ថ្ងៃទី១១ ខែកក្កដា ឆ្នាំ២០២២ នៅនៅសាលាស្រុកប្រាសាទបាគង ខេត្តសៀមរាប មានរៀបចំពិធីផ្សព្វផ្សាយច្បាប់ ស្តីពីចរាចរណ៍ផ្លូវគោក ជូនដល់មន្ត្រីរដ្ឋបាលស្រុក អាជ្ញាធរមូលដ្ឋាន ក្រុមការងារយុវជនស្ម័គ្រចិត្តនៃអនុគណៈកម្មាធិការកាកបាទក្រហមស្រុកប្រាសាទបាគង និងសិស្សានុសិស្ស សរុបចំនួនជាង២០០នាក់ ក្នុងគោលបំណងធានាសុវត្ថិភាព សណ្តាប់ធ្នាប់ចរចរណ៍ផ្លូវគោក និងធានាការពារសុខភាព អាយុជីវិតមនុស្ស សត្វ ទ្រព្យសម្បត្តិ និងបរិស្ថាន។
គួររំលឹកថា ក្នុងរយៈពេល៣ខែ ដើមឆ្នាំ២០២២ មនុស្សចំនួន ៨៦៩នាក់ បានជួបប្រទះគ្រោះថ្នាក់ចរាចរណ៍ ក្នុងនោះបណ្ដាលឱ្យស្លាប់ចំនួន ៤៩៣នាក់ នេះបើតាមរបាយការណ៍ របស់គណៈកម្មាធិការជាតិសុវត្ថិភាពចរាចរណ៍ផ្លូវគោក។ ទន្ទឹមនោះ ប្រមុខរាជរដ្ឋាភិបាល សម្ដេចអគ្គមហាសេនាបតីតេជោ ហ៊ុន សែន ក៏បានគូសបញ្ជាក់ផងដែរថា បញ្ហាគ្រោះថ្នាក់ចរាចរណ៍នៅក្នុងប្រទេសកម្ពុជាកំពុងវិលត្រឡប់មកជាបញ្ហាធំចម្បងរបស់រដ្ឋាភិបាល ដែលត្រូវដោះស្រាយឡើងវិញ ក្រោយចំនួនអ្នកស្លាប់ដោយសារគ្រោះថ្នាក់ចរាចរណ៍បន្តកើនពីចំនួន១០ ទៅ២០នាក់ក្នុងមួយថ្ងៃ។
ថ្លែងក្នុងឱកាសនោះ លោក នឹម សុវណ្ណ អភិបាលរងស្រុក លើកឡើងថា ក្នុងនាមរដ្ឋបាលស្រុកប្រាសាទបាគង បានចាត់ទុកការផ្សព្វផ្សាយច្បាប់នាពេលនេះ ជាសារដ៏មានសារៈសំខាន់បំផុត ដើម្បីបញ្ជ្រាបការយល់ដឹងទៅដល់ប្រជាពលរដ្ឋទូទៅ ជាពិសេសអ្នកបើកបរនៅតាមផ្លូវសាធារណៈ ចូលរួមគោរព និងអនុវត្តន៍ទាំងអស់គ្នានូវច្បាប់ស្តីពីចរាចរណ៍ផ្លូវគោក ។ លោកក៏បានសំណូមពរដល់អ្នកបើបរទាំងអស់ត្រូវមានការយោគយល់និងអធ្យាស្រ័យដល់គ្នាទៅវិញទៅមក បើកបរត្រូវគោរពសិទ្ឋិអាទិភាព ស្លាកសញ្ញា ភ្លើងសញ្ញា និងនគរបាលចរាចរណ៍គ្រប់ពេលវេលា ដែលជាការកាត់បន្ថយនូវហានិភ័យនៃគ្រោះថ្នាក់ចរាចរណ៍គ្រប់ទីកន្លែង។
ជាការបំភ្លឺក្នុងនាមនគរបាល លោក វរសេនីយ៍ទោ ឈិត ឆាត នាយរងការិយាល័យចរាចរណ៍ផ្លូវគោក នៃស្នងការដ្ឋាននគរបាលខេត្តសៀមរាប បង្ហាញថា ករណីគ្រោះថ្នាក់ចរាចរណ៍ ដែលបានកើតមាន តែងបង្កឡើងពី ការធ្វេសប្រហែស ការមិនយោគយល់ ខ្វះអធ្យាស្រ័យ ការមិនយល់ដឹង និងមិនគោរពច្បាប់ចរាចរណ៍ដូចជា បើកបរក្រោមឥទ្ធិពលជាតិស្រវឹង បើកបរហួសល្បឿនកំណត់ និងការបត់ ឬវ៉ា/ជែងក្នុងស្ថានភាពគ្រោះថ្នាក់ ការមិនគោរពសិទ្ធិអាទិភាព ការមិនបានត្រួតពិនិត្យលក្ខណៈយានយន្តមុននឹងធ្វើដំណើរ និងកត្តាផ្សេងៗមួយចំនួនទៀត។
ថ្លែងបូកសរុបក្នុងឱកាសនោះ លោក លឹម ភក្តី ប្រធានមន្ទីរទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ចខេត្តសៀមរាប លើកឡើងថា ការធ្វើចរាចរណ៍នៅលើដងផ្លូវសាធារណៈ បើយើងមានការធ្វេសប្រហែស វានឹងបង្កឱ្យមានគ្រោះថ្នាក់ ដូចជាពិការ បាត់បង់ជីវិត ដល់មនុស្សជុំវិញខ្លួនយើង។ បន្ថែមពីនោះ ភាគីជនរងគ្រោះ និងជនបង្ក នឹងត្រូវ ចូលទៅដោះស្រាយទៅតាមផ្លូវច្បាប់ ស្របតាមច្បាប់ចរាចរណ៍គោក នៃព្រះរាជាណាចក្រកម្ពុជា។
លោកប្រធានមន្ទីរ ក៏បានអំពាវនាវដល់សិស្សានុសិស្សទាំងអស់ និងបងប្អូនប្រជាពលរដ្ឋទាំងអស់ សូមចូលរួមធ្វើជាគំរូល្អ តាមរយៈការអនុវត្ដជាក់ស្ដែងលើការធ្វើដំណើរ និងបញ្ជាយានយន្ត និងសូមជួយផ្សព្វផ្សាយបន្តដល់ មិត្តភក្តិ សមាជិកគ្រួសារ និងប្រជាពលរដ្ឋក្នុងមូលដ្ឋាន ពីច្បាប់ស្តីពីចរាចរណ៍ផ្លូវគោកនេះ។
អត្ថបទ និងរូបភាព ៖ លោក យូ វង្ស
កែសម្រួលអត្ថបទ ៖ លោក សេង ផល្លី
