ចាប់ថ្ងៃទី១១ ដល់ថ្ងៃទី១៧ ខែកក្កដា ឆ្នាំ២០២២នេះ ក្រសួងអប់រំ យុវជន និងកីឡា មានរៀបចំសិក្ខាសាលាស្ដីពី ការអភិវឌ្ឍផែនការអាជីវកម្មបែបឌីជីថលនៃកម្មវិធី “យុវជន២១” ឆ្នាំ២០២២ សម្រាប់រដូវកាលទី២ ក្រោមប្រធានបទ “សហគ្រិនឌីជីថល គំនិតផ្តួចផ្តើមអាជីវកម្មក្នុងគន្លងថ្មី”។ នៅឆ្នាំ២០២២នេះ កម្មវិធី “យុវជន២១” ទទួលបានបេក្ខជនដាក់ពាក្យ និងបំពេញគ្រប់លក្ខខណ្ឌលើការរៀបចំគំនិតផ្តួចផ្តើមអាជីវកម្មបែបឌីជីថលចំនួន១៨ គម្រោង មកពីគ្រឹះស្ថានឧត្តមសិក្សាចំនួន១៨ ទូទាំងប្រទេស។
ថ្លែងក្នុងឱកាសនោះ ឯកឧត្ដម ស៊ាន បូរ៉ាត រដ្ឋលេខាធិការ ក្រសួងអប់រំ យុវជន និងកីឡា លើកឡើងថា កម្មវិធី“យុវជន២១” ពិតជាបានឆ្លើយតបយ៉ាងស័ក្តិសិទ្ធិទៅនឹងយុទ្ធសាស្រ្តកំណែទម្រង់វិស័យអប់រំ យុវជន និងកីឡា ឆ្នាំ២០១៨-២០២៣ របស់រាជរដ្ឋាភិបាល ដែលបានកំណត់យុទ្ធសាស្រ្ត ឱ្យយុវជនមានឱកាសទទួលបានការអប់រំ និងការបណ្តុះបណ្តាលជំនាញវិជ្ជាជីវៈប្រកបដោយគុណធម៌ និងសមធម៌ និងការលើកទឹកចិត្តយុវជនឱ្យមានគំនិតផ្តួចផ្តើម គំនិតច្នៃប្រឌិត គំនិតបង្កើតថ្មី និងស្មារតីសហគ្រិនភាព។ ជាមួយគ្នានោះ កម្មវិធីនេះក៏បានរួមចំណែកជាមួយរាជរដ្ឋាភិបាលកម្ពុជា ដើម្បីចូលរួមរក្សាកំណើនសេដ្ឋកិច្ចជាតិ និងសម្រេចបាននូវចក្ខុវិស័យការអភិវឌ្ឍសេដ្ឋកិច្ចបែបឌីឌីជីថល ព្រមទាំង បានរួមចំណែកយ៉ាងសំខាន់ ក្នុងការផលិតបាននូវសហគ្រិនវ័យក្មេង ដែលមានគំនិតច្នៃប្រឌិត នវានុវត្តន៍ ភាពជាអ្នកដឹកនាំ ដែលប្រើប្រាស់ប្រព័ន្ធឌីជីថលសម្រាប់ដោះស្រាយបញ្ហាសង្គម និងសហគមន៍រស់នៅរបស់ពួកគេ ទៅនៅថ្ងៃអនាគត។
លោក ស៊ឺ ទ្រី អនុប្រធាននាយកដ្ឋានយុវជន នៃក្រសួងអប់រំ យុវជន និងកីឡា បានឱ្យដឹងថា កម្មវិធី “យុវជន២១” រៀបចំឡើងក្នុងគោលបំណងបណ្តុះបណ្តាលជំនាញ និងបំណិនដល់យុវជន ក្នុងការរៀបចំ និងអនុវត្តគម្រោងអាជីវកម្មបែបឌីជីថល (Digital Business Model) ធើ្វការប្រកួតប្រជែងដណ្តើមជ័យលាភីរបស់ក្រសួងអប់រំ យុវជន និងកីឡា។ លោកថា ក្នុងអំឡុងពេលបណ្តុះបណ្តាល និសិ្សតត្រូវបានបែងចែកជាក្រុម ដើម្បីចុះសិក្សាស្រាវជ្រាវ និងអនុវត្តគម្រោងជាក់ស្តែងនៅតាមបណ្តាសហគ្រាស និងក្រុមហ៊ុនឯកជន ដែលកំពុងធើ្វអាជីវកម្មបែបឌីជីថល។ ក្នុងអំឡុងពេលនោះ និសិ្សតត្រូវរៀនបន្សាំជីវិតការងារដោយផ្សាំភ្ជាប់ទិដ្ឋភាព និងស្ថានភាពពិតជាក់ស្តែងនៅក្នុងសង្គមរយៈពេល០៣ខែ ផងដែរ។
សូមជម្រាបថា សិក្ខាសាលាស្ដីពី ការអភិវឌ្ឍផែនការអាជីវកម្មបែបឌីជីថលនៃកម្មវិធី “យុវជន២១” មានរយៈពេល៦ខែ ចែកចេញជា ៤វគ្គ។ នៅក្នុងវគ្គនីមួយៗ យុវជននឹងទទួលបានការបណ្ដុះបណ្ដាលពីអ្នកជំនាញ សហគ្រិនឆ្នើម ចុះកម្មសិក្សាស្រាវជ្រាវ សរសេរគម្រោងអាជីវកម្មរបស់ខ្លួនដោយប្រើប្រាស់ប្រព័ន្ធឌីជីថល ជាមួយក្រុមហ៊ុន សហគ្រាសដែលប្រើប្រាស់ប្រព័ន្ធឌីជីថល ព្រមទាំងអត្ថប្រយោជន៍ជាច្រើនទៀតសម្រាប់អនាគតនាសម័យឌីជីថល។
អត្ថបទ និងរូបភាព ៖ លោក បូ សាវី
កែសម្រួលអត្ថបទ ៖ លោក សេង ផល្លី
