្រមទាំងបន្តពង្រឹងកិច្ចសហប្រតិបត្តិការយ៉ាងជិតស្និទ្ធ ជាមួយអង្គការសង្គមស៊ីវិលដែលជាដៃគូ កសាងបណ្ដាញអង្គការសង្គមស៊ីវិលជាតិដើម្បីចូលរួមអភិវឌ្ឍសង្គមជាតិជាមួយរាជរដ្ឋាភិបាល និង បន្តជំរុញការផ្លាស់ប្តូរទស្សនៈការងារទៅវិញទៅមក រវាងអង្គការសង្គមស៊ីវិលជាតិ និងអន្តរជាតិ ។
មានប្រសាសន៍ក្នុងឱកាសនោះដែរ លោក អ៊ឹង គឹមលាង អភិបាលរងខេត្តសៀមរាប បានសម្ដែងនូវការគាំទ្រយ៉ាងពេញទំហឹង ចំពោះសកម្មភាពរបស់វ.ស.ស ដែលបានដើរតួជាអ្នកសម្របសម្រួលការងារ រវាងរាជរដ្ឋាភិបាល និងអង្គការសង្គមស៊ីវិល ហើយក៏មិនមែនជារឿងចំឡែកដែរ ចំពោះការបង្កើតឲ្យមានអង្គការសង្គមស៊ីវិល នៅក្នុងរបបប្រជាធិបតេយ្យ សេរី ពហុបក្សនេះ ។
លោក អ៊ឹង គឹមលាង បន្តថា ពិតណាស់ថា ការអភិវឌ្ឍត្រូវការចាំបាច់មានការចូលរួមពីគ្រប់ភាគី ក្នុងនោះក្រុមអង្គការសង្គមស៊ីវិល ក៏ដើរតួនាទីសំខាន់ដែរ ប៉ុន្តែទោះជាយ៉ាងនេះក្តី នៅក្នុងកិច្ចដំណើរការកន្លងមក មានអង្គការសង្គមស៊ីវិលមួយចំនួន បានអនុវត្តលើសពីតួនាទីរបស់ខ្លួនដែលមានចែងនៅក្នុងលក្ខន្តិកៈ និងខុសពីច្បាប់មួយចំនួនរបស់កម្ពុជា ហេតុនេះ ក្នុងឱកាសនេះ សូមឲ្យអាជ្ញាធរក្រុងស្រុកក្នុងទូទាំងខេត្តសៀមរាប ត្រូវធ្វើយ៉ាងណាតាមដានឲ្យបានច្បាស់លាស់ ចំពោះអង្គការសមាគមណា ដែលនៅតែធ្វើសកម្មភាពផ្ទុយអំពីច្បាប់ ហើយរាយការណ៍មកថ្នាក់ខេត្ត ដើម្បីមានវិធានការបន្ត ៕
អត្ថបទ និងរូបភាព ៖ លោក ជា ស្រស់
កែសម្រួលអត្ថបទ ៖ លោក លីវ សាន្ត
