ទៀនព្រះវស្សា ទេយ្យទាន បច្ច័យ និងគ្រឿងឧបភោគបរិភោគមួយចំនួនធំ ត្រូវបានក្រុមការងារគណបក្សចុះមូលដ្ឋានស្រុកស្រីស្នំ ខេត្តសៀមរាប នាំយកទៅវេរប្រគេនដល់ព្រះសង្ឃគង់ចាំព្រះវស្សា នៅតាមបណ្តាវត្តនានា ក្នុងស្រុកស្រីស្នំចំនួន ៩វត្ត។ ពិធីនេះប្រារព្ធឡើង នៅវត្តជ្រោយនាងងួន ភូមិជ្រោយនាងងួន ឃុំជ្រោយនាងងួន ស្រុកស្រីស្នំ នាព្រឹកថ្ងៃទី០៩ ខែកក្កដា ឆ្នាំ២០២២នេះ ក្រោមអធិបតីភាពឯកឧត្តម លន់ សុធី ប្រធានក្រុមការងារចុះជួយមូលដ្ឋានស្រុកស្រីស្នំ លោក ហ៊ន់ ឬទ្ធិ អភិបាលស្រុកស្រីស្នំ និងសមាជិក សមាជិកាក្រុមការងារគណបក្ស មន្ត្រីរាជការជុំវិញស្រុក ព្រមទាំងប្រជាពុទ្ធបរិស័ទ តាជី យាយជី ជាច្រើននាក់បានអញ្ជើញចូលរួម។
នាឱកាសនោះ ឯកឧត្តម លន់ សុធី ប្រធានក្រុមការងារចុះជួយមូលដ្ឋានស្រុកនេះ មានប្រសាសន៍ថា ទៀនព្រះវស្សា ទេយ្យវត្ថុ បច្ច័យ និងគ្រឿងឧបភោគបរិភោគ ដែលនាំមកប្រគេនព្រះសង្ឃនាពេលនេះ គឺសម្រាប់ជាសេចក្តីត្រូវការប្រចាំថ្ងៃរបស់ព្រះសង្ឃក្នុងរយ:ពេលគង់ចាំព្រះវស្សាអស់ត្រីមាសនៅតាមទីវត្តអារាមនីមួយ ក្នុងពេលដែលព្រះសង្ឃមិនអាចនិមន្តចេញទៅបិណ្ឌបាត្របាន ដោយរដូវវស្សាមានភ្លៀងធ្លាក់ជោគជាំ ហើយក៏ ដើម្បីឧទ្ទិសកុសលបុណ្យដល់វិញ្ញាណក្ខ័ន្ធចំពោះអ្នកដែលបានចែកឋានទៅកាន់បរលោកខាងមុខនោះផងដែរ។ ឯកឧត្តម បានបន្តថា ប្រជាពលរដ្ឋខ្មែរ ប្រមាណជា ៨៥% ហើយដែលគោរពប្រតិបត្តិព្រះពុទ្ធសាសនា ដូចនេះសម្រាប់ទីវត្តអារាម មិនត្រឹមតែបម្រើវិស័យសាសនាប៉ុណ្ណោះទេ តែជាទីកន្លែងសក្ការ:បូជារបស់បងប្អូនពុទ្ធបរិស័ទគ្រប់រូបថែមទៀត។ ម៉្យាងទៀតគឺជាទីកន្លែង ដែលប្រមូលផ្តុំនូវវប្បធម៌ អក្សរសាស្ត្រ និងជាថ្នាលបណ្តុះបណ្តាលធនធានមនុស្សដែលជាមូលដ្ឋានគ្រឹះអក្សរសាស្ត្រជាតិ អរីយធម៌ វប្បធម៌ខ្មែរយើងយ៉ាងពិតប្រាកដមិនអាចខ្វះបានឡើយ។ ឯកឧត្តម បានបន្តទៀតថា យើងទាំងអស់គ្នាតែងតែប្រារព្ធពិធីបុណ្យសាសនា ប្រពៃណី ទំនៀមទម្លាប់យ៉ាងខ្ជាប់ខ្ជួន ហេតុទាំងអស់នេះហើយ ទើបថ្ងៃនេះត្រូវបាន ក្រុមការងាររបស់ថ្នាក់ខេត្ត ថ្នាក់ស្រុក និងសប្បុរសជននានា បាននាំយកនូវទេយ្យវត្ថុ ដើម្បីវេរប្រគេនដល់ព្រះសង្ឃ សម្រាប់ប្រើប្រាស់ជាចង្ហាន់ និងយកទៅដុតបំភ្លឺ បូជាថ្វាយព្រះ និងសិក្សារៀនសូត្រនូវគម្ពីធម៌វិន័យព្រះសម្មាសម្ពុទ្ធ ព្រះបរមគ្រូនៃយើង ។
ចំពោះការប្រគេនទៀនព្រះវស្សានេះ គឺជាការប្រារឰធ្វើទៅតាមទំនៀមទំលាប់ប្រពៃណីព្រះពុទ្ធសាសនា ដែលមាននាសម័យកាលយូរលង់មកហើយ ដែលបានប្រារព្ធឡើងរៀងរាល់ឆ្នាំ និងដើម្បីប្រគេនព្រះសង្ឃដែលគង់ចាំព្រះវស្សា ចាប់ចូលពីថ្ងៃ១រោច ខែអាសាឍ រហូតដល់ថ្ងៃពេញបូរមីខែអស្សុជ។ ឯកឧត្តម លន់ សុធី ក៏បានសម្តែងនូវការគោរព និងជឿជាក់ ក្នុងនាមជាពុទ្ឋសាសនិកថា ចូលវស្សាឆ្នាំនេះ គឺស្ថិតក្នុងស្ថានភាពនៃវិបត្តិកូវីដ-១៩ មិនទាន់ផុតរលត់នៅឡើយ ដូច្នេះ សូមបងប្អូនប្រជាពុទ្ឋបរិស័ទ មេត្តាចូលរួមទប់ស្កាត់ណូវការរីករាលដាលនៃជំងឺឆ្លងកូវីដ-១៩ ឲ្យបានគ្រប់ៗគា្ន ។ ឯកឧត្តម បានបន្ថែមថា ក្រោមការដឹកនាំប្រកបដោយគតិបណ្ឌិតដ៏ខ្ពង់ខ្ពស់របស់សម្តេចតេជោ ហ៊ុន សែន ដឹកនាំប្រទេសជាតិ មានសុខសន្តិភាព ទើបយើងមានការអភិវឌ្ឍន៍រីកចម្រើនលើគ្រប់វិស័យទូទាំងប្រទេស ដូចជាផ្លូវថ្នល់ ស្ពាន ប្រឡាយទឹកសាលារៀន មន្ទីរពេទ្យ វត្តអារាមមាននៅគ្រប់ក្រុង ស្រុក ឃុំសង្កាត់ ដែលផ្តល់នូវទំនុកចិត្តពីប្រជាពលរដ្ឋផងដែរ។ ជាមួយគ្នានោះ ទៀនវស្សា និងទេយ្យវត្ថុមួយចំនួន ដែលបានប្រគេនព្រះសង្ឃទាំង ៩វត្ត ដោយក្នុងមួយវត្តៗ ទទួលបានទៀនព្រះវស្សាធំ ១គូរ, ទឹកបរិសុទ្ធ ៥យួរ, មី ២កេសធំ, ទឹកអូឈិក ២យួរ, ទឹកត្រី ១យួរ, ទឹកស៊ីអុីវ ១យួរ, ត្រីខ ១យួរ, ទឹកដោះគោ ១០កំប៉ុង, ស្កសរ ១គីឡូក្រាម, អំបិល ១០គីឡូក្រាម, តែនាគ ៥កញ្ចប់, ប្រេងម៉ាស៊ូតពីរកាដុង ១០លីត្រ, ប្រេងសាំង ១០លីត្រ, សាដកចំនួន ១, អំបិល ១០គីឡូក្រាម និងបច្ច័យចំនួន(៣៤៧,០០០រៀល)៕ អត្ថបទ និងរូបភាព: លោកស៊ាន សុផាត កែសម្រួលដោយ លីវសុខុន!!!
ព័ត៌មានជាតិ ថ្មីៗ
