នាព្រឹកថ្ងៃទី៨ ខែកក្កដា ឆ្នាំ២០២២ នៅសាលាស្រុកវ៉ារិន មានរៀបចំផ្សព្វផ្សាយច្បាប់ភូមិបាល ស្ដីពីការចុះបញ្ជីដីធ្លីមានលក្ខណៈជាប្រព័ន្ធ ជូនលោកគ្រូ អ្នកគ្រូ សិស្សានុសិស្ស និងប្រជាពលរដ្ឋក្នុងមូលដ្ឋានប្រមាណជាង២០០នាក់ ឱ្យបានយល់ដឹងកាន់តែច្បាស់បន្ថែមទៀត ក្រោមកិច្ចសហការរវាងមន្ទីរទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ចខេត្ត និងរដ្ឋបាលស្រុកវ៉ារិន។
លោក ធិននី វិធូរ អភិបាលស្រុកវ៉ារិន លើកឡើងថា ការចុះបញ្ជីដីធ្លីមានលក្ខណៈជាប្រព័ន្ធ ជួយឱ្យប្រជាពលរដ្ឋទទួលបានសិទ្ធកាន់កាប់ដីនោះដោយស្របច្បាប់។ ក្នុងករណី បងប្អូនប្រជាពលរដ្ឋ មិនយល់ពីច្បាប់ភូមិបាល សូមទំនាក់ទំនងទៅអាជ្ញាធរមូលដ្ឋាន ឬក៏ទាក់ទងទៅកាន់មន្ទីរទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ចខេត្តសៀមរាប។
លោក លឹម ភក្តី ប្រធានមន្ទីរទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ចខេត្តសៀមរាប បង្ហាញថា បណ្ណសម្គាល់ម្ចាស់អចលនវត្ថុ គឺជាឯកសារគតិយុត្តមួយដែលគ្មានអាជ្ញាយុកាល និងមានតម្លៃសម្រាប់រដ្ឋ ក៏ដូចជាប្រជាពលរដ្ឋជាម្ចាស់ដី និងអ្នកកាន់កាប់ដីទទួលបាននូវសារៈប្រយោជន៍ដូចជា- រដ្ឋគ្រប់គ្រងដីធ្លីទាំងដីរដ្ឋ និងដីឯកជនងាយស្រួលក្នុងការងាររៀបចំដែនដី និងរដ្ឋបាលដីធ្លី ដើម្បីបែងចែកដី លើកស្ទួយកម្រិតជីវភាពរស់នៅរបស់ប្រជាពលរដ្ឋ និងកាត់បន្ថយបាននូវទំនាស់ដីធ្លី- ធានាសុវត្ថិភាពក្នុងការកាន់កាប់ដីធ្លីរបស់បងប្អូនប្រជាពលរដ្ឋ- ទទួលបាននូវសិទ្ធិស្របច្បាប់ក្លាយជាម្ចាស់ដីពិតប្រាកដ ដែលត្រូវបានការពារដោយច្បាប់ និង ធានាដោយរដ្ឋ- ប្រជាពលរដ្ឋអាចប្រើប្រាស់បណ្ណកម្មសិទ្ធិដីធ្លីដើម្បីផលប្រយោជន៍ផ្សេងៗ ក្នុងការប្រកបមុខរបរ ឬអាជីវកម្មលើដីធ្លីរបស់ខ្លួនដោយគ្មានការព្រួយបារម្ភឡើយ។
លោកប្រធានមន្ទីរ បន្ថែមថា ការផ្សព្វផ្សាយច្បាប់ភូមិបាលជូនប្រជាពលរដ្ឋនៅតាមមូលដ្ឋាន គឺជាទិសដៅរបស់រាជរដ្ឋាភិបាល ដើម្បីឱ្យប្រជាពលរដ្ឋបានយល់ដឹង និងទទួលបានបណ្ណកម្មសិទ្ធិដីធ្លីស្របច្បាប់គ្រប់ៗគ្នា។ ទន្ទឹមនោះ បណ្ណកម្មសិទ្ធិកាន់កាប់ដីធ្លី អាចជួយបងប្អូនចៀសផុតពីការរំលោភបំពានពីជនខិលខូច ឬធ្វើការដកហូត បើការដកហូតនោះមិនទាន់បានផ្តល់សំណងសមរម្យ និងយុត្តិធម៌ទេនោះ។
អត្ថបទ និងរូបភាព ៖ លោក ស៊ាន សុផាត
កែសម្រួលអត្ថបទ ៖ លោក សេង ផល្លី
